00:00:00 IGIHE NETWORK KN KINYARWANDA EN ENGLISH FR FRANCAIS

Abatetsi 10 ba mbere b’ibikomerezwa ku Isi

Yanditswe na Muyisenge Jean Felix
Kuya 9 June 2022 saa 09:22
Yasuwe :

Mu bintu byibanze ngenderwaho iyo umuntu ashaka aho gufatira ifunguro mu bya mbere yitaho harimo ubwoko bw’ibyo kurya ashaka, uko bitekwa, ubuhanga bitekanye,ubushobozi afite n’ibindi bitandukanye.

Abahanga mu byerekeye amahoteli na za restaurants bemeza ko ikintu cya mbere cy’igenzi gikurura abakunda amafunguro, ari igikoni. Iyo ufite inararibonye mu gutunganya amafunguro, ntibisaba kwamamaza ngo ubone abakiliya.

Mu 1900 ikigo mpuzamahanga cyo mu Bufaransa ‘Michelin’ cyatangije ibihembo byitwa ‘Michelin Stars’ , aho restaurants, hoteli n’abatetsi bagenda bahabwa inyenyeri bitewe n’ubuhanga bagaragaza mu gutunganya amafunguro, n’izindi serivisi bijyanye.

Kuri ubu iki gihembo nicyo gifatwa nk’icya mbere mu gushyira mu byiciro amahoteli, restaurants n’abatetsi ku Isi. Inyenyeri za Michelin zishobora kongerwa cyangwa zikagabanuka bitewe na serivisi z’uwazihawe.

Buri uko umutetsi ahawe inyenyenyeri nyinshi, biba bisobanuye ko ari ku rwego rwo hejuru ari na ko agaciro ke kazamuka.
Aba ni bamwe mu batetsi bafatwa nk’aba mbere ku Isi kuri ubu, hagendewe ku mubare w’inyenyeri bafite.

Andreas Caminada- inyenyeri 7

Uyu mugabo wo mu Busuwisi w’imyaka 45, yatangiye atekera muri restaurants ziciriritse. Ubwo yari afite imyaka 26 yahawe akazi ko gukora mu gikoni nk’umutetsi mukuru wa Schloss Schauenstein, hoteli iherereye mu misozi ya Alps mu Busuwisi.

Nyuma yo kuyigeremo, iyi hoteli yagiye ihabwa ibihembo bitandukanye harimo inyenyeri eshatu za Michelin.

Ubu Caminada yafunguye izindi restaurant ebyiri nazo zahawe inyenyeri na Michelin.

Yoshihiro Murata- inyenyeri 7

Uyu mugabo wavukiye mu Buyapani, amaze imyaka 50 aharanira gukwirakwiza indyo zo mu Buyapani ku Isi. Yamamaye cyane mu gutunganya ifunguro ryitwa Kaiseki riri mu mafunguro meza kandi ahenze mu Buyapani. Iyi ikaba ari na yo mpamvu Michelin yamuhaye inyenyeri 7.

Uyu mugabo yafunguye restaurant za Kikunoi ari zo Kikunoi Honten, Kikunoi Akasaka na Kikunoi Roan, zose zifite inyenyeri ebyiri.

Seiji Yamamoto- inyenyeri 7

Uyu mugabo w’imyaka 52 ukomoka mu Buyapani, yamamaye cyane mu gutunganya amafunguro yo mu Buyapani nka Kaiseki. Afite restaurants eshatu harimo Nihonryori RyuGin yigeze no gushyirwa muri restaurant 50 za mbere ku Isi.

Gordon Ramsay- inyenyeri 7

Uyu Mwongereza w’imyaka 55 afatwa nk’umwe mu batetsi b’ibyamamare ku Isi. Uyu mugabo umenyereweho cyane gutunganya indyo z’Abongereza, yafunguye restaurants 35 harimo iba i Londres ifite inyenyeri eshatu yitwa Restaurant Gordon Ramsay.

Mu 2019, Gordon Ramsay yari ku mwanya wa 35 ku rutonde rwa Forbes rugaragaza ibyamamare byinjiza menshi ku Isi. Kugeza muri 2020 yabarirwaga ubutunzi bungana na miliyoni 220$, amenshi ni ayo yakuye mu biganiro bye byo guteka bica kuri za televiziyo nka Hell’s Kitchen, Kitchen Nightmares na Master Chef.

Thomas Keller- inyenyeri 7

Ku myaka 66 y’amavuko, Thomas Keller afatwa nk’umwe mu batetsi beza muri Leta Zunze Ubumwe za Amerika, cyane ko n’imwe mu ma restaurant ye imaze imyaka irenga 25, ‘The French Laundry’ yigezwe gufatwa nk’iya mbere ku Isi.

Uyu mugabo yamamaye cyane kubera ubuhanga mu gutunganya indyo z’Abafaransa.

Anne-Sophie Pic- inyenyeri 8

Anne- Sophie Pic afatwa nk’umutetsi wa mbere ku Isi mu bagore cyane ko ari na we rukumbi ufite inyenyeri 8.

Uyu Mufaransa w’imyaka 52 yageze ikirenge mu cya se ubwo yabaga umuyobozi wa restaurant y’umuryango we, Maison Pic asimbuye se umubyara wapfuye mu 1997.
Sophie yahesheje iyi restaurant inyenyeri eshatu nyuma akomerezaho afungura izindi restaurant zitandukanye.

Yannick Alléno - inyenyeri 10

Uyu Mufaransa w’imyaka 53 amaze guhabwa inyenyeri 10, ubu ayobora restaurants 18 harimo Alléno Paris au Pavillon Ledoyen, imwe mu zikuze i Paris ikabaha iherereye mu busitani bwa Champs Élysées.

Martin Berasategui- inyenyeri 12

Uyu mugabo ukomoka mu Ntara ya Basque muri Espagne, yabonye inyenyeri ya mbere afite imyaka 25 . Berasategui kandi ni we nyiri restaurant ya Restaurante Martin Berasategui imaze imyaka itandatu iza ku rutonde rwa restaurants 50 za mbere ku Isi.

Mu myaka 44 amaze muri uyu mwuga, yabashije gufungura izindi restaurants i Barcelone, Tenerife, Repubulika ya Dominica, Mexique na Costa Rica.

Pierre Gagnaire- inyenyeri 14

Pierre Gagnaire ni Umufaransa w’imyaka 70 umaze imyaka 40 akora umwuga wo guteka. Yabonye inyenyeri ya mbere afite imyaka 26.

Ubu amaze gufungura restaurant 18 mu bice bitandukanye harimo izizwi cyane nka Rue Balzac iherereye i Paris na Sketch iri Londres mu Bwongereza.

Alain Ducasse- inyenyeri 21

Alain Ducasse ni Umufaransa w’imyaka 67 wamamaye cyane nk’umutetsi wa mbere ku Isi akaba ari na we ufite inyenyeri nyinshi ku Isi. Ubu amaze gufungura restaurants 36 mu bice bitandakunye ku Isi akaba ari na we mutetsi wa mbere watunze restaurants zifite inyenyeri eshatu mu mijyi itatu itandukanye.

Muri 2015 Alain Ducasse yaciye agahigo ubwo yabaga umutetsi wa mbere wohereje ibiryo mu isanzure, ubwo yohererezaga ibiryo abahanga mu isanzure bari mu cyogajuru kiri mukirere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .