00:00:00 IGIHE NETWORK KN KINYARWANDA EN ENGLISH FR FRANCAIS

Imijyi ihenze guturamo muri Afurika

Yanditswe na Léana Bisa
Kuya 4 August 2022 saa 12:46
Yasuwe :

Ntabwo ari ibanga ko Afurika ari umwe mu migabane idahenze kuyibamo, ariko nubwo bimeze gutyo ntibibuza ko hari imwe mu mijyi yo kuri uyu mugabane ihenze ku buryo igiciro cyo kuyibamo cyigereranywa nk’icy’i Burayi cyangwa muri Amerika.

Raporo iheruka gukorwa na Statista, igaragaza ko hari imijyi yo muri Afurika aho ibiciro by’ibyo kurya, iby’inzu, ubuvuzi ndetse n’ibindi bitandukanye bihanitse.

Ikiguzi cyo kuba ahantu runaka kigenwa hagendewe ku biciro by’ibicuruzwa na serivisi ndetse n’icyo abantu batangaho amafaranga menshi.

Dakar, Senegal

Dakar ni Umurwa Mukuru wa Senegal, igihugu giherereye muri Afurika y’Iburengerazuba, gtuwe n’abaturage barenga miliyoni 16.

Raporo yerekanye ko Dakar ariwo mujyi uhenze cyane guturamo muri Afurika. Iri ku isonga ry’uru rutonde kuva mu ntangiriro z’uyu mwaka.

Dakar irahenze cyane kubera ko ibicuruzwa byinshi bitumizwa mu Burayi, ibiryo by’ingenzi n’ibikoresho byo mu rugo nka gaze birahenda cyane kuko byose biba byatumijwe mu mahanga bikagera i Dakar igiciro kiri hejuru. Ni umwe mu mijyi ifite umutekano cyane ariko ninawo mujye uhenze cyane muri Afurika.

Addis Ababa, Ethiopia

Uyu Murwa Mukuru wa Ethiopia uza ku mwanya wa kabiri kuri uru rutonde rw’imijyi ihenze muri Afurika. Addis Ababa ituwe n’abarenga miliyoni eshanu.

Uyu mujye nawo umaze igihe kitari gito ku isonga y’imijyi ihenze muri Afurika. Niwo mujyi uhenda iyo bije ku kugura umutungo nk’inzu cyangwa ikibanza.

Dukurikije igereranya riheruka ibiciro byo gutura muri Addis Ababa ku muryango w’abantu bane buri kwezi ni 2,044 $ mu gihe badakodesha. Umuntu umwe ugereranije ni 622$ buri kwezi hatarimo gukodesha.

Abidjan, Côte d’Ivoire

Umurwa Mukuru wa Cote d’Ivoire uza inyuma ya Addis Ababa,mu mijyi ihenze. Utuwe n’abantu miliyoni eshanu.

Muri Abidjan ibiryo n’ibindi bikoresho by’ibanze umuntu akenera birahenda cyane.

Ikiguzi cyo gutura muri Abidjan kigereranya ko umuryango w’abantu bane buri kwezi ukoresha 2,028 $ mu gihe badakodesha. Ikigereranyo cy’umuntu umwe ni 588 $ buri kwezi mu gihe adakodesha.

Harare, Zimbabwe

Harare ni Umurwa Mukuru wa Zimbabwe, utuwe n’abantu miliyoni ebyiri. Ikiguzi cy’ubuzima muri Harare kiri hejuru cyane kubera ko ibicuruzwa byinshi bituruka mu mahanga, nk’ibiribwa byinshi bitumizwa i Burayi cyangwa muri Amerika.

Umuryango w’abantu bane nibura buri kwezi ukoresha 2,003 $ mu gihe badakodesha, umuntu umwe we akoresha 573 $ mu gihe adakodesha.

Ibikenerwa by’ibanze bya buri kwezi nk’amashanyarazi n’amazi bigera kuri 70 $ ku kwezi.

Johannesburg, Afurika y’Epfo

Johannesburg ituwe n’abantu miliyoni esheshatu, niwo mujyi uhenze cyane muri Afurika y’Epfo.

Igiciro cy’imodoka na lisansi cyiyongereye cyane mu mwaka ushize, bituma ikiguzi cyo kubaho kizamuka bityo amafaranga abaturage bakoresha nayo ariyongera.

Ikiguzi cyo gutura i Johannesburg kingana na kimwe cya kabiri cy’ayo bisaba ngo ube mu mijyi ikomeye i Burayi nka Londres na Paris mu gihe umushahara w’umuturage wo muri Johannesburg uri hasi cyane kurusha uwo muri iyo mijyi.

Pretoria, Afurika y’Epfo

Pretoria iza inyuma ya Johannesburg mu mijyi ihenze muri Afurika, ituwe n’abantu miliyoni ebyiri.

Kugira ngo umuryango w’abantu bane ubashe kubaho muri Pretoria nibura buri kwezi ukoresha angana na 1,934 $ mu gihe badakodesha. Umuntu umwe we akoresha angana na 556 $ mu gihe adakodesha.

Pretoria ihendutse 62,11% ugereranije na New York iza ku isonga ku rutonde rw’imijyi ihenze ku Isi.

Gaborone, Botswana

Gaborone ni Umurwa Mukuru wa Botswana, ituwe n’abaturage barenga ibihumbi 200. Iza inyuma ya Pretoria mu mijyi ihenze cyane muri Afurika.

Umuryango w’abantu bane ukoresha buri kwezi 1,852 $ mu gihe badakodesha. Umuntu umwe we akoresha buri kwezi 513 $ mu gihe adakodesha.

Ugereranyije na Kigali, igiciro cyo kuba muri Gaborone cyiyongeraho 24,94%, gusa ku bijyanye n’ubukode uyu mujye wo urahendutse ugereranyije n’uyu murwa mukuru w’u Rwanda.

Cape Town, Afurika y’Epfo

Raporo ya Statista ivuga ko Cape Town ariwo mujyi wa munani uhenze cyane ku Isi. Ituwe n’abantu barenga miliyoni enye.

Hagereranywa ko umuryango w’abantu bane ukoresha buri kwezi agera kuri 1,879 $ mu gihe badakodesha, umuntu umwe hagereranywa ko akoresha buri kwezi 533 $ mu gihe adakodesha.

Durban, Afurika y’Epfo

Durban iza ku mwanya wa cyenda mu mujyi ihenze muri Afurika, ituwe n’abaturage barenga ibihumbi 500. Umuryango w’abantu bane ukoresha buri kwezi agera kuri 1,906 $ mu gihe badakodesha, umuntu umwe we akoresha 559$ buri kwezi mu gihe nawe adakodesha.

Igiciro cyo kuba muri Durban kiri hejuru ho 24,07% ugereranyije n’igiciro cyo kuba muri Kigali.

Marrakech, Maroc

Ku mwanya wa cumi ku rutonde rw’imijyi ihenze muri Afurika hari Marrakech yo muri Maroc. Ituwe n’abantu barenga miliyoni, izwi cyane kubera ibyiza nyaburanga bikurura ba mukerarugendo nk’Ingoro, imisigiti n’ubusitani bwa cyami.

Buri kwezi umuryango w’abantu bane ukoresha 1,567 $ utabariyemo ubukode, umuntu umwe ku kwezi we akoresha 447 $ nta bukode.

Igiciro cyo kuba muri Marrakech kiri hejuru ho 10.01% ugereranyije n’igiciro cyo kuba muri Kigali.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .