00:00:00 IGIHE NETWORK KN KINYARWANDA EN ENGLISH FR FRANCAIS

Imijyi izakira imikino y’igikombe cy’Isi mu 2026 yamenyekanye

Yanditswe na Mugisha Christian
Kuya 17 June 2022 saa 10:36
Yasuwe :

Ishyirahamwe ry’Umupira w’Amaguru ku Isi, FIFA, ryatangaje imijyi 16 yo muri Amerika y’ Amajyaruguru izakira imikino y’igikombe cy’Isi cya 2026.

Bwa mbere mu mateka yacyo imikino izakinirwa mu bihugu bitatu bitandukanye ndetse yitabirwe n’ibihugu 48 aho kuba 32.

Imijyi 16 izakira iyi mikino irimo Atlanta, Boston, Dallas, Guadalajara, Houston, Umujyi wa Kansas, Los Angeles, Mexico City, Miami, Monterrey, New York, Philadelphia, San Francisco, Seattle, Toronto na Vancouver.

Muri yo harimo 11 yo muri Leta Zunze Ubumwe za Amerika, itatu yo muri Mexico n’ibiri yo muri Canada.

Mu gihe kitaratangazwa FIFA izahitamo imijyi muri 16 izakira imikino yo mu matsinda n’indi izakira imikino yo gukuranamo kugeza ku mukino wa nyuma.

Perezida wa FIFA, Gianni Infantino, yashimiye ubwitange no kwiyemeza byagaragajwe n’iyi mijyi itegerejweho guha ibyishimo abatuye Isi mu 2026.

Mu butumwa yatambukije yagize ati “Aya ni amateka kuri buri wese muri iyi mijyi, ni amateka kuri FIFA, Canada, Amerika na Mexico. Twizeye kuzafatanya twese hamwe mu gutegura iyi mikino izaza mu isura nshya”.

Ku nshuro ya kabiri Amerika izaba yakiriye igikombe cy’Isi nyuma y’aho yacyakiriye bwa mbere mu 1994, ikaba inshuro ya gatatu Mexico yakira iyi mikino aho yayakiriye mu 1970 na 1986.

Bizaba bibaye amateka kuko azaba ari ku nshuro ya mbere imikino y’igikombe cy’isi ikinirwa muri Canada.

FIFA yatangaje imijyi 16 izakira imikino y'igikombe cy'isi cya 2026

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .