FBI na CIA bitandukanira he?

Yanditswe na David Eugène Marshall
Kuya 23 Nzeri 2018 saa 04:30
Yasuwe :
0 0

Ikigo cya Amerika gishinzwe iperereza, CIA (Central Intelligence Agency) n’Ibiro bishinzwe Ubugenzacyaha, FBI (Federal Bureau of Investigation) ni ibigo bibiri bitandukanye ariko byose bikomeye, binagira uruhare mu guhagarara neza ku izina rya Leta Zunze Ubumwe za Amerika.

Bifite inshingano wakwibeshya ko zisa ariko zitandukanye cyane. FBI ikora imirimo ya gipolisi, CIA igakora ubutasi.

FBI yatangiye yitwa BOI (Bureau Of Investigation) ishingwa mu 1908 mu gihe CIA yashinzwe nyuma y’imyaka 39, kuwa 26 Nyakanga 1947.

FBI ishingwa yahawe inshingano zijyanye n’imirimo ya gipolisi nko kugenza ibyaha no guta muri yombi ababikekwaho, bagabashyikirizwa ubutabera.

Kuri CIA yo ariko si uko bimeze, kuko ifite mu nshingano kuneka no kuburizamo ibikorwa by’abanzi ba Amerika, haba ku butaka bwayo no hanze.

Mu gihe yashingwaga kugeza none yagiye yibanda mu kuneka ibihugu no gucungira hafi abategetsi ku isi batumva ibintu kimwe na Amerika byanaba ngombwa ikabakuraho.

CIA kandi niyo igena ingamba z’uburyo umutekano wa Amerika ugomba kurindwa, hamwe no gusesengura amakuru yose ku mutekano wa Amerika n’icyahungabanya ubukungu bwayo.

Ni ikigo gihabwa amabwiriza na Perezida wa Amerika imbonankubone. Muri make rero FBI ikora iby’ubugenzacyaha, CIA igakora ubutasi.

Ikindi cyihariye ni uko ubutasi cyangwa kuneka ari imirimo ikorwa na za guverinoma, nta rwego rwigenga rukora ubutasi, ariko inshingano nk’iza FBI hari imiryango mpuzamahanga ishobora gukora ibijya gusa nazo, mu gihe nta wigenga wakora ibisa n’ibyo CIA ikora.

Itandukaniro rya FBI na CIA mu mirimo yabo ya buri munsi

Charles Joseph Bonaparte na Perezida Theodore Roosevelt bajya gutangiza BOI yaje kuvamo FBI, babanje kwibaza niba bazabona abakozi babishoboye.

Bonaparte mu rwenya rwinshi yabwiye Roosevelt ati “Tuzafata abagabo b’inkorokoro buri umwe tumuhereze imbunda barasane, uwishe undi bwa mbere tujye tumuha akazi!”

BOI (Bureau of Investigation) yatangiranye abakozi 34 mu 1908 iza guhinduka FBI (Federal Bureau Of Investigation) mu 1935.

Magingo aya FBI ifite ikicaro muri Washington, D.C ikagira ibiro 56 muri Leta zigize Amerika n’ibyicaro bito 350 mu gihugu hose, na biro 60 zikorera ku isi yose. Muri rusange FBI ikoresha abakozi 35 000.

Hano icyo umuntu yavuga mu buryo bworoshye kumva ni uko CIA ikora ubumaneko ariko itagenza ibyaha, kuko nta nshingano ifite zijyanye n’iby’amategeko.
N’ikimenyimenyi CIA ntishobora gukora ubutasi ku muturage wa Amerika cyangwa undi wese ufite ubwenegihugu bwayo.

Mu gihe CIA ikeneye kuneka umuturage wa Amerika yitabaza Urwego rw’Ubutasi rw’Ubwongereza, MI6 rukaneka wa Munyamerika rukanamuta muri yombi.

MI6 na CIA ni ibigo bifitanye amasezerano y’imikoranire muri ubwo buryo, gusa ingengo y’imari MI6 icyo gihe ikoresha itangwa na CIA ubwayo.

FBI rero yo ariko ifite ubwo bushobozi bwo guperereza no gukurikirana umunyamerika uwo ariwe wese n’aho yaba ari hose ku Isi.

FBI na CIA bashobora no gukorana cyane cyane ku kibazo kibangamiye umutekano wa Amerika, n’ubwo atari ihame.

Gusa iyi mikoranire yakemanzwe cyane mu 2001, ubwo Al Qaeda yagabaga ibitero by’iterabwoba i New York na Washington, bigakorwa buri kigo muri ibi gifite amakuru ariko atarahurijwe hamwe ngo ibyo bitero biburizwemo.

Muri icyo gihe, ikinyamakuru New York Times cyanditse inkuru yagiraga iti “Bananiwe kuburizamo ibitero bya Al Qaeda kandi byari bisanzwe bizwi ko Osama Bin Laden yari afite umugambi wo kugaba ibitero kuri Amerika.”

Akandi gashya abantu bamenya ni uko FBI ishobora guta muri yombi maneko wa CIA wagerageza gufata umugizi wa nabi kandi atabyemerewe n’amategeko.

Ibi biri mu bikekwa ko biri mu mpamvu ba maneko ba CIA aho kwirirwa batakaza umwanya bafata abagizi ba nabi ahubwo bahitamo kubica, nta byinshi biriwe bajyamo.

Ibyo usabwa ngo ube maneko wa CIA cyangwa umukozi wa FBI

Kuri FBI ugomba kuba ufite imyaka iri hagati ya 23 na 37, mu gihe CIA yo ugomba kuba ufite 26 kugeza kuri 35.

Usaba akazi muri FBI agomba kuba afite impamyabumenyi y’ikiciro cya kabiri cya Kaminuza ndetse n’imyaka itatu y’uburambe mu kazi runaka mu byo ahugukiwe.

Mu gihe wemerewe, uhabwa imyitozo yihariye mu Kigo cy’amahugurwa cya FBI kiri Quantico muri Leta ya Virginia, iyo myitozo imara amezi atatu.

Kuri CIA ibijyanye n’amashuri bijya gusa n’ibya FBI ukuyemo ko yo ireba by’umwihariko ubumenyi ufite mu by’indimi n’imibanire y’ibihugu.

Ubaye ufite ubwenegihugu bwa Amerika kandi biba ari akarusho.

Ku bafite ubunararibonye mu by’ubutabazi kandi banakoze mu nzego zo gucunga umutekano ni akarusho, ariko muri ibyo byose ikiza mbere ni ukugira ibanga ku rwego rwo hejuru.

Ku banyeshuri muri za kaminuza bimenyereza umwuga muri CIA, iyo ikubengutse igusaba ko mwakorana.

Gasopo ku wifuza gukorera CIA uwo ariwe wese!

Ukinjira ku rubuga rwa interineti rwa CIA usaba akazi wakirizwa amagambo mu nyuguti zitsindagiye agira ati “Wirinde cyane kuko bamwe mu ncuti zawe, abavandimwe bawe, ndetse n’abantu ku giti cyabo hamwe n’imiryango mpuzamahanga bafite inyungu mu kumenya ko uri gushaka kuba intasi ya CIA.”

Umwe mu bigeze gukorera CIA abajijwe niba atajya atekereza ku kaga n’ingorane yakoranaga umurimo we akiri intasi, yasubije umubajije ati “Uko ubyibaza nanjye niko mbyibaza.” Ni icyo gisubizo rukumbi yamushubije.

Mu gihe uwigeze gukorera FBI we yavuze ko nta byinshi baba bemerewe kuvuga ku murimo wabo bakiwurimo, kandi ko ibi bibafasha kudahura n’akaga ko guhutazwa n’abagizi ba nabi baba bahiga umunsi ku wundi.

Iyo ugereranije umushahara FBI na CIA, umukozi mushya wa FBI ahembwa ibihumbi 47.000 by’amadolari ya Amerika, umaze kumenyera akaba yanageza ku bihumbi 130.000 by’Amadolari.

Umukozi mushya wa CIA we ashobora guhembwa kuva ku madolari 40.000 kugeza ku 137.000 ku mwaka, ariko ibi byose bigendena n’ubushobozi bw’umuntu n’icyo ibi bigo bimwitezeho.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza