‘’Dushishikajwe no gukorera ubuvugizi ababana n’agakoko gatera Sida mu rwego rwo kubarinda ikwirakwizwa ry’ako, no kubafasha kudahezwa no guhabwa akato’’. Ibyo ni ibitangazwa na Furaha Viviane, Uhagariye mu buryo bwemewe n’amategeko Umuryango nyarwanda utegamiye kuri Leta FRSL+/RW ( Femme Rwandaise Zéro Positives dans la lutte contre le SIDA/Rwandan Woman Living with HIV/AIDS in fighting against it), umuryango w’abagore babana n’agakoko gatera SIDA.

Furaha Viviane, ibi yabitangarije IGIHE.com ku cy’umweru, tariki ya 15 Nyakanga 2012, nyuma y’amahugurwa y’iminsi itatu yabereye i Kigali, yagenewe abahagariye amashyirahamwe y’abagore babana n’agakoko gatera SIDA bo mu turere dukorana na FRSL+/RW mu Rwanda.

Viviane avuga ko impamvu nyamukuru ari ukwongera ubushobozi abagore bwo gukorera ubuvugizi abanyamuryango babo mu nzego zitandukanye zaba iza leta cyangwa abaterankunga, uburyo havaho ihezwa no guhabwa akato bibakorerwa muri imwe mu miryango. Ikindi ni uko hagomba kwumva ibibazo abagore bahura nabyo n’uburyo babibonera umuti, ndetse no kubafasha kwikorera igenamigambi mu bikorwa byabo.

Yongeyeho ko abagenerwa bikorwa bibanzeho cyane ari abanyeshuri biga mu bigo bacumbikiwe (interne). Aba bakeneye cyane ubuvugizi mu buryo bwo gufata imiti igabanya ubukana bw’agakoko, bagatinyuka kubibwira abarezi babo kugira ngo baborohereze kuyibona hatabaye ihezwa n’akato ryakorwa n’abagenzi babo, nyamara igihe bitavuzwe bashobora kwanduranya bakora imibonaano mpuzabitsina idakingiye, dore ko akenshi imyaka baba barimo itaborohera kwifata. Ikindi gikorwa n’ugukora ubuvugizi kuri Leta mu rwego rwo kwongera Abaganga ku bigo nderabuzima bita ku babana n’agakoko, kuko byagaragaye ko abakenera serivisi umubare wabo ugenda wiyongera.

Cyurinyana Philomène, Umunyamabanga Nshingwabikorwa wa FRSL+/RW, avuga ko rimwe mu ihohoterwa umugore akorerwa ari iry’umugabo iyo amubuza gukurikira gahunda ya PMTC, ngo amenye uburyo agomba kwifata mu bwandu bwe. Ibi bituma ubwandu bufata indi ntera ndetse n’abana bakaba bavukana agakoko gatera SIDA. Avuga ko umuti nyawo wa mbere ari ubujyanama buhagije, imiti ikunganira.

Mushimiyimana Draphrose, Umuyobozi w’Ishyirahamwe IMPORE ryo mu karere ka Gasabo, avuga ko bamaze gushyiraho itsinda ry’abagore basura abandi mu ngo, babafasha kwiyakira no gutanga ubuhamya kuko bifasha benshi kwumva ko atari intabwa, ahubwo bagakomeza ubuzima bwabo kandi neza.

Avuga kandi ko iri tsinda ry’ubukangurambaga ryegera n’abagabo mu rwego rwo gukemura impaka zavuka hagati y’umuryango haramutse hagaragayemo umwe muri bo ufite ubwandu.

Abagore bahuguwe ku bufatanye na Porogaramu y’Ishami ry’Umuryango w’Abibumbye rirwanya SIDA( United Nations Program on HIV/AIDS) ari nayo yabateye inkunga. Ubumenyi bahawe bazabusangira n’abo bari bahagarariye bo mu mashyirahamwe yabo.