Ubwo Minisitiri James Musoni yasuraga ahari kubakwa inzu izakoreramo Radio na Televiziyo by’igihugu ku Kacyiru, yatangaje ko iyi izaba yuzuye bitarenze ukwezi k’Ukwakira uyu mwaka, ibijyanye no kuyikoreramo byo ngo birebana n’intangiro z’umwaka wa 2013.

Nk’uko tubikesha ORINFOR, Minisitiri Musoni usigaye yarongerewe itangazamakuru mu nshingano ze muri Minisitiri y’Ubutegetsi bw’Igihugu, mu gusura izo nyubako nshya yari aherekejwe n’Umuyobozi w’Umujyi wa Kigali Fidele Ndayisaba ndetse n’Umuyobozi wa Orinfor Willy Rukundo.

Iyi nyubako nshya y’Ikigo cy’Igihugu gishinzwe itangazamakuru iherereye ku Kacyiru ahahoze ari kuri OBK imbere ya Village Urugwiro, uku kwimuka kukaba gukurikiye igurishwa ry’inyubako iki kigo cyakoreragamo kuri sosiyete yo mu gihugu cya Kenya yitwa Executive Investment Limited, ku kayabo ka miliyoni 900 z’amafaranga y’u Rwanda. Hagiye kubakwa igorofa ifite amazu 8 agerekeranye izaba ifite agaciro ka miliyoni 6 z’amadolari.

Imirimo y’ubwubatsi y’inyubako nshya ya Televiziyo na Radio by’igihugu yatangiye tariki 04 gashyantare uyu mwaka irabanganije ikazakurikirwa no gushyiramo ibikoresho n’ibyuma bya Radio na Televiziyo, bikazarangira bitwaye akayabo ka Miliyoni 12 z’ama euros bikozwe na Sosiyete STUDIOTEC.

Igishushanyo cy’iyo nyubako kigaragaza ibice bitandukanye bijyanye n’imiterere ya Radio na Televiziyo, biteganyijwe ko hazashyirwamo ibikoresho bijyanye n’igihe “digital system”, by’umwihariko muri studio za Radio na Televiziyo, ahateganijwe studio 6 za Radio na Studio 2 za Televiziyo.

Abo bayobozi bemeje ko amazu ari mu gikari cy’inyubako Rwanda Boadcasting Agency (RBA) ubu icyitwa ORINFOR, izakoreramo, yishyurwa kugira ngo aho hantu habe hisanzuye.Ibi ngo bigomba kuba byakozwe mu minsi ya vuba ku bufatanye bwa Ministeri y’ibikorwa remezo n’Umujyi wa Kigali.

Foto: The New Times