00:00:00 IGIHE NETWORK KN KINYARWANDA EN ENGLISH FR FRANCAIS

Ibyo abantu bakunze kwicuza mbere yo gupfa

Yanditswe na Sonia Umuhoza
Kuya 15 July 2022 saa 05:29
Yasuwe :

Abantu bakunda gutakaza umwanya wabo iyo bakiri ku Isi, bagakora ibyo bashaka rimwe na rimwe byiganjemo guhemuka n’ibindi bitandukanye bibi. Gusa iyo bari hafi yo gupfa, ukunze gusanga hari ibintu bitandukanye bicuza, bakifuza ko ibihe bisubira inyuma kugira ngo bisubireho ariko bitagishoboka.

Igitabo cyanditswe n’umuforomokazi Bronnie Ware wo muri Australia mu 2009 yanditse igitabo cyitwa “Top five regrets of dying” gikubiyemo ibisubizo yasubijwe n’abarwayi yavuraga ubwo bendaga gupfa.

Twifashishije icyo gitabo tugiye kurebera hamwe ibintu icyenda abantu bari hafi gupfa bicuza, byiganjemo ibyo bakoze batarakagombye kubikora, n’ibyo batakoze kandi byari bikwiriye.

Bicuza kwirengagiza abo bafitanye isano

Kera tukiri mu mashuri yisumbuye, hari umukecuru wigeze kuza gusura umukobwa we ariko ntibabonana, bitewe n’uko umukobwa yamwihakanye, akavuga ko uwo mukecuru usa nabi kandi bigaragara ko akennye, atari we mubyeyi we.

Iyo umuntu akiri muto ashobora kumva ibi ntacyo bitwaye, ugasanga umuntu ni umukire i Kigali no mu yindi mijyi, ariko n’iyo yabonye akaruhuko mu minsi atakozemo, ntashobora gusimbuka ngo asubire mu cyaro ku ivuko asure ababyeyi, abaturanyi n’abandi bavandimwe, wenda ibyo bikazabaho agiye gushyingura cyangwa mu birori nk’ubukwe.

Kenshi iyo umuntu akiri muto, ashobora gutekereza ko ibi ntacyo bitwaye, ariko iki ni kimwe mu bintu by’ibanze abantu benshi bicuza iyo bagiye gupfa.

Ibi bishingira ku kuba abantu ba hafi barimo abo mufitanye amasano, aria bantu baba bafite agaciro gakomeye mu buzima bwawe, ku buryo kubirengagiza no kutabafasha mu gihe ubishoboye, kenshi birangira ubyicujije kuko mu mpera z’ubuzima, nibwo umuntu abona neza ibifite agaciro nyakuri.

Bimwe mu byo abantu bicuza birimo kuba bataretse urukundo abavandimwe babo n’abandi bantu bafitanye isano. Niba uri gusoma iyi nkuru, ukaba uri muri iki cyiciro, watangira gutekereza ku buryo wajya umarana umwanya n’abantu mufitanye isano.

Bicuza kumara umwanya munini bakora

Gukora umuntu ashaka iterambere ntabwo ari bibi na gato, ndetse ni byiza cyane. Icyakora ikibi ni ugukora ukarenza urugero, ibishobora no kugira ingaruka ku buzima bwawe.

Nk’urugero, uri umubyeyi ufite abana, icyakora akazi ukora ukamaramo amasaha menshi ku buryo hari ubwo iminsi itanu yihirika utarabona umwana wawe, kuko utaha yaryamye ubundi ukazinduka atarabyuka.

No muri weekend, igihe witwa ko waruhutse, ushobora kutamuha umwanya, ahubwo ugasanga uhugiye muri telefoni, ubundi uri kureba televiziyo n’ibindi birangaza, bikagera aho umwana atangira kukwihunza kuko atajya abona umuha umwanya.

Nubwo impamvu witwara gutyo ishobora kumvikana, kuko uba uri gukorera umuryango wawe ku buryo n’uwo mwana azagira ubuzima bwiza, ntabwo bikwiriye kuko kumarira umwanya wawe wose mu kazi, mu kabari no mu bind ink’ibyo, ukibagirwa umuryango wawe, atari ibintu byiza.

Ntabwo ari ibanga ko imikorere yo muri iyi minsi isigaye igoye, abantu bari gukora iminsi myinshi n’amasaha menshi, gusa ibi byose ntibikwiriye gutuma uburira umwanya abantu ba hafi yawe, kuko ari kimwe mu byo ushobora kuzicuza mu bihe biri imbere.

Nibyo rwose uzakora ukire ubone amafaranga, ariko n’ubundi kuyisangiza ntibizigera bikuryohera, ari nayo mpamvu kumarana umwanya n’abantu ba hafi yawe, kuva ku bagize umuryango wawe n’inshuti zawe, ari iby’agaciro.

Bicuza kudafata inshingano

Uribuka wa mushinga wabitse wanze gukora, kubera ko utinya ko hari igihe wakunanira, cyangwa se wanawushobora bikagenda nabi mu buryo utatekereje.

Kugira ubwoba bwo gukora ibintu bishobora kukigirira akamaro, kubera impamvu zirimo gutinya ko byazanga, cyangwa utazabishobora n’ibindi nk’ibyo, ni ibintu abantu bakunze kwicuza cyane.

Niba ufite umushinga cyangwa ikindi gitekerezo wifuza gushyira mu bikorwa, gikore mu gihe ubona bishoboka. Niba bitanashoboka, bitegure ku buryo bizashyirwa mu bikorwa mu gihe kiri imbere.

Bicuza kudafata igihe cyo kwishimisha

Ni ryari uheruka gukora ikintu kigushimisha, ukagira atari uko ari inshingano ahubwo nyine ugamije kwishimisha? Hari abantu bamara igihe badakora ibintu bibashimisha kugira ngo wenda bizigamire amafaranga n’izindi mpamvu.

Icyakora ibi ntabwo bikwiriye, mu buzima biba ngombwa gukora ibintu bigushimisha. Ushobora kuba ukunda gutembera, ukaba uri guhiga kuzajya Maldives n’ahandi nk’aho, ariko wenda utarabona ubushobozi.

Gusa ushobora no kugira gutya ugafata umwanya runaka ugatemberera aho ubushobozi bwawe bushobora kukugeza, nubwo byagusaba kugenda n’amaguru.

Niba ukunda kureba umupira, ukaba wifuza kuzajya kureba Real Madrid na Manchester United, mu gihe utarabona ubwo bushobozi ntibyakubuza kureba Rayon Sports na APR FC, cyangwa se n’ayo ukunda ukayarebera kuri televiziyo.

Muri make ntabwo kwishima bisaba kuba ufite byose, ushobora no gukoresha bike ufite kandi ukishima.

Bicuza kuba batarageze ku nzozi zabo

Buri muntu ku Isi afite inzozi. Icyakora kugera ku nzozi zawe biraharanirwa. Abantu benshi iyo bagiye gupfa bicuza impamvu batigeze bagerageza kugera ku nzozi zabo.

Ibi kenshi usanga byaratewe n’ubwoba bw’uko bidashoboka, cyangwa bigaterwa no kwanga kwishyira mu bibazo, bava mu buzima bwiza bari barimo.

Nk’urugero, usanga niba umuntu yifuza kuzikorera ku giti cye, ashobora kwanga kubikora kuko atifuza kureka akazi ke, ibishobora gushyira ubuzima bwe mu kaga. Ibi ni ibintu ushobora kuzicuza, bikaba byiza buri gihe gukora iyo bwabaga ugaharanira kugera ku nzozi zawe.

Bifuza ko bari kwiyitaho neza

Ujya wumva bakubwira kuryama amasaha umunani ku munsi, ukarya neza, ukareka inzoga nyinshi n’itabi, ugakora siporo n’ibindi bituma ugira ubuzima bwiza.

Uzasanga ibi bishoborwa na bake, icyakora uku kutiyitaho ni kimwe mu bintu abantu bashobora kwicuza, cyane cyane nk’iyo barwaye, ugasanga kenshi ibyo barwaye ni umusaruro w’uko batafashe ubuzima bwabo neza.

Bicuza kuba batarakoze akazi kajyanye n’impano zabo

Abantu benshi bakora akazi batishimiye, kuko baba bifuza gukora ibyo bahemberwa gusa. Icyakora ibi bituma abantu bicuza. Ni ngombwa kugerageza kubyaza umusaruro ibintu ukunze, bikaba ari nabyo bigutunga.

Nk’urugero, niba ukunda gusoma ibitabo, ushobora gutangira guteganya uburyo mu myaka iri imbere, ushobora kuzabeshwaho n’ibitabo ucuruza, kuko nawe ubikunze.

N’iyo ibyo ukunze bitaba ari ibintu biguha inyungu, ni byiza kubigenera umwanya ukabikora, kuko bigufasha kugira ibyishimo byuzuye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .