Uko kuboneka gake kwayo kuyongerera agaciro ku isoko, ugasanga arahenze cyane.

Mu gihe ‘diamants’ ari yo mabuye benshi bakunze gutangaho urugero rw’aboneka umugabo agasiba undi ndetse ahenze cyane, hari andi abaho aboneka bigoranye kandi yihariye kuyarusha.

Grandidierite

Ibuye rya ‘Grandidierite’ ryabonetse bwa mbere muri Madagascar mu 1902, riri ku rutonde rw’aboneka bigoranye cyane ku Isi, biturutse ku kuba aho rishobora gucukurwa hazwi ari hake cyane.

By’umwihariko, iri buye rikunze kugaragara mu ibara rijya gusa n’ubururu buvanze n’icyatsi, rikaba ryifashishwa kenshi mu ikorwa ry’imikufi ‘bijoux’.

Nyuma yo kuvumburwa n’Umufaransa Alfred Grandidier muri Madagascar, ahandi ryabonetse ni muri Sri Lanka.

Iri buye rifite agaciro kari hejuru kuko carat imwe (hafi garama 0.2) yaryo ishobora kugura agera kuri 20.000$.

Taaffeite

Ibuye rya ‘Taaffeite’ ribarwa ko riboneka gake inshuro miliyoni ugereranyije na ‘diamants’. Ryavumbuwe bwa mbere n’Umunya-Ireland, Edward Charles Richard Taaffe mu 1945.

Iri buye ryarabonetse muri Sri Lanka, Tanzania n’u Bushinwa, rikunze kugaragara mu mabara arimo umutuku, icyatsi, ‘pink’, ‘purple hue’, cyangwa nta bara rifite.

Carat imwe yaryo usanga akenshi igura hagati ya 2.000$ na 4.000$, nubwo hari ishobora guhenda cyane nk’indobanure ikageza ku 35.000$. Iri na ryo rikunze kwifashishwa mu ikorwa ry’imikufi.

Painite

‘Painite’ ni ibuye ryavumbuwe muri Myanmar mu myaka ya 1950, akaba ari ho hagifatwa nk’igicumbi cyaryo. Iri na ryo riboneka gake cyane ku buryo kugeza mu 2001 hizerwaga ko ibibumbe (crystals) byaryo bihari ari bitatu gusa.

Rikunze kugaragara mu ibara ritukura cyane, cyangwa ritukura mu buryo bwijimye, rigakomera cyane ndetse rikaba ryamara igihe kirekire ritarangirika.

Igiciro cyaryo kirahindagurika cyane, gusa carat imwe yaryo igura hagati ya 50.000$ na 60.000$.

Alexandrite

‘Alexandrite’ ryagaragaye bwa mbere mu Burusiya mu myaka ya 1830, rikaba rishyirwa ku rutonde rw’ahenze kandi adapfa kuboneka kuko carat imwe yaryo igura hagati ya 10.000$ na 50.000$.

U Burusiya ni bwo bwakomeje gufatwa nk’igicumbi cyaryo, ariko ryaje kuboneka no muri Sri Lanka, Brésil, no mu bice bimwe bya Afurika y’Iburasirazuba.

Red Beryl cyangwa Bixbite

‘Red Beryl’ cyangwa ‘Bixbite’ ni ibuye riboneka bigoranye kurusha ‘diamants’ ndetse rikagira agaciro karuta aka Zahabu inshuro igihumbi.

Kuva ryavumburwa n’Umunyamerika, Maynard Bixby, mu 1904, riboneka ahantu hamwe ku Isi, mu misozi ya Wah Wah iherereye muri Utah, muri Leta zunze Ubumwe za Amerika.

Carat yaryo imwe igura hagati ya 10.000$ na 100.000$.

Jeremejevite

Mu myaka ya 1880 ni bwo ibuye rya ’Jeremejevite’ ryavumbuwe n’Umurusiya Pavel Jeremejev muri Siberia.

Mu myaka ya 1970 ryagaragaye no muri Namibia, akaba ari naho riboneka cyane uyu munsi.

Gusa ribarwa mu aboneka bigoranye ndetse carat imwe yaryo ishobora kugura arenga $10,000. Naryo ryifashishwa ahanini mu ikorwa rya ‘bijoux’.

Serendibite

Agace kitwa Ratnapura ko muri Sri Lanka karacyafatwa nk’igicumbi cya ‘Serendibite’ kuko kuribona ahandi byakomeje kuba ingorabahizi. Carat imwe y’iri buye ryavumbuwe muri Sri Lanka mu 1902, igura arenga 18.000$.

Kimwe n’andi mabuye y’agaciro gahanitse, iri naryo ryifashishwa cyane mu ikorwa ry’imikufi.

Poudretteite

‘Poudretteite’ ni ibuye ryavumbuwe mu myaka ya 1960 muri Canada, ariko rikomeza kuba imbonekarimwe cyane n’urujijo kuri ryo ari rwinshi kugeza mu myaka ya 2.000$ ubwo ryongeraga kuboneka muri Myanmar; ubu akaba ari ho rikunze kugaragara.

Uko kuboneka hake kwaryo kwatumye rigira agaciro ku buryo carat imwe yaryo ishobora kugura agera ku 3.000$. Naryo ryifashishwa cyane mu ikorwa rya ‘bijoux’.

Musgravite

Ibuye rya ‘Musgravite’ ryavumbuwe muri Australia mu 1967, ariko riboneka ku isoko cyane mu myaka ya 1990, nyuma bigaragara ko rishobora no kuboneka muri Madagascar.

Ni ibuye ry’imbonekarimwe kuko carat imwe yaryo igura ari hagati ya 30.000$ na 50,000$.

Black Opal

Black Opal ni ibuye riboneka muri Australia kuva mu 1877, kandi na bwo hake cyane. Rigaragara mu mabara atandukanye arimo umutuku, icyatsi, cyangwa ubururu.

Magingo aya aho riboneka cyane ni muri New South Wales, carat imwe yaryo ikaba igura ari hagati ya 3.000$ na 10.000$.

Benitoite

‘Benitoite’ ni ibuye riboneka cyane i California muri Leta zunze Ubumwe za Amerika, ari naho ryavumbuwe mu 1907. Ryabanje kwitiranywa n’iryitwa ‘sapphire’, bimenyekana ko ryihariye mu 1985.

Nyuma y’uko bigaragaye ko riboneka hake, ubu ribarwa carat imwe yaryo igura arenga 10.000$.

Uretse muri California, iri buye ryanabonetse muri Arkansas no mu Buyapani.

Tanzanite

Ibuye rya ‘Tanzanite’ ryavumbuwe bwa mbere n’Aba-Maasai mu 1967, rikaba riboneka mu misozi ya Merelani muri Tanzania gusa.

Carat imwe yaryo igura hagati ya 500$ na 1.000$. Ingano yaryo nini yigeze kuboneka icyarimwe ikaba yari carats 16.000.

Kimwe n’andi y’imbonekarimwe, iri ryifashishwa cyane mu ikorwa ry’imikufi.