Abatuye Isi bashobora kugera kuri miliyari 9.7 mu 2050

Yanditswe na Ndayikunda Josué
Kuya 25 Kamena 2019 saa 08:01
Yasuwe :
0 0

Umuryango w’Abibumbye watangaje ko abaturage batuye Isi bashobora kugera kuri miliyari 9.7 mu 2050 bavuye kuri 7.7 bariho uyu munsi.

Raporo y’Ishami ry’ Umuryango w’Abibumbye ryita ku Bukungu n’Imibereho myiza y’abaturage yagaragaje ko mu mpera z’ikinyejana cya 21 abatuye Isi bashobora kugera kuri miliyari 11.

Umuyobozi w’Ishami ry’Umuryango w’Abibumbye ryita ku Bukungu n’Imibereho myiza y’abaturage, John Wilmoth, yatangaje ko uyu mubare ushobora kuza mbere y’ikinyejana cya 21 cyangwa nyuma yacyo gato.

Ibihugu icyenda birimo u Buhinde, Nigeria, Pakistan, Congo, Ethiopie, Tanzanie, Indonésie, Misiri na Leta Zunze Ubumwe za Amerika bishyirwa mu majwi ko bizagira uruhare rungana na ½ cy’umubare w’abaturage baziyongera hagati ya 2019 na 2050.

Raporo ikomeza igaragaza ko abatuye Afurika yo munsi y’ubutayu bwa Sahara bazikuba hafi kabiri mu 2050.

Umubare munini w’abafite ubwiyongere bw’abaturage uri mu bihugu bikennye cyane.

Kugeza ubu, uburumbuke bw’abatuye Isi bugenda bugabanuka dore ko bwavuye ku mbyaro 3.2 ku mubyeyi mu 1990 bukagera kuri 2.5 mu 2019. Bitengayijwe uburumbuke buzakomeza kugabanuka kugera kuri 2.2 mu 2050.

Iyi raporo igaragaza ko mu 2019 uburumbuke mu gace ka Afurika yo munsi y’ubutayu bwa Sahara aribwo bwari hejuru cyane dore ko umubyeyi umwe yabarirwaga imbyaro 4.6.

Umuryango w’Abibumbye ugaragaza ko hagati ya 2019 na 2050 abatuye Isi bazagabanukaho 1% mu bihugu birenga 55, 26 muri byo biteganyijwe ko umubare uzaganuka byibuze 10%.

Urugero mu Bushinwa, biteganyijwe ko miliyoni 31.4 (2.2%) z’abaturage zizagabanuka hagati ya 2019 na 2050.

Wilmoth avuga kugabanuka k’uburumbuke biterwa no kwiyongera k’uburezi, kubona akazi cyane cyane ku bagore ndetse n’amahirwe yo kubona akazi mu mijyi kurusha mu cyaro.

Abimukira ni indi mpamvu biteganyijwe ko izongera cyangwa ikagabanya umubare w’abatuye muri bimwe mu bihugu.

Hagati ya 2010 na 2020, ibihugu 14 bizakira abarenga miliyoni 1 y’abimukira, bikazatuma hari n’ibindi bihugu bizabura abaturage bangana gutyo.

Iyi raporo itanga urugero rw’ibihugu birimo Bangladesh, Nepal na Philippines bisohora abimukira benshi baba bagiye mu kazi hirya no hino ku Isi.

Umuryango w’Abibumbye utangaza ko ibihugu byakira umubare munini w’abimukira mu myaka 10 ishize ari Belarus, Estonia, u Budage, Hongrie, u Butaliyani, u Buyapani, u Burusiya, Serbie na Ukraine.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza