Ibyo wamenya kuri Sentinel y’Amajyaruguru, ikirwa gituwe n’ubwoko bumaze imyaka butavogerwa

Yanditswe na Evariste Nsengimana
Kuya 19 Werurwe 2020 saa 08:31
Yasuwe :
0 0

Ubusanzwe umuntu aho ava akagera akunda kwisanzura, agakorera ingendo mu bice bitandukanye by’Isi ariko akagendera kure agace kabamo inyamaswa z’inkazi, ni gake usanga agira ubwoba bwo kujya ahatuwe n’abandi bitewe n’imico bafite.

Ikirwa cya Sentinel y’Amajyaruguru cyangwa North Sentinel Island mu ndimi z’amahanga ni ubutaka buherereye mu Birwa bya Andaman bibarizwa mu Nyanja y’Abahinde, bungana na kilometero kare 59.67.

Iki kirwa gituwe n’ubwoko bw’abaturage bitwa Aba-Sentinelese bamaze imyaka n’imyaka mu kato, nta wundi muntu uvuye hanze yacyo ukigeraho ngo ahagirire amahoro; abagituye na bo ubwabo ntibajya bahava ngo bajye mu tundi duce.

Ibarura ryakozwe mu 2011 ku mubare w’abaturage bashobora kuba batuye kuri iki kirwa ryagenekereje ko ubu butaka bwashoboraga kuba babarirwa hagati ya 80-150 ariko nanone ngo bashobora kugera kuri 500 cyangwa se bakaba ari nka 15 gusa.

Aba-Sentinele bafitanye isano n’andi matsinda kavukire yo mu Birwa bya Andaman bibarizwa mu Kigobe cy’u Buhinde cya Bengal, babarwa ko bamaze igihe kinini mu bwigunge ku buryo andi matsinda y’ababituye nka Onge na Jarawa n’andi, adashobora no kumva ururimi bavuga.

Inyandiko zanditswe nyuma y’uruzinduko rwakorewe kuri iki kirwa mu 1967 zivuga ko ubu bwoko buba mu tuzu twegeranye dufite ibisenge bigoramye. Ntibahinga ahubwo bivugwa ko batunzwe no kurya amababi n’imbuto zo mu ishyamba.

Inyandiko y’ikinyamakuru Forbes ivuga ko ubwoba abatuye Isi bagirira iki kirwa n’abagituye byakajijwe n’urupfu rw’umukerarugendo w’Umunyamerika, John Allen Chau bikekwa ko wahiciwe ubwo yari yahatembereraga mu 2018 ndetse kugeza n’ubu umubiri we ukaba utarigeze uboneka.

Iki kirwa kuri ubu inkombe zacyo zirindwa n’ingabo zo mu mazi z’u Buhinde nta byambu karemano gifite abantu bakorera ingendo mu mazi bashobora gukukiraho ngo baharuhukire.

Iyo nyandiko ivuga ko mu myaka isaga 200 ishize iki kirwa cyahoze kigerwaho n’abandi bantu batari Aba-Sentinelese ariko ngo urugendo rugasozwa impande zombi bitazigendekeye neza.

Ubu bwoko ngo bwifashishwa ibyuma, imyambi n’amacumu by’ibicurano buhigisha mu kwivuna undi muntu ugerageje kubuvogerwa utari uwo muri ubwo bwoko.

Intandaro yo gutinywa n’abakerarugendo

Mu ijoro rimwe ryo mu 1771 ngo nibwo ubwato bw’Ikigo cy’Abahinde cyakoraga ibijyanye no kubyaza ingufu z’amashanyarazi mu mazi bwabashije kuhagera bwa mbere ariko nta bushakashatsi bwimbitse bahakoze kuko atariyo gahunda yabagenzaga.

Ubu bwoko bwagumye aho nta kibuhungabanya hafi ikinyajana cyose kugera igihe icyo kirwa cyongeraga kugerwaho n’ubwato bw’umucuruzi w’Umuhinde witwa Nineveh, bwari buhetse abantu 86.

Bahamaze iminsi itatu baruhuka nyuma baza kuhirukanwa n’Aba-Sentinele babagabyeho igitero n’intwaro gakondo abandi nabo bagerageza kwirwanaho bakoresheje inkoni ndetse babatera amabuye. Icyo gihe imirwano yarakomeye impande zombi ngo ziza gukiranurwa n’ingabo zo mu mazi z’u Buhinde.

Nyuma u Bwongereza bwaje gutangaza ko iki kirwa kiri mu bice bwakolonije, byahawe agaciro kugera mu 1880 ubwo umusirikare w’ingabo zirwanira mu mazi witwa Maurice Vidal Portman yigaruriraga Ibirwa bya Andaman na Nikobari.

Izo ngabo zikihagera ubu bwoko bwagize ubwoba buzifata nk’abacengezi babwinjiyemo butangira gushaka aho bujya kwihisha ariko umuryango umwe w’abana bane muri ubwo bwoko wegera izo ngabo zihita ziwujyana.

Uwo muryango ntabwo wahiriwe no kuba ku bundi butaka kuko nyuma y’iminsi mike baje gufatwa n’indwara batazi, umugore n’umugabo barapfa, abasirikare bigira inama yo gusubiza abo bana kuri icyo kirwa.

Icyo gihe byarangiye izo ngabo nazo zitamenye intandaro nyamukuru yo gutuma ubu bwoko butiyumvamo abandi bantu ariko zikeka ko bushobora kuba butabashaka kuba ahandi hantu igihe kinini.

Mu 1896 umwe mu mfungwa zo mu kindi kirwa cya Andaman nawe yagerageje gutorokera muri aka gace ariko nyuma y’iminsi mike ahatorokeye haje gutoragurwa ibisigazwa by’umubiri byuzuye ibikomere bigaragaza ko ashobora kuba yarishwe ateraguwe imyambi n’amacumu ndetse akaswe ingoto.

Nyuma y’icyo gihe, u Bwongereza bwasabye ko ubwoko bw’Aba- Sentinelese babureka, bukiberaho mu bwisanzure.

Mu 1970 u Buhinde bumaze kubona ubwigenge bwafashe icyemezo cyo gushyira mu kato abatuye kuri iki kirwa n’ubushakashatsi bwakorwaga nta makuru afatika avuga ku mateka y’abahatuye.

Mu 1975 Umwami Leopold III w’u Bubiligi na we yagerageje kugera kuri iki kirwa ariko aburirwa ko azakirizwa imyambi, amacumi n’imiheto birangira afashe icyemezo cyo kuhareka.

Sentinel y’Amajyaruguru ni ikirwa gituwe n’ubwoko bumaze imyaka mu kato kandi butavogerwa
Iki kirwa nta muntu upfa kukivogera uko yiboneye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza