00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya kuri Gliese 12 b, umubumbe umeze nk’Isi wavumbuwe

Yanditswe na Nshuti Hamza
Kuya 29 May 2024 saa 11:01
Yasuwe :

"Ni ivumbura rishimishije kandi rizafasha ubushakashatsi bwacu ku byerekeye imibumbe isa n’Isi mu mibumbe igaragiye Izuba", aya ni amagambo ya Dr Thomas Wilson, umushakashatsi akaba n’inzobere mu bijanye n’imibumbe, wigisha muri Kaminuza ya Warwick, mu Bwongereza.

Ni nyuma y’uko we na bagenzi be bari bamaze kuvumbura undi mubumbe ujya kumera nk’Isi, wiswe Gliese 12 b, ku buryo hemezwa ko umuntu yawuturaho.

Ni ubushakashatsi bwagizwemo uruhare n’Ikigo cy’Abanyamerika gishinzwe iby’Isanzure, NASA, ndetse n’Urwego rw’Ubumwe bw’u Burayi rushinzwe iby’isanzure, ESA.

Amakuru yakusanyijwe n’ibyogajuru bya NASA n’ibya ESA ni yo yifashishijwe n’abashakashatsi mu kugaragaraza ubushyuhe n’ingano bya Gliese 12 b, ndetse n’intera irimo uvuye ku Isi.

Abo bashakashatsi bagaragaje ko imiterere ya Gliese 12 ijya kumera nk’iy’Isi ku buryo abantu bashobora kuwuturaho, ndetse ko ubushyuhe bwawo budahambaye kuko bwagereranyijwe n’ubwo u Bwongereza bwagize mu 2022.

Mu 2022 nibwo u Bwongereza bwagize ubushyuhe buri ku gipimo cyo hejuru cyane, aho bwageze kuri dogeré Celsius 40.3 ku wa 19 Nyakanga.

Gliese 12 yo ifite ubushyuhe bwa dogere Celsius 42. Izenguruka Izuba iminsi 12.8, ikaba ingana n’Isi mu bunini.

Ni umubumbe w’urutare nk’uko Isi na Vénus bimeze, ibituma uba ahantu heza ho gukorera ubushakashatsi ku mibumbe y’urutare ifatwa nk’aho ubuzima bwa muntu bushoboka.

Kuba uwo mubumbe uri mu ntera ya kilometero miliyari 400 uvuye ku Isi, abashakashatsi basanga ari inzitizi ku kuba bamenya amakuru ahagije kuri uwo mubumbe.

Nk’ubu bagaragaza ko bataramenya imiterere y’ikirere cyawo.

Icyakora imibumbe iteye nka Gliese 12 b ni mike kandi iri kure cyane y’Isi, uwo akaba ari wo nibura ujya kungana n’Isi mu bunini, ukagira n’ubushyuhe abantu basanzwe bahura nabwo ku migabane itandukanye.

Abo bashakashatsi bavuga ko kwiga umubumbe umwe gusa mu buryo bwimbitse kugira ngo bamenye ikirere n’ubushuye byawo ari ibintu bidakunze gushoboka.

Ikirere cya Gliese 12 b cyitezweho gufasha kumenya amakuru y’uko imibumbe imwe n’imwe yagiye ihinduka ikaba ifite imiterere yemerera abantu kuba bahatura.

Uyu mubumbe unitezweho gufasha gusobanura uko imwe mu mibumbe igaragiye Izuba yagiye ibaho.

Nubwo Gliese 12 b na Vénus itanga icyizere cyo kuba umuntu yayituraho, Isi ni yo ifatwa nk’umubumbe abantu baturaho mu buryo budahangayikishije.

Ibyo biterwa n’uko ibonekaho amazi n’umwuka wo guhumeka, ikaba iri mu ntera iboneye uvuye ku Izuba, ifite akayunguruzo kayirinda ingaruka z’imirasire y’Izuba, ikagira ibinyabutabire bifasha ibinyabuzima kuyibaho, ndetse ikirere cyayo kikagira ubushyuhe mu buryo bwihariye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .