Kuri ubu Ikigo gishora Imari mu bijyanye n’Ubwubatsi, Ultimate Developers Limited, UDL, gifite isoko ryo kubaka Vision City II cyatangiye kubaka inzu zizafasha kwereka abakiliya uko umudugudu uzaba uteye, izizwi nka model houses.

Vision City II izaba ikubye inshuro eshatu icyiciro cya mbere mu bunini ndetse hari bimwe mu bintu bitashyizwe mu cyiciro cya mbere byibanzweho.

Uyu mudugudu uzaba umeze nk’umujyi kuko uzaba ubonekamo serivisi zose umuntu akenera mu buzima bwe kuva ku ho yivuriza, ishuri, iguriro, aho gukorera siporo kugera ku ho kwidagadurira ndetse n’aho gusohokera.

Vision City II ifite gym iri hanze aho abazaba bayituye bashobora kuzajya bakorera siporo kugira ngo bakomeze kubungabunga ubuzima bwabo.

Uyu mudugudu uzashyirwamo piscines eshatu zizajya zikoreshwa n’abawutuye zirimo n’iyagenewe abana gusa.

Mu korohereza abawutuye kubona aho bahahira, hagenwe meterokare 20.000 zizashyirwaho ibikorwa by’ubucuruzi bitandukanye aho abantu bashobora guhahira biboroheye.

Wanateganyirijwe kubakwamo hoteli, ikiri gukorerwa inyigo, izajya ifasha abawusura kubona aho kuruhukira no kubona serivisi zo ku rwego rwo hejuru.

Vision City II kandi yatekerejweho mu buryo buzatuma ikomeza kubungabunga ibidukikije kuko inzira z’abanyamaguru ndetse n’ahantu hahurira abantu benshi hazashyirwa ibiti n’ibyatsi bijyanye n’icyerekezo cy’Igihugu cyo kubungabunga ibidukikije no kugabanya imyuka yangiza ikirere.

–  Inzu za mbere muri Vision City II zatangiye kubakwa

Umudugudu wa Vision City II watangiye kubakwa haherewe ku nzu zizafatirwaho urugero mu kwereka abakiliya uko zizaba ziteye.

Umudugudu wa Vision City II watangiye kubakwa aho icyiciro cya mbere kizaba kigizwe n’inzu 182, biteganyijwe ko zizuzura mu myaka ibiri. Zizagenda ziyongera bigendanye n’ubusabe bw’abakiliya bazifuza.

Vision City II ifite inzu zishobora kubamo umuntu umwe [32], villas [148], inzu zizwi nka row houses [396] na apartments [893] zifite icyumba kimwe cyangwa bitatu.

Ibi biziyongeraho kandi ubusitani burimo indabo, ibibuga byo gukiniramo imikino itandukanye irimo Basketball na Tennis.

Mu korohereza abazawuturamo kugerwaho na serivisi z’ibanze hazashyirwamo ivuriro ndetse n’ishuri ryisumbuye aho abana bize mu ribanza ryubatswe muri Vision City I bazajya babona aho bakomereza amasomo. Hanatekerejwe kubakwa ikigo cy’umuco aho abawutuye bazatorezwa indangagaciro na kirazira bikwiriye kubaranga.

Iyubakwa ry’Umudugudu wa Vision City ryatangiye mu 2013 ndetse igice cya mbere cy’inzu 504 cyararangiye aho izubatswe zose zaguzwe ndetse kuri ubu zituwemo. Uyu mushinga wose uteganyijwe ko uzasozwa utanze inzu 4500.

Minisiteri y’Ibikorwaremezo igaragaza ko abahembwa nibura miliyoni 1,2 Frw ku kwezi ari bo bashobora kwiyishyurira inzu nta nkunganire bakeneye, ni ukuvuga abangana na 2,7%.

Abagera kuri 46,1% bashobora kwishyurirwa hagiyeho nkunganire mu gihe abahembwa munsi ya 200.000 Frw bagera kuri 50,8% bo badashobora kwiyishyurira inzu ziciriritse ahubwo bakeneye gufashwa gukodesha.

Muri Gahunda y’Igihugu yo kwihutisha Iterambere (NST1), Leta y’u Rwanda imaze kubaka inzu ziciriritse zisaga 2600 mu 6000 yari yiyemeje mu myaka irindwi, nubwo imibare igaragaza ko ijanisha ry’Abanyarwanda bashobora kuzigondera rikiri hasi cyane.

Inyubako za mbere zizaba ziri mu Mudugudu wa Vision City II zatangiye kubakwa

Icyiciro cya mbere cyo kubaka Umudugudu wa Vision City II kizaba kigizwe n’inzu 182

Villas zizubakwa muri uyu mudugudu ni 148

Umudugudu w’Icyitegererezo wa Vision City II ni umwe mu mishinga migari yo gutuza abaturage ahantu hamwe uri gukorwa mu Rwanda

Imiterere ya Row Houses zizubakwa mu Mudugudu wa Vision City II

Imbere muri apartments zizubakwa ni uku hazaba hameze

Uruganiriro rw'imwe mu nzu zizaba ziri muri Vision City

Izi nyubako zizubakwa mu buryo butangiza ibidukikije

Hari inzu zizaba zirimo ibikoresho byose birimo n'ibiryamirwa

Biteganyijwe ko icyiciro cya mbere kizubakwamo inzu 182 kizuzura mu myaka ibiri

Umudugudu wa Vision City II watangiye kubakwa ndetse icyiciro cya mbere kizaba kigizwe n’inzu 182 zubatse mu buryo bugezweho

Uyu mudugudu uteye nk'umujyi ushobora kubonera serivisi zitandukanye

Uyu mudugudu uri kubakwa n'Ikigo Imari mu bijyanye n’Ubwubatsi, Ultimate Developers Limited, UDL

Vision City II yatekerejweho mu buryo buzatuma ikomeza kubungabunga ibidukikije

Icyiciro cya mbere cy'inzu zagenwe nicyuzura hazagenda hubakwa izindi bitewe n'abazishaka

Inzu 32 zigizwe n'icyumba kimwe zizubakwa mu Mudugudu wa Vision City II

Muri uyu mudugudu hazashyirwamo piscines eshatu zirimo n'iyagenewe abana

Uyu mushinga uzubakwa hafi n'ahashyize icyiciro cya mbere cya Vision City

Apartments zizubakwa muri Vision City II zizaba ari 893

Muri Vision City II hazaba harimo inyubako zikorerwamo ubucuruzi n'izitangirwamo serivisi zitandukanye

Row houses ni uku zizaba zimeze nizimara kuzura

Imiterere ya villas zizubakwa muri uyu Mudugudu wa Vision City II

Izi nyubako zizaba zubatswe mu buryo butangiza ibidukikije

Umudugudu wa Vision City II uzaba uteye amabengeza, uzubakwa mu Kagari ka Gacuriro, Umurenge wa Kinyinya mu Karere ka Gasabo

Igishushanyombonera cyerekana uko Vision City II izaba imeze n'aho izahurira n'iya mbere