Uwase Alonga mu rugendo rwo guteza imbere umuco wo gusoma

Yanditswe na Akayezu Jean de Dieu
Kuya 7 Ukuboza 2018 saa 10:30
Yasuwe :
0 0

Umuco wo gusoma ki kimwe mu bintu abanyarwanda bakomeje gukangurirwa, ari nako abanyarwanda bashyira ahagaragara ibitabo bitandukanye, kurusha ko hakomeza kwiganza iby’abanyamahanga.

Uwase Dominique Alonga ni Umuyobozi Mukuru w’Ikigo Imagine We Rwanda, gifasha abanyarwanda gusohora mu bitabo inkuru zabo.

Mu kiganiro yagiranye na IGIHE, yavuze ko yabonye abanyarwanda badakunze gusoma, agahitamo kubyaza umusaruro ayo mahirwe akangurira abantu gusoma no gukunda inkuru zivuga iby’iwabo.

Yagize ati “Ku kintu cy’umuco wo gusoma numvaga nifuza ko abanyarwanda babona ko gusoma atari ibintu byo mu ishuri gusa, Ubutabire, Ibinyabuzima n’ibindi.”

Uwase yananditse igitabo ‘ABC’s of Rwanda’ yafatanyije n’Umunyamerika Kelly Burke. Imagine We Rwanda iheruka no gufasha mu kwandika igitabo ‘My name is Life’ cyasohotse muri Werurwe, kivuga urugendo rwa Karen Bugingo rwo gukira kanseri.

Yavuze ko urubyiruko rw’u Rwanda rufite amahirwe menshi n’uburyo butandukanye bwo kwihangira imirimo, ari nayo mpamvu rudakwiye gukomeza gutegereza uzabaha akazi ahubwo rwafata iya mbere mu guhanga imirimo akaba arirwo ruzatanga akazi.

Yagize ati “Njyewe ntabwo navuga ngo narabyutse mpita ngera kuri ibi n’ibi ariko byose byansabye gufata icyemezo kandi mbona ko ubu bishoboka ko hari urwego rushimishije nzageraho ahazaza hanjie.”

Nyuma yo gutangira gufasha abanyarwanda benshi kwandika ibitabo, Uwase avuga ko bifuza ko umwaka utaha bazatangira gusohora inkuru zo hanze y’u Rwanda ariko zigaruka kuri Afurika gusa.

Uwase n’umushinga we, ari muri ba rwiyemezamirimimo 25 bahatanira kuzahabwa inkunga na Banki ya Kigali muri gahunda yayo ya Urumuri Initiative.

Avuga ko byinshi yungukiyemo cyane birebana n’amahugurwa ku micungire y’ibigo. Ni amahugurwa yatanzwe na Inkomoko Entrepreneur Development.

Ati “Twari dukeneye cyane aya mahugurwa yo kumenya ngo ese batanga imisoro gute, ese bashaka amasoko gute n’uburyo bwiza bwo kwegera abakiriya bacu. Burya ni ibintu abakiri bato mu bucuruzi tutajya tumenya. Rero kuba baraduhuje n’abafite ubunararibonye bakatwigisha, ni ibintu twishimira kandi bizadufasha.”

“Batwigishije ibintu byinshi twahindura, uburyo twajya tumenya ngo twasohoye ibi, twinjije ibi mbese navuga ko batwigishije uburyo bwo gukora kinyamwuga.”

Nibura Imagine We Rwanda, buri kwezi icuruza ibitabo 500, ku buryo nko muri uyu mwaka bari bihaye intego yo gucuruza ibitabo ibihumbi bitandatu.

Imaze kugira abafatanyabikorwa barimo inzibutso za Jenoside, ikibuga cy’indege n’abandi.

Nkusi we akataje mu bugeni

Nkusi Kibamba Patient washinze Ikigo Kaya Africa ltd gikora ibijyanye n’ubugeni, ibikoresho byo mu nzu n’ubuhanzi, ahamya iyo umuntu yamaze gufata icyemezo cyo gukora ibyo akunda nta kabuza agera ku nzozi ze.

Ni ibintu yatangiye akiri muto aho yakundaga gushushanya, ageze mu mashuri yisumbuye arushaho gukora ibishushanyo binogeye ijisho, aza gusaba abo mu muryango we kubyiga mu Buhinde, aho yize ‘Interior Design’.

Akazi ko gushushanya agafatanya no gukora intebe n’ibindi bikoresho bijyanye n’imitako. Yabitangiye akorera abandi ariko kuri ubu afite ikigo cye bwite agiye kumara umwaka ashinze.

Mu kiganiro yagiranye na IGIHE, Nkusi yavuze ko muri Gashyantare uyu mwaka aribwo yatangiye kwikorera, ariko ubu abona impinduka zidasanzwe. Agira inama urubyiruko guhitamo inzira yo kwikorera aho gutegereza abazabaha akazi.

Ati “Ikintu nabwira urubyiruko ni uko n’ubwo gutangira bigora ariko icyo nabagiraho nk’inama ni ukwigirira icyizere, ukamenya umuntu ugiye kwegera niba ari ubufasha ugiye kumusaba ukamenya inzira ubinyuzamo.”

Uyu munsi akoresha abakozi babiri bahoraho barimo umushakira amasoko, we agakora ibijyanye n’imitako n’ubugeni. Abikorera i Nyamirambo mu Mujyi wa Kigali ariko afite abandi bakozi bamukorera mu Gakiriro.

Avuga ko mu myaka itanu iri imbere azaba ageze ku rwego rwo hejuru, afite inzu ikomeye mu bijyanye n’ubugeni no gukora ibishushanyo mbonera, muri karere ka Afurika y’Uburasirazuba.

Ibi abishingira ku rwego amaze kugeraho n’amahugurwa yahawe.

Yagize ati “Bagiye batwigisha kubara uhereye ku tuntu duto, ukamenya niba aya ariyo mafaranga wasohoye ukamenya niba ahwanye n’ayo winjije ndetse n’ayo wungutse ukayamenya, ikindi kandi badufashije ni ukumenya ngo mu myaka ibiri iri imbere ikigo cyawe kizaba kigeze he?”

Nk’umwe mu bahatanira inguzanyo ya Banki ya Kigali muri gahunda ‘Urumuri’, avuga ko ayibonye yamufasha cyane.

Ati “Nkanjye imbogamizi mfite ni ahantu ho gukorera kuko n’ubu tuba turi gukora ariko ntabwo biba byoroshye, ariko nagaragaje ko ndamutse mbonye ayo mahirwe nafungura inzu yo gukoreramo nkagerageza no kwagura imikorere y’ikigo.”

Uwase Dominique Alonga washinze Imagine We Rwanda afite intego yo gushishikariza abanyarwanda umuco wo gusoma
Ubwo Uwase Dominique Alonga yitabiraga imurikwa ry'igitabo My name is Life

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza