Impamvu abasore bashobora kuva mu rukundo bitunguranye

Yanditswe na Iradukunda Serge
Kuya 9 Gashyantare 2020 saa 01:07
Yasuwe :
0 0

Rimwe na rimwe abantu b’igitsina gabo bakunze kugaraza imyitwarire yo gushaka kuva mu rukundo bari bamazemo igihe gito nta mpamvu ihari igaragara, mu gihe bagenzi babo b’abagore bumvaga aribwo urukundo rugitangira.

Nyuma y’iminsi mike abakundana bahuye baba bahamagarana ubutitsa, ndetse bakanandikirana ubutumwa bugufi uko babonye umwanya, bakumva hatashira icyumweru umwe atabonye undi.

Muri iki gihe ibyiyumviro umwe afitiye undi nta magambo ahagije aba ahari yo kubisobanura kuko aba yumva ko ari we yari ategereje ubuzima bwe bwose.

Nyuma y’iki gihe cy’ibyiyumviro bikomeye by’urukundo, umukobwa akunze gutungurwa no kubona ko imyitwarire y’umusore igenda ihinduka bisa nk’aho atakimushaka kandi mu gihe we yumvaga ari bwo urukundo rugitangira.

Izi ni zimwe mu mpamvu zishobora gutuma umusore mwari mu maranye igihe runaka agenda.

Afite ubwoba bwo kubura ukwishyira akizana

Nubwo kugira umukunzi bishimisha kuko umuntu aba afite umuba hafi mu byiza no mu bibi, ku mugabo iyo abona ibintu bitangiye gufata indi ntera agatangira gutekereza ku bintu ashobora kuzahomba kubera uyu mubano birimo kujya aho ashaka igihe abishakiye, gusohokana n’inshuti ze n’ibindi agenza gake.

Ni byiza ko mu gihe ukundana n’umusore umwereka ko utaje gukuraho ibyo yakundaga no guhagarika ubuzima yabagamo, ahubwo we akazagenda abibona uko iminsi iza ko hari ibyo akeneye guhindura.

Ntashaka kugira umugore

Ikintu gishobora gutera umusore gufata umwanzuro wo kuva mu rukundo ni ukumwereka ko ushaka ko akugira umugore kandi we yumva iyo gahunda atarayigira.

Guhora umubaza gahunda agufiteho cyangwa icyerekezo cy’urukundo nyamara we abona bitaragera kuri urwo rwego bizamusunikira ku kuzajya aguhunga ndetse ashake impamvu izo arizo zose zatuma mutabonana kuko abizi neza ko aribyo ugiye kumubaza. Niyumva atagishoboye kubyihanganira afate umwanzuro wo gukuramo ake karenge.

Ntimuhuje imyemerere n’intego z’ubuzima

Mu gihe umubano ugitangira umusore ashobora kwihanganira bimwe mu bintu adahuza n’umukunzi we kuko yumva ko igihe kimwe kizagera bakabona ibintu kimwe.

Gusa uko iminsi igenda ishira akabona barushaho kudahuza ku ngingo zirimo aho bifuza kuzatura, kuzabyara cyangwa kutabyara, umubare w’abana bifuza kubyara, idini n’ubuzima bazabaho biri mu bituma ashobora gutangira kubona uwo bakundana nk’umuntu badahuje inzozi n’intego z’ubuzima bityo we agahitamo gukuramo ake karenge hakiri kare.

Arambiwe kuba mu buzima bwuzuyemo amarangamutima

Kuba mu rukundo birashimisha ahanini kubera amarangamutima umuntu aba yiyumvamo ,gusa ku gitsina gabo ntibakunda kuba mu Isi yuzuyemo amarangamutima y’urukundo cyane, ibi uzabibona nk’igihe uko mugenda murushaho kumarana igihe kinini inshuro musohokana zigabanuka ndetse n’amagambo y’urukundo akagenda akendera.

Ibi ntibivuze ko aba akwanze ahubwo bivuze ko aba afite ibindi bintu byinshi asigaye aha umwanya cyane. Iyo mutashakanye ukarushaho kugenda umubaza impamvu yahindutse, ibi abibona nk’igitutu akaba yahitamo guhagarika umubano wanyu kandi wowe wumvaga ari bwo ugitangira.

Afite undi mukunzi

Imwe mu mpamvu itera igitsina gabo kuva mu rukundo ni ukugira undi muntu mushyashya bari gukundana.

Umuhanga mu mitekerereze ya muntu Dr Carmen Harra avuga ko uyu ari umuco uhuriweho n’abagabo benshi.

Ati “abagabo benshi baryoherwa no kugira abandi bagore, kandi mbere yo guhitamo umugore umwe batereta benshi, cyane cyane iyo babonye umubano wanya wo bahagarika umubano bagiragana n’abandi bagore”.

Harra avuga ko ushobora kubura umusore mwakundanaga mu gihe gito kubera ko yabonye undi umunyuze ku kurusha.

Igitutu cy’umuryango n’inshuti

N’ubwo urukundo ruba hagati y’umusore n’umukobwa, imigendekere myiza yarwo igirwamo uruhare n’imiryango n’inshuti z’impande zombi.

Ku gitsina gabo iyo mugikundana aba abona utunganye muri byose gusa uko abagize umuryango we n’inshuti ze bagenda bamwereka ibitagenda kuri wowe, na we agenda arushaho kubona ko ashobora kuba yarahubutse cyane, bikaba byamutera kugenda ahagarika umubano wanyu buhoro buhoro.

Hari impamvu nyinshi zishobora gutuma umusore yivana mu rukundo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .