Urwibutso Mugabo Pie wigeze kuba Minisitiri yasigiye abo babanye

Yanditswe na Evariste Nsengimana
Kuya 13 Mutarama 2020 saa 10:49
Yasuwe :
0 0

Ku mugoroba wo ku wa 12 Mutarama 2020 nibwo inkuru y’incamugongo y’urupfu rwa Mugabo Pie wigeze kuba Minisitiri w’Imibereho myiza y’Abaturage muri Guverinoma ya mbere y’Ubumwe, yamenyekanye.

Uyu mugabo yaguye mu Bitaro byitiriwe Umwami Faisal, aho yari amaze igihe arwariye.

Mugabo wavutse ku wa 17 Mutarama 1952, yapfuye abura iminsi itanu gusa ngo yuzuze imyaka 68. Yavukiye mu Ntara y’Amajyepfo mu Karere ka Nyanza.

Amashuri abanza yayigiye mu Murenge wa Nyamiyaga muri Nyanza, akomereza mu Iseminari Nto y’i Save mu Karere ka Gisagara.

Mugabo yanize mu Rwunge rw’Amashuri rwa Kansi rwitiriwe Mutagatifu François d’Assise no muri Koleji Christ Roi y’i Nyanza hagati yo mu 1966 no mu 1972.

Mu 1978 yabonye Impamyabumenyi mu by’Amategeko yakuye muri Kaminuza Nkuru y’u Rwanda.

Mu 1982 yabonye amahugurwa akomeye mu bijyanye n’itegeko ry’imisoro yakoreye i Khartoum muri Sudani n’ayandi yagiye akorera mu bihugu bitandukanye.

Yakoze imirimo itandukanye irimo kwigisha mu kigo cy’amashuri cyo mu Karere ka Kamonyi, yakoze muri Banki y’Abaturage y’u Rwanda mbere y’uko atangira gukora mu rwego rw’ubutabera.

Mugabo yabaye Intumwa Nkuru n’Umujyanama mu Rukiko Rukuru rwa Guverinoma mbere y’uko ahabwa inshingano mu Kigo gishinzwe Amahugurwa n’Ubushakashatsi mu by’Amakoperative ‘Centre de Formation et de Recherches Coopératives – IWACU’ nk’umujyanama mu by’amategeko.

Uyu mugabo kandi yabaye Intumwa Nkuru ya Leta y’u Rwanda mbere y’uko agirwa Minisitiri w’Imibereho myiza y’Abaturage muri Guverinoma ya mbere y’Ubumwe hagati yo mu 1994 no mu 1997.

Mugabo yabaye kandi Umuyobozi Mukuru w’Uruganda rwatunganyaga itabi rwa Tabarwanda mbere y’uko agirwa Umunyamabanga Mukuru w’Urukiko rw’Ikirenga. Yabaye kandi Perezida w’Urukiko rukuru Ishami rya Nyanza mbere y’uko agirwa Umucamanza mu Rukiko rw’Ikirenga.

Uyu mugabo wari inzobere mu mategeko yanabaye Perezida w’Urukiko Rukuru. Mbere y’uko yitaba Imana, yari asanzwe atanga serivisi zitandukanye mu bijyanye n’amategeko.

Mu 2017, Mugabo ari mu bacamanza bahawe umudali w’ishimwe kubera uruhare rwe mu mitangire ya serivisi inoze mu rwego rw’ubutabera mu Rwanda.

Perezida w’Urukiko rw’Ikirenga, Dr Faustin Nteziryayo, yanditse kuri Twitter ko u Rwanda rwabuze umuntu w’ingirakamaro, wagejeje kuri byinshi urwego rw’ubutabera cyane nyuma ya Jenoside yakorewe Abatutsi.

Yagize ati “Tubabajwe no gutangaza urupfu rwa Mugabo Pie wabaye umucamanza. Mu izina ry’Urukiko rw’Ikirenga, Inama Nkuru y’Ubucamanza no mu izina ryanjye, ndashaka kwihanganisha umuryango we. Roho ye iruhukire mu mahoro iteka.”

Umukobwa wa Mugabo witwa Sonia Mugabo yanditse kuri Twitter avuga ko yashenguwe no kubura umuntu ukomeye yari afite.

Uyu munyamideli ufite izina rikomeye mu Rwanda yafashe ifoto ari kumwe n’umubyeyi we, ayiherekesha amagambo agira ati “Uwanjye wenyine. Ndagukunda papa. Uruhukire mu mahoro.’’

Mutangana Jean Bosco wari Umushinjacyaha Mukuru yasabiye Mugabo Pie kuruhukira mu mahoro, anamushimira ubwitange n’umurava yagaragaje igihe yari Perezida w’Urukiko Rukuru.

Ati “Umurage wawe wo gukunda umurimo wafashije mu kubaka umusingi w’ubucamanza. Turasaba Imana ngo ikomeza umuryango wawe.”

Umunyamabanga Mukuru wungirije w’Urwego rw’Ubugenzacyaha (RIB), Kalihangabo Isabelle, yagize ati “Umucamanza Pie Mugabo tuzahora tumwibukira ku rugwiro rwe, urukundo n’impuhwe byamurangaga, ndetse no kubonera umwanya umukeneye wese. Imana iguhe iruhuko ridashira. Umurage wawe uzahoraho iteka. Umuryango we, ubushinjacyaha bw’u Rwanda n’Ihuriro ry’abavoka mukomere.”

Mugabo ni we wabaye Perezida wa mbere w’Ishyaka rya PL nyuma ya Jenoside, ryanagize uruhare mu kwitandukanya no kurwanya Politiki y’ivangura n’amacakubiri yabibwe mu Banyarwanda ku ngoma ya Habyarimana Juvénal ubwo yari Perezida.

Mugabo Pie wigeze kuba Minisitiri yitabye Imana azize uburwayi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .