Kubera umubare w’impunzi zituruka muri Congo ukomeje kwiyongera, Ishami ry’Umuryango w’Abibumbye ryita ku Biribwa (PAM) rikorera mu Rwanda, ryandikitse ibaruwa rimenyesha imiryango mpuzamahanga riyisaba gutanga imfashanyo mu nkambi z’abanyekongo ziri mu Rwanda kubera ikibazo cy’ibiribwa gikomereye izi mpunzi.

Nk’Uko Ibiro Ntaramakuru by’u Rwanda RNA dukesha iyi nkuru bibitangaza, ibaruwa y’ukuriye PAM mu Rwanda Abdoulaye Balde, yandikiye iyi miryango, yanayishyikirije Minitiri Marcel Gatsinzi ushinzwe impunzi n’ibiza.

Iyo baruwa itangira igira iti “munyemerere mbamenyeshe ko hari ikibazo cy’ibyo kurya mu nkambi z’impunzi za Kiziba, Gihembe, Nyabiheke na Kigeme”.

Muri iyo baruwa yavuze ko kibazo gikomereye impunzi ariko ko ategereje ibisubizo bituruka mu miryango mpuzamahanga.
Yagaragaje ko ibiro bya PAM bikorera i Kigali, bisigaranye ibiribwa bike byo kugaburira umubare w’impunzi zikomeza kugenda ziyongera zituruka muri Congo.

Balde yagize ati “mu gihe dukora ibishoboka byose ngo tubashe gukemura ibikenewe n’Impunzi, ubu dufite gusa toni 1150 z’ibiribwa mu bubiko bwacu, ziyongeraho toni 1600 z’ibigori n’ibishyimbo byatanzwe na Leta y’u Rwanda, bishobora gutangwa igihe icyo ari cyo cyose”.

Yavuze ko ibyo biribwa bafite bishobora guhaza gusa impunzi ziherutse kuza muri uku kwezi kwa Kanama ya 2012.

Muri iyi baruwa akomeza atangaza ko mu gihe hatabonetse indi nkunga, nta kindi cyo gukora bafite, avuga ko icyashoboka ari ukugabanya ingano y’ibyo kurya byagenerwaga impunzi, kugira ngo impunzi zose zibashe kurya bahereye muri uku kwezi gutaha kwa Nzeli.

Balde agaragaza ko hakenewe miliyoni 4 z’amadolari ya Amerika, zo kugura toni ibihumbi 3000 by’ibiribwa bitandukanye byageza mu mpera z’uyu mwaka. Avuga ko ayo mafaranga abonetse, byabafasha mu kugaburira impunzi batagabanyije ingano y’ibyo kurya impunzi zisanzwe zifata.

Ibaruwa isoza ivuga ko ikibazo kidakemutse, gishobora kubangamira ubuzima bw’impunzi, kikanagira ingaruka kuri ejo hazaza h’abana bato babarizwa mu nkambi. Gusa umuyobozi uhagarariye PAM mu Rwanda atanga icyizere ko agiye gukomeza gukurikirana ikibazo kugeza igihe PAM ibonye uburyo bushoboka bwo kwita ku bibazo by’ubuzima bw’izi mpunzi.