Hamwe mu hantu hafite imiterere n’amateka atangaje ku Isi

Yanditswe na Iradukunda Serge
Kuya 15 Gashyantare 2020 saa 03:13
Yasuwe :
0 0

Kuri iyi si, hari uduce tumwe na tumwe tumenyekana kubera imiterere yatwo idasanzwe, ku buryo uhageze bimugora kwemera niba ibyo ari kubona ari byo cyangwa niba ari filimi z’amakabyankuru ari kureba.

Kuba aha hantu haba hagaragara nk’ahadasanzwe bituma abantu bahatinya, ahandi hagakurura ba mukerarugendo bitewe n’umwihariko bahabonamo.

Imiterere y’aha hantu imwe yagiye igirwamo uruhare n’ibikorwa bya muntu ahandi hakaba ari yo miterere yaho kamere.

Tumwe mu duce dutangaje ku Isi

Ikirwa cy’ipusi

Iki kirwa cy’ipusi cyangwa se Cat Island giherereye mu Buyapani, igitangaje kuri iki kirwa ni uko kigaragaraho umubare munini w’ipusi, ibintu bikunze gutungura ba mukerarugendo bagisura.

Mu ntangiriro ipusi zazanywe kuri iki kirwa kugira ngo zifashe abarobyi kurwanya imbeba nyinshi zakibagaho, ni uko izi pusi zigenda zororoha kugeza aho umubare wazo uruse uw’abantu.

Chocolate hills

Iyi misozi itazirwa iya Chocolate iherereye ku kirwa cya Bohol muri Philippines. Aga gace ntigasanzwe kubera umubare munini w’udusozi tuhagaragara kandi twegeranye.

Ikirushaho gutangaza abahasura ni uburyo utu dusozi tugera ku 1700 tungana haba mu mubyimba no mu butumburuke.

Utu dusozi twa 'chocolate hills' dukunze gutangaza abantu kubera imiterere yatwo

Ikiganza kiri mu butayu

Abasura Chile bakunze gutangazwa n’ikiganza kinini kiri mu butayu bw’Atacama, buherereye mu bilometero bike uvuye mu mujyi wa Antofagasta.

Iki kiganza cyakozwe n’umunyabugeni witwa Mario Irarrázabal, ashaka kugaragaza ukwigunga kuba mu butayu.

Iki kiganza ni kinini ku buryo aho umuntu ari hose muri ubu butayu abasha kukibona

Imisozi ya Tianzai

Mu by’ukuri ntawuzi impamvu iyi misozi iherereye mu Majyaruguru ashyira Uburasirazuba bw’igihugu cy’u Bushinwa mu ntara ya Hunan yiswe Tianzi bisobanuye umuhungu w’ijuru, gusa abayisura bose batungurwa n’imiterere yayo.

Ni imisozi miremire iteye mu buryo bujya kumera nk’inkingi hasi aho itangirira ikaba imeze nk’ihagaze mu ishyamba, umwihariko w’iyi misozi ni uko imiterere yayo ari yo yagendeweho bategura uko ahantu hazakinirwa filimi ya Avatar hazaba hasa.

Iyi misozi y Tianzai ifite imiterere idasanzwe

Thor’s Well

Uyu mwobo uherereye muri Oregon muri Leta Zunze Ubumwe za Amerika ukunze gutazirwa amarembo agana ikuzimu (gate to hell).

Ni umwobo uri hagati mu mazi ukaba wirohamo amazi yo mu nyanja ya Pacifique, abahanga bavuga ko uyu mwobo watangiye ari ubuvumo bwakozwe n’amazi ariko nyuma ubuso bwawo nabwo bukaza kurigita, ibi akaba ari bwo bituma mu gihe cy’umuhengeri amazi awinjiramo aturutse hasi agasohokera hejuru.

Thor's well ikunze gutera ubwoba abayigezeho

Kirisito w’iya Abyss

Christ Of The Abyss ni ikibumbano cya Yesu gikoze muri bronze giherereye mu gihugu cy’u Butaliyani.

Igitangaje kuri iki kibumbano gifite metero 2.5 z’ubuhagarike ni uko giherereye munsi y’amazi.

Iki kibumbano cya Yesu kiri munsi y'amazi gikunze kwibazwaho na benshi

Ikiyaga cya Reschen

Ni ikiyaga kiri mu Butaliyani mu gace ya Tyrol y’Amajyepfo, igitangaje kuri iki kiyaga ni uko aha kiri hahoze ari umujyi utuwe n’abantu ariko mu kinyejana cya 14 ubwo hafi yaho hubakwagwa urugomero aka gace nako kaje kurengerwa ubu igisigaye kigaragara ni agasongero k’inzu imwe yari ndende.

Aho iki kiyaga cya Reschen kiri hahoze umujyi utuwe n'abantu

Umusozi ufite rukuruzi

Ni agasozi gaherereye mu gace ka Ladakh mu Buhinde gafite ubushobozi bwo gukurura imodoka iri mu muhanda uri hafi yako mu gihe yaba izimije.

Aka gasozi gafite ubushobozi bwo gukurura imodoka ikaba yagendera ku muvuduko wa kilometero 20 ku isaha.

Uyu musozi wa rukuruzi ufite ubushobozi bwo gukurura imodoka ku muvuduko wa kilometero 20 mu isaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza