Mu Karere ka Kamonyi, kuwa Kane tariki ya 02 Kanama 2012 hatangijwe ku mugaragaro Itorero ry’Igihugu ku rwego rw’Umudugudu. Ibi birori mu Karere ka Kamonyi bahisemo kubihuza n’umunsi w’umuganura, usanzwe wizihizwa mu muco Nyarwanda mu ntangiriro z’ukwezi kwa Kanama, iyi mihango yombi ikaba yabereye mu Kagari ka Karengera mu Murenge wa Musambira.

Mu ijambo rye Umunyamabanga Nshingwabikorwa w’Umurenge wa Musambira bwana Kayiranga Emmanuel yashimiye Ubuyobozi bw’Akarere, kuba bahisemo kuza gutangiriza uru rwego rw’Intore mu Murenge ayobora.

Yavuze ko kwigisha Abanyarwanda kuba Intore bihereye kuri uru rwego rw’Umudugudu ari ingirakamaro cyane, kuko bizafasha kwimakaza mu buryo bwihuse indangagaciro zibereye Umunyarwanda nyawe. Uyu muyobozi yashimiye abaturage ba Musambira uburyo bitabiriye uyu munsi ndetse no kuba batekereje kwibutsa ibyiza bikubiye mu muco nyarwanda, bagahitamo guhuza Itorero ry’Umudugudu no kuganura ku myaka biyejereje.

Gutangiza Itorero ry’Igihugu ku Mudugudu ni bumwe mu buryo bwo gusagasira ibiri mu mu muco w’Igihugu, no kwibutsa abaturage ibyiza abanyarwanda basangiye. Uwineza Claudine wari uhagarariye ubuyobozi bw’Akarere ka Kamonyi muri uyu muhango, kuri ibi yongeraho ko kubahiriza no gukurikirana inyigisho zikubiye mu Itorero ari bumwe mu buryo bwo guteza imbere umuco wo gukunda igihugu, byo soko y’iterambere nyakuri igihugu cyifuza.

Yasabye abaturage kurushaho kwitabira gahunda z”Itorero bakazigira izabo bityo bakarushaho kugira uruhare mu kwiyubakira igihugu cyane ko gahunda z’Itorero zuzuzanya na gahunda Leta y’u Rwanda igenderaho zigamije guteza imbere Umuryango Nyarwanda.

Mugirasoni Chantal ukurikirana ibikorwa by’Itorero mu Karere ka Kamonyi avuga ko inshingano ya mbere y’abaciye mu Itorero ari ugufasha Abanyarwanda benshi guhinduka, nk’uko babyiyemeje ko bazaba umusemburo w’impinduka n’amajyambere y’Igihugu cyacu.Intore kandi zirasabwa gufasha abaturage muri gahunda z’iterambere no gushaka ibisubizo by’ibibazo byaba bibangamiye abaturage mu iterambere ryabo.

Faustin Ntakirutimana Ushinzwe Itangazamakuru mu Karere ka Kamonyi.