Batatu bapfuye undi arahuma burundu nyuma yo kunywa umuti usukura intoki ‘Hand Sanitizer’

Yanditswe na Habimana James
Kuya 27 Kamena 2020 saa 05:18
Yasuwe :
0 0

Inzego z’ubuzima muri Leta Zunze Ubumwe za Amerika, zatangaje ko abantu batatu bo muri leta ya New Mexico bapfuye undi umwe arahuma burundu nyuma yo kunywa umuti usukura intoki ‘Hand Sanitizer’.

Ubuyobozi buvuga ko abandi bantu batatu barembye cyane. Amakuru avuga ko aba bantu uko ari barindwi banyoye uyu muti urimo ikinyabutabire cya methanol mu kwezi gushize.

Umunyamabanga wa Leta ushinzwe iby’ubuzima muri iyi leta, Kathy Kunkel, yagize ati "Niba utekereza ko ushobora kuba waranyoye cyangwa warakoresheje umuti usukura intoki, hand sanitizer, irimo methanol, wajya gushaka abaganga kuko umuti urwanya uburozi bwa methanol urahari ariko kugira ngo ukire ni uko uba wahageze kare.”

CNN ivuga ko abantu bamwe bazwiho gukoresha imiti isukura intoki kugira ngo basinde kubera ubushobozi bwo gusindisha burimo.

Mbere y’icyorezo cya coronavirus, iyi miti isukura intoki yari yaragiye ibuzwa gukoreshwa mu magereza menshi kubera gutinya ko abagororwa bayinywa cyangwa bakayikoresha kugira ngo batwike.

Gusa Ikigo gishinzwe kurwanya indwara cyategetse ko izi ngamba zo kuyikumira zigabanywa kugira ngo ifashe mu kurwanya coronavirus.

Ikigo gishinzwe Ibiribwa n’Imiti muri Leta Zunze Ubumwe za Amerika, FDA, giherutse kugira inama abantu kudakoresha imwe mu miti isukura intoki ‘hand sanitizers’ ikorwa n’ikigo, Eskbiochem SA kubera ubumara burimo.

Iki kigo kivuga ko cyavumbuye ikinyabutabire cya methanol, kikaba gishobora kuba uburozi iyo cyinjiye mu ruhu cyangwa umuntu akiriye.

FDA itanga urugero rwa Lavar Gel na CleanCare No Germ hand sanitizers, yose ikorwa na Sosiyete yo muri Mexique yitwa Eskbiochem SA.

Iki kigo kivuga ko umuntu wakoresheje methanol nyinshi bishobora kumutera kugira isesemi, kuruka, kubabara umutwe, kutabona neza, kugira ubuhumyi buhoraho, kujya muri koma, kwangirika burundu kw’imitsi cyangwa urupfu.

FDA iburira ko umuntu wese wakoresheje iyi miti irimo methanol ko agomba kwihutira kujya kwa muganga akavurwa.

FDA yo ivuga ko yasabye Eskbiochem SA kuvana ibi bicuruzwa ku isoko tariki 17 Kamena, ariko ikaba itarabona igisubizo cy’iki kigo. Yasabye abantu guhagarika gukoresha ibyo bicuruzwa kandi bakabijugunya ahashyirwa imyanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .