00:00:00 IGIHE NETWORK KN KINYARWANDA EN ENGLISH FR FRANCAIS

Ibirenge bya Pelé bishobora kubikwa mu nzu ndangamurage ya FIFA

Yanditswe na Iradukunda Olivier
Kuya 2 Mutarama 2023 saa 08:28
Yasuwe :

Ishyirahamwe ry’umupira w’amaguru ku Isi, FIFA ryasabye uburenganzira umuryango wa Pelé, bwo kugumana ibirenge bye bikajyanwa mu nzu ndangamurage yayo.

Amakuru y’urupfu rw’Umunya-Brésil, Edson Arantes do Nascimento wamamaye nka Pelé, rwamenyekanye ku mugoroba wo ku wa Kane, tariki ya 29 Ukuboza 2022.

Uyu musaza witabye Imana afite imyaka 82, yajyanywe mu bitaro ku wa 29 Ugushyingo nyuma yo kugira ikibazo mu buhumekero no kugira ngo akurikiranwe ku burwayi bwa kanseri yasanzwemo muri Nzeri 2021.

Gusa yaje kubura ubushobozi bwo guhangana na yo, ahubwo nyuma umuryango we utangaza ko yamaze kutuvamo. Nyuma y’urupfu rwe havuzwe byinshi bigaruka ku kumuha agaciro no kubika amateka ye bigoye kuzakuraho mu mupira w’amaguru.

Edson Arantes do Nascimento wamamaye nka Pelé afatwa nk’umukinnyi wa mbere wabayeho mu mateka ya ruhago ku Isi.

Yakinnye Igikombe cy’Isi inshuro enye, agitwara inshuro eshatu zirimo mu 1958, mu 1962 no mu 1970 aho yatsinzemo ibitego 12 mu mikino 14. Yatsinze ibitego 1281 mu mikino 1363 yakinnye nk’uwabigize umwuga.

Kubona amateka ye akwiye kwigirwaho na benshi, haba mu yo yandikiye mu ikipe y’igihugu ya Brésil cyangwa mu Santos, FIFA yasanze hakwiye urwibutso kuri ayo mateka.

Abakurikiranira hafi ibikorwa by’iri Shyirahamwe, bemeza ko bashyize imbaraga mu kubika amateka ye.

Nubwo imbaraga zose ziri gushyirwa mu kubika ibirenge bye, haribazwa niba ari byo koko bagakwiye kubimukuraho, agashyingurwa ntabyo afite cyangwa hatashakwa ubundi buryo amateka ye yabikwa.

Nubwo abatari bake bakomeje kutemeranya n’icyo cyemezo cyo kumukuraho ibirenge, umuryango wa nyakwigendera wo wamaze guha uburenganzira FIFA bwo kubika ibi birenge ku buryo bitazangirika, bigaterwa imiti ituma bikomeza kubaho igihe kirekire.

FIFA irashaka kubibika mu gihe uyu mugabo yamaze gusiga ibindi bimenyetso byabyo, kuri Stade Maracana iri mu mujyi wa Rio de Janeiro, bigaragaza uko byari biteye.

Ibi bimenyetso biri hamwe n’iby’umutoza Arthur Antunes Zico wabahaye igikombe cy’Isi cyo mu 1986 yaranayikiniye, Ronaldinho Gaúcho n’abandi banyabigwi.

Ibivugwa byose, umubiri wa Pelé uzashyirwa hagati mu kibuga kuri Urbano Caldeira Stadium ikinirwaho na Santos, kuri uyu wa Mbere tariki ya 2 Mutarama 2023, aho inshuti, imiryango n’abakunzi b’umupira w’amaguru bazawusanga bakawusezeraho bwa nyuma.

Nyuma yo gusezerwaho mu gihe cy’amasaha 24, azajyanwa mu irimbi rifite amateka yo kuba ariryo rya mbere rirerire ku Isi ryitwa “Memorial Necropole Ecumenica”.

Ibirenge bya Pele byanditse amateka akomeye mu mupira w'amaguru
FIFA irashaka gusigarana ibirenge bya Pele bikajyanwa mu nzu ndangamurage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .