00:00:00 IGIHE NETWORK KN KINYARWANDA EN ENGLISH FR FRANCAIS

Gusomera mu mwijima, kurya karoti mbisi: Ibinyoma n’ukuri ku burwayi bw’amaso

Yanditswe na Ndahayo Emmanuel
Kuya 23 May 2024 saa 11:08
Yasuwe :

Muribuka kera bamwe tugitangira amashuri, uburyo ababyeyi batubuzaga kureba mu zuba, ubundi bakaduha karoti ngo zifasha amaso, ubundi bakatubuza gusomera mu mwijima cyangwa se bakanga ko twambara ’lunette’ ngo si byiza kuzimenyereza amaso.

N’ubu hari abantu bakuru bajya kwa muganga bagasangwamo ibibazo by’amaso, ariko bakanga kwambara ’lunette’ ngo iyo uzambaye zangiza amaso kurushaho n’ibindi byinshi.

Gusa ibi byose, nubwo biba bivugwa nta gihamya gifatika, ariko uba usanga byarakozweho ubushakashatsi ku buryo biba bizwi neza koko niba bigira ingaruka.

Muri iyi nkuru tugiye kurebera hamwe bimwe muri ibi bikunze kuvugwa ku maso, nyamara rimwe na rimwe ugasanga si ukuri kandi byizerwa na benshi. Amakuru dushingiraho yavuye mu bushakashatsi bwakozwe kuri buri ngingo, nk’uko The New York Times yabitangaje.

1. Gusomera ahantu hatari urumuri rwinshi byica amaso: Ibi ntabwo ari byo. Iyo uri gusomera ahantu hatari urumuri, ariko ukaba uri gusomera mu ntera ikwiriye, nibura ya santimetero 20, nta ngaruka bigira ku maso.

Ikibazo kiba iyo uri gusomera mu mwijima mwinshi, kandi usoma cyangwa ureba ibintu bitagaragara neza, bigatuma wiyegereza cyane icyo uri kureba, mbega ukabona ko uri gukoresha imbaraga nyinshi mu kureba ikintu runaka, ibi byo bishobora kugira ingaruka ku maso.

2. Kutambara ’lunette’ bituma amaso atarwara cyane: Ibi ntabwo ari byo. Kwambara ’lunette’ kenshi ni umusaruro w’ibibazo uba ufite by’amaso, iyo muganga azikwandikiye, biba bitewe n’ibipimo by’imirebere yawe biri hasi, cyangwa se indi ndwara runaka wamaze kurwana, cyangwa se ufite ibyago byo kurwara.

Niyo mpamvu gufata umwanzuro wawe wo kwanga kwambara ’lunette’ kuko ukeka ko uwazambaye atazabasha kuzikuramo, bityo ukabyanga usa nk’uri gutinza kuzazambara, bishobora kurangira ahubwo biguteye ikibazo kinini kurushaho, ugasanga n’ibipimo bya ’lunette’ ugiye kwambara biri hejuru cyane kurusha ibyo wari bwambare iyo utanga kwivuza kare, cyangwa kwambara ’lunette’ nk’uko byagenwe na muganga.

Bijya bibaho ko abantu bambara ’lunette’ imyaka myinshi nyuma ibipimo by’amaso yabo bikazasubira ku murongo ku buryo batazongera kuzikenera, urugero rwamenyekanye cyane rukaba Jurgen Klopp wahoze atoza Liverpool, wambaye ’lunette’ imyaka hafi 45 ariko nyuma abaganga bakamusaba kuzireka, ari nako byagenze.

Gusa buri gihe iki kigomba kuba ari icyemezo cyafashwe na muganga na we ashingiye ku bipimo yagufashe, ntikigomba kuba icyemezo cy’umuntu ku giti cye.

3. Kunywa itabi byica amaso: Ibi nibyo. Kunywa itabi bigira ingaruka nyinshi ku ngingo nyinshi z’umubiri w’umuntu, zirimo n’amaso. Ku mubyeyi unywa itabi cyane, izi ngaruka zishobora no kugera ku mwana azabyara, ari naho bibera ikibazo gikomeye.

Iyo umuntu anywa itabi cyane, ashobora kugira ibibazo birimo kwangirika ku mboni ye no kubona ibintu bitagaragara neza (blur). Ni ingenzi cyane kwirinda itabi niba wifuza kwirinda indwara zikomeye z’amaso.

4. Kurya karoti bifasha amaso: Yego. Kurya karoti ni byiza cyane ku maso, cyane cyane iyo izo karoti ari mbisi. Karoti ntizagufasha gukira ibibazo by’amaso wamaze kugira, ariko izagufasha kugabanya ingaruka no kwangirika kw’ibibazo by’amaso, cyane cyane ibigendana n’imyaka.

5. Kumara umwanya munini hanze bifasha amaso: Ibi nibyo. Kumara igihe kinini mu nzu, cyangwa se uri kureba kuri telefoni na mudasobwa, bishobora kugira ingaruka ku maso iyo bikozwe igihe kirekire, icyakora kujya hanze no kureba ibintu biri hanze y’inzu, bigira ingaruka nziza ku maso.

Kujya hanze cyane ntumare igihe kinini imbere mu nzu bikurinda kurwana indwara ya ’myopia’ cyangwa indwara yo kureba ibiri hafi neza, ariko ibiri kure ntushobore kubireba.

Uburyo bwiza bwo guhangana n’iki kibazo ni ugukoresha itegeko rizwi nka 20-20-20. Ibi bisobanuye ko mu gihe uri gusoma ikintu nko kuri mudasobwa, ukabikora iminota 20, ni byiza kureba ku ruhande ku kintu kiri kure, nibura kiri santimetero 20, ibi ukabikora nibura mu gihe cy’amasegenda 20 mbere yo gusubira inyuma ngo wongere usome ibyo uri gusoma kuri mudasobwa.

Amaso ni urugingo rushobora kwihangana, ku buryo rushobora kurwana ariko rukamara igihe kirekire rukoreshwa mu buryo butari bwiza, gusa nanone iyo amaso yarwaye bifatika, kenshi biragora kongera kuyasubiza ubuzima bwiza yahoranye.

Uburyo bwiza bwo kwirinda kuyangiza ni ukwisuzumisha kugira ngo umenye uko ahagaze, hanyuma wasanga hari ikibazo runaka, ukagifatirana hakiri kare ukivuza kuko ari bwo wiyongerera amahirwe yo kuyakira neza.

Iyi foto yabonetse hifashishijwe ikoranabuhanga rya AI


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .