00:00:00 IGIHE NETWORK KN KINYARWANDA EN ENGLISH FR FRANCAIS

Abantu bakoresha imoso ni abahanga kurusha abakoresha indyo?

Yanditswe na Sonia Umuhoza
Kuya 22 July 2022 saa 12:12
Yasuwe :

Bikunze kuvugwa ko abantu bakoresha imoso ari abahanga kurenza abakoresha indyo kandi bakunze kuba abayobozi n’abanyabugeni, nyamara mbere byafataga nk’ikizira ku buryo n’umwana wagaragazaga ko yiyumvamo imoso yahatirwaga indyo.

Hari abayobozi bakomeye barimo n’abaperezida b’ibihugu bakoresha imoso nka Barack Obama, Bill Clinton, George H.W. Bush, Gerald Ford, Harry Truman, James Garfield, Winston Churchill, Uhuru Kenyatta n’abandi.

Hari kandi n’ibyamamare nk’umukinnyi w’umupira Lionel Messi ndetse na Papa Francis, Umushumba wa Kiliziya Gatolika ku Isi.

Mu mateka abantu bakoresha imoso bafatwaga nk’ibicibwa, nko mu ntangiriro z’ikinyejana cya 20 abantu benshi bo muri Amerika bahatiye abantu bakoresha imoso kumenyereza kamere yabo gukoresha indyo.

Kugeza n’ubu hari ababyeyi bagifite imyumvire ko gukoresha imoso atari byiza, bagakubita abana babo iyo bakimara kubona ko bakoresha imoso kugira ngo bayireke bakoreshe indyo.

Abashakashatsi n’abahanga mu miterere y’umubiri w’umuntu batekerezaga ko gukoresha imoso biterwa no kwangirika k’ubwonko no kudindira mu mikurire.

Ubwonko bugizwe n’ibice bibiri, icy’iburyo n’icy’ibumoso. Ibi bice bifite akamaro kanini nko gusobanura, kumva no kuvuga, gutekereza, amarangamutima, kwiga, kugenzura n’ibindi.

Ibi bice bihujwe n’udutsi bituma bikorana kandi bikemerera amakuru gutunganywa ku ruhande rumwe rw’ubwonko kugira ngo ahererekanwe ku rundi ruhande.

Abashakashatsi nka Ntolka na Papadatou-Pastou mu 2018 bahuje ibisubizo by’ubushakashatsi 18 bwapimye igipimo cy’ubwenge byavuye mu matsinda atandukanye, bakora isesengura. Ni amakuru yaturutse ku bantu 20.442.

IQ [Intelligence Quotient] ni uburyo bubaho umuntu ashobora gupima ubwenge bwe, hashingiwe ku bushobozi bwo kwibuka ibintu, uburyo bwo gufata ibyemezo, igihe akoresha afata ibyo byemezo, uburyo agenzura amarangamutima ye, ubushobozi bwo gutekereza no guhuza amakuru n’ibindi bitandukanye.

Ibisubizo byagaragaje ko nta tandukaniro ryerekana amanota ya IQ hagati y’abakoresha indyo n’imoso. Kugereranya hagati y’iburyo n’ibumoso ahubwo, byagaragaye ko abakoresha indyo bafite impuzandengo ya IQ irenze iy’ibumoso.

Kugira ngo tubyerekane neza, abanditsi batanze urugero rukurikira: Tuvuze ko abakoresha imoso bafite impuzandengo ya IQ ya 100, noneho abakoresha indyo bakagira impuzandengo ya IQ ya 101.05.

Ubushakashatsi bumwe byatumye abanditsi banzura ko itandukaniro rya IQ hagati y’ibumoso n’iburyo ari rito cyane kandi ko nta tandukaniro y’ubwenge hagati y’abantu bakoresha indyo cyangwa imoso.

Mu bushakashatsi bwakozwe n’Abadage mu 1999, abanditsi bakoze iperereza ku bijyanye n’uko abantu bakoresha amaboko mu miryango 292, basanga abana bakoresha imoso babikomora ku bintu by’uruhererekane mu miryango kandi abana 9,7% baba bashobora gukoresha imoso iyo ababyeyi babo bayikoresha.

Barack Obama ni umwe mu bantu bakomeye bakoresha imoso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .