00:00:00 IGIHE NETWORK KN KINYARWANDA EN ENGLISH FR FRANCAIS

Ibisobanuro by’ibimenyetso bikoreshwa cyane n’abakomeye mu gutanga ubutumwa

Yanditswe na Iradukunda Jean de Dieu
Kuya 12 June 2022 saa 09:13
Yasuwe :

Abanyapolitiki n’abandi bantu bakomeye bakunze kugaragara batanga imbwirwaruhame bakoresha bimwe mu bice by’umubiri nk’intoki ndetse n’isura cyane mu gutanga ubutumwa.

Abahanga bagaragaza ko uburyo bwo gutanga ubutumwa hakoreshejwe ibimenyetso by’umubiri umuntu atavuze byihariye 50% mu gihe ijwi cyangwa uburyo witwara mu mivugire biri ku rugero ruri munsi ya 10%.

Dukunze kubona abanyapolitiki cyangwa abandi bantu bakomeye batanga imbwirwaruhame ariko banakoresha ibimenyetso by’amarenga.

Ibi bimenyetso akenshi biba bigaragaza uko utanga imbwirwaruhame yiyumva imbere y’abamureba, gutanga ubutumwa runaka cyangwa kwigarurira amarangamutima y’abamukurikiye.

Dore bimwe mu bimenyetso bikunze gukoreshwa n’abanyapolitiki n’abandi bakomeye n’icyo bisobanura.

  Gupepera hakoreshejwe ikiganza: Iki ni ikimenyetso cyo kwerekana ubucuti hagati y’umuyobozi n’abo ashaka guha ubutumwa kugira ngo bamwisangemo n’ibyo ashaka kubabwira babyakire neza.

  Gufunga igipfunsi ukuboko ukwerekeje ku bagukurikiye: Iki kimenyetso gisobanura ko umuyobozi ugikoresha aba afite ingingo runaka yihariye kandi y’ingenzi ashaka kugeza ku bamukurikiye kandi igomba kumvikana neza.

Iki kimenyetso kinafite igisobanuro kimwe no kuzamura intoki eshatu maze urw’igikumwe na mukubita rukoko zigafatana zigakora akaziga. Aha umuyobozi aba ashaka ko abamukurikiye batekereza cyane ku cyo agiye kuvuga.

  Kurambura amaboko ibiganza byerekeje hejuru: Bisa nka kwa kundi padiri arambura ibiganza asoma misa. Iki ni ikimenyetso cyerekana ko umuyobozi cyangwa undi ugiye gutanga imbwirwaruhame muri we yemeye kwirekura kandi akaba umunyakuri mu byo ari kuvuga.

  Kurambura amaboko ibiganza ubyerekeje hasi: Ni ikimenyetso cyerekana icyizere n’ububasha umuyobozi afite. Gishobora kuba kandi kigaragaza ko ushingiye ku cyizere gihambaye utagomba kwemera ibitekerezo by’abandi kabone n’aho baba bakurusha ububasha. Ubusanzwe gikoreshwa mu guturisha abaguteze amatwi.

  Kuzamura igipfunsi: Ni ikimenyetso cyo kuzamura igipfunsi cy’ukuboko kw’iburyo gisobanura ngo “Ibi twabikora”. Aha umuyobozi aba atanga icyizere mu byo avuga. Gishobora no kuba ikimenyetso cy’uburakari n’umujinya ku bayobozi bamwe na bamwe.

  Kuzunguza intugu: Kuvuga umuntu azunguza intugu mu ruhame byerekana ko uri mu kiganiro runaka cyangwa uri gutanga imbwirwaruhame adatuje muri we. Ibi bikaba byagaragara nko gutsindwa.

  Kuvuga ikiganza cy’iburyo gifashe ku gituza ku gice cy’umutima: Ni ikimenyetso gisobanuye ko umuyobozi ibyo avuga mu ruhame biba bivuye ku mutima cyangwa yemeranywa n’ikintu runaka.

  Kuzamura ikiganza ariko gihengamye: Aha uvuga aba yarambuye intoki asa n’aho yereka abamukurikiye inzira. Iki kimenyetso abanyapolitiki bakoresha bashaka kuvuga ku ngingo runaka bizeye neza ku buryo biba bigoye kugira ngo babe bayihinduraho ibitekerezo.

  Gutunga urutoki: Ni ikimenyetso gifite ibisobanurea bitandukanye ku bayobozi bitewe n’aho bagikoresheje n’uburyo bagikoreshamo. Gutunga urutoki bishobora gusobanura ko umuyobozi atemeranya n’igitekerezo runaka mu buryo bweruye bikamutera uburakari mu maso he hagahinduka.

Kimwe ni uko bishobora gufata nk’ikimenyetso cyo kumva utuje muri wowe kandi wifitiye icyizere nk’uko tubibona bamwe mu bayobozi batunga urutoki mu bantu mbere yo gutangira kuvuga.

Guhuza intoki z’ibiganza byombi: Ukora iki kimenyetso ahuza intoki zo ku kiganza cy’iburyo n’icy’ibumoso uhereye ku gikumwe kugera ku gahera, intoki zisa n’izireba hasi.

Iki kimenyetso kigaragaza ko umuyobozi afite icyizere n’ubumenyi ku ngingo runaka aba agiye kuvuga.

Gusobekeranya amaboko: Ni ikimenyetso wagereranya no kwifata nka marayika, amaboko ari asobekeranye, ahagana mu gituza. Gisobanurwa nk’aho umuyobozi runaka aba atemeranya neza n’ibyo mugenzi we ari kuvuga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .