00:00:00 IGIHE NETWORK KN KINYARWANDA EN ENGLISH FR FRANCAIS

Ibintu birindwi ukwiye kumenya kuri Commonwealth

Yanditswe na Zigiranyirazo Bajecteur
Kuya 7 May 2022 saa 08:34
Yasuwe :

Commonwealth, ni Umuryango uhuriwemo n’ibihugu 54 bikoresha ururimi rw’Icyongereza washinzwe ku ikubitiro n’ibihugu birimo Australia, Canada, u Buhinde, Nouvelle-Zélande, Pakisitan, Afurika y’Epfo, Sri Lanka n’u Bwongereza.

Hari ibintu birindwi by’ingenzi ukwiye kuba uzi kuri uyu muryango wa Commonwealth mu gihe habura iminsi mike ngo abakuru b’ibihugu byawo bateranire i Kigali mu nama.

Umuryango wa Commonwealth watangiye mu 1949, umaze imyaka 73. Uhuza ibihugu 54 byo ku migabane yose yo ku isi. Ibihugu byo muri Commonwealth bihuzwa no guharanira inyungu bihuriyeho, ari zo guteza imbere amahoro na demokarasi, kubungabunga ibidukikije ndetse n’amajyambere.

Hafi kimwe cya gatatu cy’abatuye Isi babarizwa muri uyu muryango

Mu baturage bagera kuri miliyari 7,9 bari ku Isi, hafi miliyari 2,6 ni abanyamuryango ba Commonwealth aho abari hafi kugera kuri kimwe cya kabiri ari abaturage b’u Buhinde.

Pakistan igwa mu ntege u Buhinde, hagakurikiraho Nigeria na Bangladesh mu gihe u Bwongereza buza ku mwanya wa gatanu mu kugira abaturage benshi muri uyu muryango.

Abanyamuryango babiri ntabwo ari ibihugu byakolonijwe n’u Bwongereza

U Rwanda ni kimwe mu bihugu bibiri (Ikindi ni Mozambique) biri muri uyu muryango bitakolonijwe n’u Bwongereza. U Rwanda rwinjiye muri uyu muryango mu 2009 mu gihe Mozambique yinjiye mu 1995.

Hari abandi bagiye bikuramo aho nko mu 2003 Perezida wa Zimbabwe, Robert Mugabe, yafashe umwanzuro wo kuvana igihugu cye muri uwo muryango.

Zimbabwe mu 2018 yanditse isaba kongera kwemererwa kuba umunyamuryango ariko kugeza none nta cyemezo kirabifatwaho.

Pakistan yigeze guhagarikwa nyuma ya Coup d’état ya gisirikare yo mu 1999 ariko iza kongera gukomorerwa hashize imyaka itanu.

Ni na ko kandi byagenze mu 1961 kuri Afurika y’Epfo ubwo iki gihugu cyanengwanga na Commonwealth ku myitwarire yacyo mu bikorwa by’irondaruhu ariko kiza kongera kwemererwa mu 1994.

Maldives ni yo yaherukaga gusezera, hari mu 2016 icyakora mu 2020 yaje kongera kugaruka bushya muri uyu muryango.

Umwamikazi afatwa nk’Umuyobozi w’Ikirenga mu bihugu 15 mu bigize uyu muryango

Umwamikazi mu Bwami bw’Abongereza, afatwa nk’Umuyobozi w’Ikirenga mu bihugu 15 mu bigize Commonwealth.

Muri uyu muryango ibihugu bitanu aribyo Lesotho, Eswatini, Brunei Darussalam, Malaysia na Tonga, biyoborwa n’abami.

Kugeza ubu, Umwamikazi w’u Bwongereza ni we ugifatwa nk’Umuyobozi w’Ikirenga muri Australia na Canada nubwo muri Australia bakomeje inzira yo gushaka guhinduka repubulika yigenga.

Barbados yo iherutse gutangaza ko Elizabeth II atakiri we muyobozi mukuru bituma ku buryo ubu iki gisigaye gifatwa nka repubulika.

Ni umuryango uri ku butaka bugari

Commonwealth ibarizwa kuri kimwe cya kane cy’ubutaka rusange bw’Isi aho kimwe mu bihugu bibarizwamo ari Canada gisanzwe kiri ku mwanya wa kabiri mu bihugu bifite ubuso bunini ku Isi.

Ni mu gihe u Buhinde na Australia nabyo ari bimwe mu bihugu binini kuri uyu mubumbe dutuye.

Nubwo bimeze bityo ariko, uyu muryango unabarizwamo bimwe mu bihugu bifite ubuso buto ku Isi nk’ibihugu byo mu birwa bya Pacifique, Nauru, Samoa, Tuvalu na Vanuatu tutibagiwe n’ibihugu bibarizwa mu birwa bya Craïbes nka Dominica, Antigua na Barbuda.

U Bwongereza ku isonga mu bukungu muri Commonwealth

Imibare igaragazwa n’Ikigega Mpuzamahanga cy’Ubukungu (FMI), igaragaza ko u Bwongereza ari cyo gihugu gifite umusaruro mbumbe munini mu bigize Commonwealth.

Abakurikiranira hafi bavuga ko mu myaka itanu iri imbere u Buhinde buzaba bwamaze kwigaranzura bukajya ku mwanya wa mbere.

Ubusanzwe mu bihugu 54 bigize uyu muryango, imibare yerekana ko umusaruro mbumbe rusange ari miliyari zirenga ibihumbi 10$, u Bwongereza bufitemo izigera ku bihumbi bitatu.

Uyu musaruro mbumbe rusange w’ibi bihugu ukubye kabiri uw’u Buyapani icyakora ukaba hasi ugereranyije n’uwa Leta Zunze Ubumwe za Amerika zo zibarirwa ungana na miliyari ibihumbi 23$.

Uyu muryango wahinduye izina

Umuryango uvuguruye wa Commonwealth wabayeho mu 1949 kuko mbere wakoreshaga izina rya “British Commonwealth of Nations”. Icyo gihe wayoborwaga n’Umwami George VI afatanyije n’Umwamikazi Elizabeth II.

Imiyoborere yawo ntishingiye ku buryo bw’umurage n’uruhererekane rw’umuryango icyakora byitezwe ko Igikomangoma cya Wales, Charles ari we uzaba Umwami akanakorera mu ngata Umwamikazi Elizabeth II ku buyobozi bw’uwo muryango.

Si wo muryango wonyine witwa Commonwealth

Mu 1991 u Burusiya hamwe n’ibihugu babanaga mu Muryango w’Ubumwe bw’Abasoviyete, bwashinze umuryango uhuriyemo leta zigenga uzwi nka “Commonwealth Independent States”.

Mu bindi wamenya kuri uyu muryango harimo ko:

 60% by’abagize uyu muryango ni urubyiruko ruri munsi y’imyaka 30.
 Uruherekane rw’ibicuruzwa hagati y’ibihugu bigize Commonwealth bingana na 20% by’ubucuruzi bwose bwo ku Isi.

Commonwealth ni umuryango wiganjemo ibihugu byakolonijwe n'u Bwongereza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .