Mugesera Léon ukurikiranyweho ibyaha bya Jenoside ndetse n’umuyobozi w’ishyaka ritaremerwa mu Rwanda rya FDU Inkingi, Ingabire Umuhoza Victoire, baritaba Urukiko rw’Ikirenga nyuma y’ibirego barushyikirije mu manza zabo zahise.

Umuvugizi w’Inkiko, Kaliwabo Charles yabwiye The New Times ati: “Bombi ntibemeranya n’itegeko rigenga imiburanishirize aho basaba ko ingingo zimwe na zimwe baburanishirijweho mu Rukiko Rukuru, zahindurwa.”

Mugesera avuga ko Urukiko rutamuhaye igihe gihagije cyo kwiga idosiye ye. Yumva ko yakongera akajuririra icyo cyemezo cy’Urukiko Rukuru.

Mugesera yoherejwe mu Rwanda muri Mutarama avuye muri Canada nyuma y’igihe kirekire ahangana no kutoherezwa mu Rwanda.

Ashinjwa kuba mu ijambo yavugiye i Kabaya mu 1992 ryuzuyemo gukangurira abantu kwica abandi, byaganishije kuri Jenoside yakorewe Abatutsi mu 1994 hakwicwa abarenga miliyoni.

Ingabire Victoire na we aritaba Urukiko rw’Ikirenga ku byerekeye Itegeko Nshinga aho avuga ko atavuga rumwe na ryo ku bijyanye n’ingengabitekerezo ya jenoside.

Akurikiranyweho gukwirakwiza ingengabitekerezo ya jenoside, aho asaba Urukiko rw’Ikirenga gusobanurirwa itegeko rihana ingengabitekerezo ya jenoside, akanabaza niba rirebana koko na dosiye ye.

Avuga ko Ubunshinjacyaha bwanyuranyije n’itegeko rihana ingengabitekerezo ya jenoside kuva ryatangira gushyirwa mu bikorwa mu 2008, kandi ngo ubwo ntirireba ibyaha byakozwe mu 2007.

Ingabire kandi akurikiranyweho icyaha cy’iterabwoba ndetse n’ivangura rishingiye ku moko.

Biteganyijwe ko Urukiko Rukuru rusoma imyanzuro yarwo kuri uyu wa Gatanu tariki 7 Nzeri.

Muri dosiye ye, Ingabire areganwa n’abandi bane bose bemeye icyaha bakaba barahoze mu mutwe witwaje intwaro wa FDLR aho we na bo bakurikiranyweho kurema umutwe wa girikare wari ufute umugambi wo guhungabanya umudendezo mu Rwanda.

Uyu mutwe wa FDLR ubarizwa muri Congo Kinshasa, ugizwe ahanini n’abasize bagize uruhare muri Jenoside yakorewe Abatutsi mu 1994 yaguyemo abarenga miliyoni.