00:00:00 IGIHE NETWORK KN KINYARWANDA EN ENGLISH FR FRANCAIS

Abanyamahirwe badasanzwe bagiye bamenyekana mu bihe bitandukanye

Yanditswe na Mugisha Christian
Kuya 19 May 2022 saa 01:50
Yasuwe :

Amahirwe! Mu buzima tubamo ijambo amahirwe rikunze gukoreshwa cyane. Rituzamo kenshi iyo twifuriza umuntu guhirwa mu byo akora cyangwa ibyo agiye gukora ndetse umuntu akavuga ko yagize amahirwe make igihe atahiriwe n’ibyo yakoze.

Kugira amahirwe meza cyangwa masa ahanini bifitanye isano n’imyizerere y’abantu uko igiye itandukanye. Havugwa amahirwe igihe ibyiza n’ibibi bishobora kubaho igihe icyo aricyo cyose, bikaba mu buryo butunguranye kandi budasanzwe cyangwa bikabaho k’ubw’impanuka.

Gusa ahanini bikunze gukoreshwa mu gusobanura ibintu byiza n’ibyishimo bya muntu kuko iyo bibaye bibi hakoreshwa irindi jambo. Birashoboka ko nawe waba warabaye umunyamahirwe igihe kimwe, cyangwa ukaba wizeye ko hari igihe kizagera amahirwe akagusekera.

Muri iyi nkuru tugiye kugaruka ku bantu bamwe bagiye bamenyekana mu bihe bitandukanye bagize amahirwe adasanzwe mu buzima bwabo.

Frane Selak

Frane Selak agereranywa n’umuntu ufite amahirwe menshi kurusha abandi ku Isi nyuma yo kurokoka urupfu inshuro zirindwi mu buryo butangaje.

Byose byatangiye mu 1962 ubwo Frane yagiriraga urugendo muri gari ya moshi ikaza guta umuhanda ikagwa mu mazi y’urubura abagera kuri 17 bakahasiga ubuzima ariko we avamo ari mutaraga.

Nyuma y’umwaka umwe, ari mu ndege yagize ibibazo mu kirere biyiviramo gukora impanuka bituma 19 bapfa ariko we yisanga areremba ku muryango wayo mu mazi arokoka atyo.

Mu 1966, yari umugenzi muri bisi yarenze umuhanda iyoboka iy’amazi abasha kurokoka aroga agera ku nkombe afite ibikomere bito gusa, abandi bane barimo bahasiga ubuzima.

Nyuma y’imyaka ibiri, ubwo yigishaga umuhungu we kurasa, Frane yirashe mu myanya y’ibanga ntiyapfa ariko ubugabo bwe busigara aho.

Muri 1970, 1973, 1995 no mu 1996 Frane Selak yakoze impanuka z’imodoka ubwo hari aho imodoka zafatwaga n’inkongi y’umuriro ariko zose aza kuzirokoka. Nyuma mu 2003 yaje gutsinda mu mikino y’amahirwe aho yatsindiye asaga miliyoni y’amadolari.

Elmer Sherwin

Elmer Sherwin, yamenyekanye cyane nk’umuntu wa mbere watsindiye amafaranga menshi mu bihe bitandukanye mu mikino y’amahirwe izwi nka Jackpot.

Uyu musaza wari wujuje imyaka 92 mu 2020 atuye mu mujyi wa Las Vegas akaba yarahoze ari umusirikare. Yakoze ibitarakorwa n’undi muntu uwo ari we wese aho mu 1989 yatsindiye miliyoni zisaga 4 z’amadorali.

Mu 2005 yongera gukora agashya ubwo yategaga n’ubundi mu mikino y’amahirwe muri Las Vegas y’Amajyaruguru agatsindira asaga miliyoni 21 z’amadorali.

Elmer Sherwin yatsindiye za miliyoni mu mikino y'amahirwe

Bill Morgan

Mu 1998, umushoferi w’ikamyo w’umunya-Australie, Bill Morgan, yakoze impanuka y’ikamyo arokoka mu buryo bw’igitangaza ariko agira ikibazo cy’umutima.

Yahise ajyanwa kwitabwaho kwa muganga ariko biba iby’ubusa umutima we uza guhagarara, bitangazwa ko yapfuye ariko kuri we no ku Mana ntago ryari iherezo rye.

Nyuma y’iminota 14 bitangajwe ko yapfuye Bill yarazutse ariko ubuzima bwe buri habi kugeza aho abaganga bagiriye inama umuryango we kumwambura ubuzima ariko ntibirirwa babitekerezaho.

Nyuma y’iminsi micye yaje gukira arasezererwa nyuma yo gusubira mu buzima busanzwe yakinnye nawe imikino y’amahirwe ku nshuro ye ya mbere atsindira imodoka ifite agaciro ka miliyoni 17Frw.

Mu gihe itangazamakuru ryari ryaje gukurikirana ibye yaguze indi tike ya ‘jackpot’ ako kanya ari imbonankubone kuri televiziyo atsindira ibihumbi 250 by’amadolari.

Bill Morgan bivugwa ko yapfuye akazuka

Maarten De Jonge

Maarten De Jonge yabashije kurokoka urupfu inshuro zigera kuri ebyiri mu gihe gito cyane cy’amezi ane akurikirana.

Amahirwe ye ya mbere yaje igihe yaguraga itike y’indege itwara abagenzi ya MH17 ariko aza kubona indege ihendutse kuruta iyo bituma ahinduza itike ku munota wa nyuma.

Iyo ndege yari yaguriye itike bwa mbere yaje guturikira mu kirere cya Ukraine mu mwaka wa 2014. Nyuma nanone yari ku rutonde rw’abagenzi bari kugendera mu ndege ya MH370 ariko ntiyayijyamo iyo ndege niyo yaburiwe irengero mu 2014 ntiyaboka kugeza magingo aya.

Maarten De Jonge yarokotse urupfu inshuro ebyiri mu mezi ane akurikirana

Mohammad Basheer Abdul Khada

Mohammad Basheer Abdul Khada yavaga ku kibuga cy’indege mpuzamahanga cya Dubai mu 2016 mbere yuko agenda, yaguze itike ya tombola ya ‘Dubai Duty Free Millennium Millionaire’.

Ubwo yasubiraga mu rugo, indege yari arimo yakoze impanuka hanyuma we hamwe n’abandi bagenzi babashije kuva mu ndege mu buryo butangaje itaraturika.

Mu gihe yari ari mu byishimo by’uko arokotse iyo mpanuka ahita amenya y’uko ya tike ya tombola yasize aguze ku kibuga cy’indege mbere y’ayo makuba yose ariyo yatsinze aba uwarokotse ndetse n’umuherwe mu gihe kimwe.

Mohammad Basheer Abdul Khada yarokotse impanuka y'indege

Orlando Bloom

Orlando Bloom yabashije kubaho nyuma y’imvune z’ingingo hafi ya zose z’umubiri we. Yavunitse ukuboko kw’ibumoso, ukuguru kw’ibumoso, ukuboko kw’iburyo, ukuguru kw’iburyo, n’imbavu.

Yavunitse igihanga inshuro eshatu, avunika izuru mu mukino wa rugby, ahanuka ku gisenge avunika umugongo. Afite amahirwe yo kuba akibasha kugenda.

Orlando Bloom yavunitse ibice hafi ya byose by'umubiri

Tsutomu Yamaguchi

Yamaguchi yapfuye mu 2010 yari umu-Enjeniyeri w’umuyapani akaba yararokotse ibisasu bya kirimbuzi bya Hiroshima na Nagasaki mu ntambara ya Kabiri y’Isi yose. Ni we muntu wenyine wamenyekanye warokotse ibyo bisasu byombi.

Yamaguchi yari i Hiroshima ubwo uwo umujyi waterwaga igisasu mu masaha ya mu gitondo, bukeye asubira i Nagasaki, nubwo yari yakomeretse bidakabije.

Umunsi igisasu cyaterwaga i Nagasaki muri icyo gitondo yari yamaze kugera muri uwo mujyi gusa nabwo aza kukirokoka. Yapfuye azize kanseri yo mu gifu ku ya 4 Mutarama 2010, afite imyaka 93.

Tsutomu Yamaguchi yarokotse ibisasu byatewe i Nagasaki na Hiroshima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .