Ku batarafunzwe! Karibu mu itongo rya 1930 (Amafoto na Video)

Yanditswe na Philbert Girinema
Kuya 22 Ugushyingo 2018 saa 07:23
Yasuwe :
0 0

Uwafunzwe we birumvikana, ariko abandi mbahaye ikaze mu nyubako mushobora kuba mwaratinye kuva kera na kare! Ntabwo muri buze kumaramo umwanya munini, ahubwo nayibegereje imbere yanyu, nta muntu ushinzwe umutekano uri hafi, ntibibabuze kwidagadura.

Gusa ariko na none, naba nkabije nimye ikaze ababaye muri iri cumbi, bashobora kuba barizi kundusha ku buryo nabo bagira ibyo badusangiza.

Ryanditse amateka akomeye nka Gereza ya mbere yubakiwe abanyarwanda ariko ku nyungu z’Abakoloni b’Ababiligi n’Abadage bari barateye u Rwanda imigwi.

Mu 1930 ni bwo yubatswe, izina rifata ubwo itangira kuba icumbi ry’abananiranye n’abigometse. Ni yo yazanye ubundi buryo bwo guhana abahamijwe ibyaha butari bumenyerewe, butandukanye n’uko byakorwaga mbere mu rwa Gasabo.

Hambere, Abanyarwanda bakosaga barihanangirizwaga, bagatamazwa biciye mu buvanganzo nk’indirimbo n’ibindi, hari n’abacibwaga ihazabu; bikarangirira aho.

Urutonde rw’abo yacumbikiye rwo ni rurerure. Ndakubwiza ukuri urebye hafi yawe aho, ukabaza mugenzi wawe arakubwira abake batatu, bisobanuye ko yakoze akazi gakomeye.

Hari nk’amazina twese tuzi ya vuba cyangwa ya kera! Uhereye ku bari abayobozi bakomeye nka ba Pasiteri Bizimungu wabaye Perezida, Dr Leo Mugesera n’ubu ukiri muri gereza, Umuhanzi Kizito uherutse kuyisohokamo vuba n’abandi.

Ufashe umwana ku ngufu wagombaga kumenya ko iza kuguha karibu, warya utw’abandi nabwo bikaba uko, wakwenderanya mu kabari n’ibindi... Yo nta mpuhwe yagiraga mu gihe amategeko yabyemeje.

Ubizi neza ni umwe mu bayibayemo imyaka 19

Mugisha André ni umugororwa. Afungiye ibyaha bya Jenoside kugeza magingo aya nyuma yo kubihamywa n’urukiko mu 2009.

Urebye igihe yagereye muri 1930, umwana wavutse arangije amashuri yisumbuye, mu minsi mike araba ari muri Kaminuza.

Mugisha yinjiye muri 1930 ku wa 23 Nzeri 1998, akihagera yasanze abarimo nta kibazo bafite nubwo yari afite ubwoba bwinshi bwamazwe no kuba hari abandi.

Ati “Bwari ubwa mbere ninjira muri gereza, nsanga abantu barahari nta kibazo bafite uretse gukora uburoko. Mbere umuntu wabaga yarafunzwe naramurebaga nkamutinya. Kera iyi yari gereza ihambaye, bahazanaga abantu bakoze ibyaha bitari ibya hafi aha”.

“Nabonye hari abantu benshi, mbona binteye ubwoba. Nahasanze abantu benshi bandutaga, abo twari tuziranye, sinigeze ntekereza gutoroka. Ahubwo naricaye ndatuza.”

Uko ubuzima bwabaga bwifashe

Kugira ngo wumve neza ubuzima bwo muri gereza, bigereranye n’ikindi gihugu. Hari umugororwa nigeze gusanga kwa muganga arambaza ati ‘inaha iwanyu mu gihugu se muraho?’.

Kuri we, Gereza ni mu kindi gihugu gifite amategeko akigenga. Haba imirenge, imidugudu, Umuyobozi w’Akagari n’izindi nzego nk’izo.

Nko muri 1930 harimo Umurenge umwe witwa PCK. Wari ufite imidugudu myinshi ifite n’amazina ameze kimwe n’ayo hanze. Hari nk’umudugudu witwa uw’Amahoro [aho Kizito yabaga].

Najyaga numva bavuga ko muri Gereza iyo umuntu yinjiyemo ku munsi wa mbere amenyerezwa ibyo kera mu ishuri twitaga kunnyuzura. Mugisha ashobora kuba abizi bitandukanye na benshi.

Ati “Ntabwo bibamo. Ni ho hantu hambere haba umutekano, nta n’uwakurya urwara.”

Umunyamakuru: Nta muntu ushobora kukubwira ngo uyu munsi ni wowe uri bumese?

Mugisha: Oya ntabwo bibamo. Abantu baragucumbikira mu gihe utarabona uburyamo, bakagufata neza.

Uyu mudugudu ngo wari utuyemo abantu bakomeye b'abakirisitu gatolika. Mbere yo kwitwa iri zina ngo witwaga muri 'Zero Zero'

Uko abantu bahabwa aho kuba

Mugisha avuga ko iyo umuntu ageze muri gereza, umuyobozi w’umurenge aba afite urutonde rw’abantu bari muri buri mudugudu ku buryo areba akavuga ati ahari umwanya ni aha n’aha. Akakohereza abantu atyo akurikije imidugudu [icyumba].

Ati “Hano haba hari imidugudu nk’uko mu gihugu biba bimeze. Uko tubaho ni nk’abantu bo hanze. Dukurikiza ibyo leta y’ubumwe ikora kuko nubwo dufunze turi abanyarwanda.”

Umuyobozi w’Umurenge ni we wakira ibibazo by’abagororwa, uwagize ikibazo cyo kutabona ibiryo cyangwa igikoma akamwegera hanyuma nawe yasanga ari uko byabaye bike, akamenyesha ubuyobozi ko bukwiye kongera amafunguro.

Ati “Niba ku mudugudu umwe baruye ibiryo hakagira ababibura, bajyana ku wundi ukamugaburira.”

Abagororwa bo muri 1930 babaga ku bitanda bitatu bigerekeranyije, umwe hejuru yundi. Hakabaho ingazi umuntu azamukiraho agiye ku gitanda cyo hejuru ku buryo bworoshye.

Mbese urebye ni nka rwa rutara rwo ha mbere. Abafite ba nyogokuru cyangwa sogokuru muzajye kubaganiriza bababwire uko urutara rw’ibishangara rwabaga rumeze.

Bitewe n’ingano y’icyumba uko cyanganaga, wasangaga harimo nk’abantu barenga 100 ariko hagakorwa ibishoboka byose ko nta bucucike bukabije bubamo.

Urebye imiterere y’amacumbi y’iyi gereza, wavuga ko umuntu wararaga ku gitanda cyo hejuru ariwe wabaga uri ahantu hafurebye neza ku buryo yashoboraga kubaka akabati abikamo ibikoresho bye mu buryo butangaje.

Muri 1930 hari inyubako nziza yakoreragamo radio yamenyeshaga abantu ko basuwe, abazajya mu nkiko n’andi matangazo areba abagororwa. Ubwo niba utakurikiye amakuru yayo, ntiwiyumvaga birumvikana.

Mugisha yibuka ko iyi radiyo yatangijwe n’Abasaveli bumvaga amaradiyo atandukanye bagasoma amakuru kugira ngo bamare abantu irungu.

Ati “Ku manywa babaga bari guhamagara abantu , abagiye mu rukiko, gusurwa…mbere bakoreshaga umunwa ariko nyuma gereza yaguze imizindaro […] Hagiye hakora benshi. Hari ikiganiro cya Mashyengo, yatubwiraga utuntu n’utundi dusekeje tukishima.”

Imyemerere ya muntu ni ikintu cy’ingenzi

Iyi gereza yari ifite ahantu hihariye abayisilamu basengeraga, Kiliziya Gatolika aho yari iri hateguye neza ku buryo haberaga misa mu buryo buhoraho.

Ati “Mu Kiliziya nitwe twashyizemo ibishushanyo.” Abakora imirimo ya litulujiya babaga ari abagororwa bari basanzwe bakora uyu murimo ku buryo buri munsi abiragizaga Imana babaga ari benshi”.

Igice cyahariwe abana kirihariye

Muri 1930 abana bari munsi y’imyaka 18, bafungirwaga ahantu habo hihariye. Bari abana koko! Kuko n’ubu ubona amagambo bandikaga ku nkuta bakoresheje amakara, bagacishamo bakubahuka bakahandika ibitutsi n’ibindi.

Mu yo nabonye ni nk’ayanditswe n’uwitwa Fabrice mu Cyongereza wavuze ati “Twiteguye kuba imfungwa.” Undi we yandika aho yararaga ati “Iyi ni California, Biryogo”.

Birashoboka ko umubare munini w’abari muri iki gice ari abana b’i Nyamirambo kuko usomye ku nkuta, uhasanga amazina y’uduce twaho ku buryo wakeka ko ariho benshi bakomokaga.

Nasekejwe n’ibyanditswe na Hafashimana wagize ati “Ugenzwa na Mambo ntakagere hano.”

Amazi muri iyi gereza ntiyajyaga abura kuko umunsi ku wundi abagororwa babashaga kubona uko bakora isuku. Nabajije Mugisha niba ubwiherero bwayo, butashoboraga kugira umwuka mubi, ambwira ko isuku yabaga iri hejuru.

REBA HANO VIDEO MUGISHA ASOBANURA IBICE BIGIZE 1930

‘Station Umutekano’ ku badohotse

Muri iyi gereza, hari kasho yashyirwagamo abagororwa barenze ku mategeko, igizwe n’uturyango duto turenze 20. Buri kamwe kabaga gafite umuryango gusa.

Mugisha avuga ko muri Station Umutekano hafungirwaga uwakoze amakosa, akaba yamaramo nk’umunsi

Ati “ Uko uzi mu gihugu umuntu bamushyira muri kasho, iyo bamurekuye agasubira mu muryango, natwe iyo turi muri gereza iyo bakujyanye muri kasho, iyo utashye wumva ko ugiye mu rugo. Iyo babaga baguhannye warazaga ukajya muri kasho ukavamo wihannye.”

Muri kasho abagororwa basurwaga na bagenzi babo, ku buryo umwe yavugaga ati ‘umuntu twari duturanye ari muri kasho’ akajya kumusura amushyiriye nk’ifunguro.

Iyi gereza kandi yari ifite ibitaro biha ubutabazi bw’ibanze abarwayi, abarembye bagahabwa inyandiko ‘transfert’ zibohereza mu bitaro byo hanze.

Uwajyaga kwivuza arembye yashoboraga kurara mu bitaro bya gereza, afite n’umurwaza.

Igice cy’abagororwa mpuzamahanga kiruta inzu za benshi mu bwiza

Muri 1930 harimo igice cyafungirwagamo abagororwa mpuzamahanga babaga barazanywe mu Rwanda bavanywe mu bindi bihugu.

Urugero ni nk’urwa Dr Leo Mugesera. Aho yari afungiye, Mugisha asobanura neza ko yajyaga ahajya agiye nko gukora amashanyarazi mu gihe hari ibibazo by’umuriro.

Buri mugororwa muri iki gice, yabaga mu cyumba kinini cya wenyine. Kirimo uburiri bwiza, ameza n’intebe ku buryo agira icyo umuntu yakwita ibiro.

Mu gihe abandi barebaga televiziyo muri rusange we yayirebaga uko ashatse kuko yabaga ayigengaho. Icyo cyumba cyabaga gisa neza, kirimo amakaro, gifite ubwiherero bugezweho, internet, amazi n’ibindi byose nkenerwa.

Usibye igice cyihariye cyabagamo abagore, ibindi byose bigize iyi gereza byubatswe mu myaka yo hambere.

Mu 2017 nibwo abagororwa bose bari muri iyi gereza bimuwe bakajyanwa mu ya Mageragere biyubakiye.

Umuvugizi w’Urwego rw’Igihugu rushinzwe Imfungwa n’Abagororwa, SSP Sengabo Hillary, yatangarije IGIHE ko iyi gereza nshya yajyanywemo abari muri 1930, iri gushyirwaho camera zituma umutekano uba wizeye.

Ati “Ni gereza ifite inkuta ziriho camera, ifite ahantu abarinzi bahagarara ku buryo biborohera kubona umuntu ugerageza gutoroka cyangwa ugerageza gutera gereza. Icyo gihe abarinze baba bahagaze kuri iyo minara, camera zigafasha.”

Yakomeje avuga ko bitewe n’imyaka 1930 yari imaze, ntiyari ikijyanye n’igihe cya none ku buryo abantu bari bayirimo bari benshi ugereranyije n’ubushobozi bwayo.

Igishushanyo mbonera cy’Umujyi wa Kigali, giteganya ko igice kimwe cy’iyahoze ari Gereza ya 1930 kizajya mu mubare w’izindi nyubako zigaragaza amateka nka Kiliziya ya Sainte Famille, urusengero rw’aba- Presbytérienne, Kiliziya ya St Michel, St Etiènne n’Umusigiti wa Alfath.

Gusa ariko hari abashoramari basabye kuhubaka amacumbi yo kubamo.

Ku muntu utarafungiwe muri 1930, nasoza mwifuriza kutazajya n’i Mageragere. Ku wagezeyo nawe, ntazasubireyo n’abari yo mbibifurije kugororoka vuba.

Iyi Gereza yacumbikiye abantu batagira ingano...tuzahora tuyibuka mu mateka
Hari aho amabati yatangiye kuguruka
Ibikoresho bitari bigikenewe, barabisize ubwo bari bagiye kwimukira i Mageragere
Kubera kwimuka, inyubako zatangiye kwangirika ndetse hakagaragara imyanda myinshi yasizwe abagororwa bataye
Uyu mugabo amaze imyaka 20 afunzwe. Mu buzima busanzwe ni umukanishi w'umuhanga. Ni we wita ku modoka zose za gereza
Uyu mudugudu bivugwa ko ariwo Kizito Mihigo yari atuyemo
Hafi aha hari ubwiherero. Ngo bwahoranaga isuku umunsi ku wundi
Iyi ni inyubako yakoreragamo Radio PCK. Mugisha yibuka umunyamakuru witwa Mashyengo wayikoragamo
Ba Sheikh n'aba Imam kimwe n'abandi bayoboke b'idini ya Islam ni aha bakoreraga amasengesho uko ari atanu ku munsi
Ibi bishushanyo ni abagororwa babishyizeho
Aha niho abakirisitu gatolika bumviraga misa
Ku nkuta z'inzu babagamo bari baranditseho amagambo asekeje
Abana bo muri gereza baba bameze nk'abandi... Nshimiye ashobora kuba yaraturukaga i Nyamirambo
Iki ni ikirugo Mugisha na bagenzi be bakoresheje muri Noheli ya 2016...kiri mu myanda yindi iri muri iri tongo
Mugisha asobanura uko ivuriro ryo muri 1930 ryakoraga
Aha ni muri station umutekano...
Aha ni mu mbuga y'abagororwa mpuzamahanga...
Ubwiherero bwari bufite isuku ku kigero cyo hejuru
Mu nzira igana mu byumba by'abagororwa mpuzamahanga habaga hakeye kurusha uku hameze
Aha ni ho abagore bareberaga televiziyo
Iyi ni inzira iganisha mu byumba byafungirwagamo abagororwa mpuzamahanga barimo nka Dr Leo Mugesera
Aha hari harahariwe abagore gusa...
Igice cyafungirwagamo abagore cyubatswe nyuma y'ibindi...cyagaragazaga ubushyashya

Amafoto: Niyonzima Moise
Video: Hassan Umande


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza