Ubuyobozi bw’Akarere ka Muhanga, buvuga ko amarembo akinguye ku muntu wese ushaka iterambere ry’Akarere. Ibi byatangajwe n’umuyobozi w’aka karere ushinzwe imibereho myiza Mukagatana Fortunée, ubwo umushinga w’Ababiligi PROTOS ku wa gatatu tariki ya gatandatu Gashyantare 2013 washyikirizaga abafatanyabikorwa bawo bo mu Karere ka Muhanga inyoroshyarugendo (moto) eshatu.
Iki gikorwa cyari cyitabiriwe n’abafatanyabikorwa b’uyu mushinga mu bikorwa by’amazi, isuku no kwita ku bidukikije nka COFORWA, UGAMA-CSS, DUHAMIC-ADRI n’Akarere ka Muhanga bakoreramo, umunyamamabanga uhoraho w’ihuriro ry’abafatanyabikorwa mu Karere ka Muhanga Gonzague Biziyaremye yavuze ko iyi mpanon ari iy’agaciro kanini kuko izafasha mu iterambere ry’icyaro.
Ibi bigarukwaho n’umuyobozi ushinzwe ibikorwa muri PROTOS Hakizimana Jean Pierre, uvuga ko intego ya mbere ari ukugera ahakenewe ibikorwa by’iterambere baharanira ko abenegihugu bagira imibereho myiza babagezaho amazi meza n’ibindi.
Hakizimana avuga ko bagenda bagura gahunda zigendanye n’icyerekezo cy’igihugu, cyane cyane mu gice cy’iterambere ry’icyaro kandi mu buryo bifuza ko aho bakorera bagumana izina ry’icyitegererezo mu buryo bwose aho kubyitirirwa bakerekana impinduka nziza kandi ifite aho iganisha umuturage.
Umuyobozi wungirije w’Akarere ka Muhanga ushinzwe imibereho myiza Mukagatana Fortunée, yahamagariye abafatanyabikorwa gukomeza ibikorwa by’iterambere kuko batafunga amarembo ku muntu uje ashaka guteza imbere abagatuye. Ati “Ubu turashishikariza abafatanyabikorwa gukwira hose ntituzasange hari aho twibagiwe ahubwo batwunganire dusenyere umugozi umwe.”
Asaba kandi abahawe izi moto kuzikoresha neza icyo zigenewe, dore ko umufatanyabikorwa PROTOS yishimira uburyo nka COFORWA yahawe imodoka na moto eshatu ikabikoresha neza kandi bigafasha mu iterambere rirambye aho bakorera.
Inyoroshyarugendo zatanzwe ziri mu bwoko bwa TF, zikaba zifite agaciro ka miliyoni 10 z’amafaranga y’u Rwanda.
TANGA IGITEKEREZO