Urukundo rwo mu zabukuru! Batangabo yasezeranye n’umukecuru bamaranye imyaka isaga 35

Yanditswe na N.Kubwimana Janvière
Kuya 6 Ukuboza 2019 saa 11:11
Yasuwe :
0 0

Batangabo Erasto wo mu Karere ka Nyabihu mu Murenge wa Jenda yemeye kwitandukanya n’icyo yitaga ubusiribateri asezerana n’umukecuru we bamaranye imyaka 40 babana nk’umugabo n’umugore.

Uyu musaza w’imyaka 70 yashakanye na Mujawamariya w’imyaka 67 ariko ntibasezerana imbere y’amategeko ya Repubulika y’u Rwanda.

Mu buhamya bwe avuga ko yafashe icyemezo cyo gusezerana n’umukecuru we mu buryo bwemewe n’amategeko ashaka guca ukubiri n’amakimbirane yo mu muryango no kongera icyizere mu mubano wabo kuko ngo babanaga batizerana neza.

Batangabo ashimangira ko kuba bari bamaranye igihe kirekire badasezeranye byari urugero rubi ku bana babo, ndetse byanatumaga babana nk’abacengana

Ati “Mu myaka 38 maranye n’umukecuru wanjye tutabana byemewe n’amategeko byatumaga tutabana neza, hakabaho kutumvikana ku mitungo dufite n’uburyo bwo kuyikoresha, ugasanga ntitubwizanya ukuri mu byo dutunze.”

“Ubu ubwo tumaze gusezerana abaye uwanjye nanjye mbaye uwe. Ubundi nari nkiri nka siribateri kuko ntitwari tuzwi mu mategeko, nyuma twaje kwigishwa batubwira ibyiza byo kubana dusezeranye, none twabikoze kandi tubaye nk’abarushinze bundi bushya.”

Batangabo yakomeje avuga ko kubana n’umugore we batarasezeranye byaterwaga n’ubujiji no kumva ko umugore wiyandikishijeho mu mategeko yigira nab.

Ati “Numvaga umugore yandushya dusezeranye. Nemeye gusezerana ngo ntange urugero rwiza ku bana banjye.’’

Nyirabakosi Mujawamariya yavuze ko yishimiye gusezerana byemewe n’amategeko kuko yabanaga n’umugabo afite impungenge zo gusendwa.

Yakomeje ati “Ubundi umugore ubana n’umugabo batasezeranye ku buryo bwemewe n’amategeko, nta cyizere aba yifitiye isaha n’isaha wakumva yakwirukanye. Nanjye ubu dusezeranye ni bwo numva ntangiye ubuzima bw’urugo rwanjye ntuje. Nahoraga muri nta wamenya mbika ku ruhande ngo nibihinduka nzabe nizigamiye, ariko ubu ndatuje cyane.”

Umukozi muri ADRA Rwanda ushinzwe Umuryango n’Ubwuzuzanye, Nkundimfura Rosette, yavuze ko habayeho kwigisha imiryango ibana mu buryo butemewe n’amategeko bagamije gukuraho urwikekwe n’amakimbirane hagati y’abashakanye.

Ibi byatumye abagera kuri 78 bo mu Murenge wa Murenge wa Jenda na 40 mu Murenge wa Karago yo mu Karere ka Nyabihu aho basezeranyirijwe.

Umuyobozi w’Akarere ka Nyabihu, Mukandayisenga Antoinette, yavuze ko kuba hari abafata umwanzuro wo gusezerana bageze mu za bukuru ari urugero rwiza mu kurwanya amakimbirane mu muryango.

Ati “Hari abantu benshi dusezeranya bageze mu za bukuru mu kigero cy’imyaka irenze 50, ni nabo rugero rwiza ku bakiri bato bagomba kumenya ko gusezerana ari ryo pfundo ryonyine ryo kurwanya amakimbirane yo mu miryango. Turacyakomeza kwigisha abatarasezerana kandi bizatanga umusaruro mwiza.”

Mu Mirenge ya Jenda na Karago hamaze gusezerana imiryango yari imaze igihe kinini ibana mu buryo butemewe n’amategeko, igera ku 118 yigishijwe n’Umuryango ADRA Rwanda ufatanije n’Akarere ka Nyabihu.

Iki gikorwa kizakomereza mu yindi mirenge itandukanye muri Nyabihu aho hatahiwe isaga 1000 itarasezerana igikomeje kwigishwa. Iki gikorwa kizakomereza mu Mirenge ya Kintobo na Bigogwe.

Batangabo Erasto yavuye mu cyo yitaga ubusiribateri asezerana afite imyaka 70
Mujawamariya wemeye gusezerana n'umusaza we avuga ko aribwo akiyumva nk'umugore mu rugo rwe
Ababanaga mu buryo butemewe n'amategeko bemeye gusezerana bakuze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .