Kuri uyu wa Mbere, tariki ya 30 Nyakanga 2012, mu Murenge wa Muganza, ho mu Karere ka Rusizi, hasorejwe Ingando y’urubyiruko rwo mu itorero ry’Abadivantisiti b’umunsi wa 7.

Iyo ngando yari imaze iminsi 7, urubyiruko 254 rwari rwayitabiriye, rwakoze ibikorwa byo kubumba amatafari ibihumbi 110, ahwanye na moliyoni zisaga 3, akazubaka ibyumba by’amashuri y’uburezi bw’ibanze bw’imyaka 12, muri GS Murira.

Ni ku nshuro ya 2 mu Kagari ka Cyarukara, mu Murenge wa Muganza, habera ingando y’urubyiruko rw’Abadiventisiti b’umunsi wa 7. Muri iyi ngando urubyiruko rusobanurirwa uruhare rwarwo mu kwiyubaka ubwabo n’imiryango yabo, itorero n’igihugu muri rusange.

Umwihariko w’iyi ngando y’uyu mwaka wa 2012, wabaye uwo gukora imirimo y’amaboko, aho bose uko ari 254 babumbye amatafari ibihumbi 110, ayo matafari akazubakishwa ibyumba by’amashuri y’uburezi bw’ibanze bw’imyaka 12 muri G.S Mururi, ho mu murenge wa Muganza.

Ubusanzwe ishuri rya G.S.Murira, ryari rigeze ku cyiciro cy’amashuri yisumbuye y’ubureni bw’ibanze bw’imyaka 9, aya matafari yabumbwe, ngo azatuma hubakwa ibyumba 4 bizatuma hagera n’icyiciro cy’imyaka 12, bityo abana babashe kwiga kandi hafi. Umuyobozi w’iryo shuri Mupenzi Alexis, ashimira urwo rubyiruko kuba rubateye ingabo izatuma indi mirimo y’ubwubatsi izihuta.

Ibikorwa byo kubumba byakozwe n’urwo rubyiruko uko ari 254, byatumye haboneka amatafari ibihumbi 110, afite agaciro ka miliyoni 3 n’ibihumbi 300 by’u Rwanda.

Jean Pierre Niyibizi Ushinzwe Itangazamakuru mu Karere ka Rusizi