Urukiko rwatesheje agaciro ibyavuzwe kuri Guverineri Bosenibamwe

Yanditswe na Claude
Kuya 16 Werurwe 2015 saa 01:12
Yasuwe :
0 0

Urukiko rukuru, urugereko rwa Musanze rwatesheje agaciro ibyigeze kuvugwa ko Guverineri Bosenibamwe Aimé ko ari we wakoresheje abantu mu guteza umutekano muke mu Ntara y’Amajyarugu.

Ibi byari byatangajwe na bamwe mu bafashwe kuri ubu bamaze guhamwa n’ibyaha birimo ubwicanyi no gukorana n’umutwe wa FDLR.

Mu iburanisha ry’urubanza rw’abantu 14 bari bakurikiranweho ibyaha byo "Gukorana na FDLR, Ubugambanyi bagamije kugirira nabi ubutegetsi buriho mu Rwanda, Kwinjiza intwaro mu gihugu, ubwicanyi no gukomeretsa ku bushake” ryabereye muri Sitade Ubworoherane y’Akarere ka Musanze ku wa 11 Ukuboza 2015 nibwo Nsengiyumva Jotham witiriwe urwo rubanza yabwiye ubushinjacyaha ko ibyo yakoze byose yabitumwaga kandi bikanaterwa inkunda na Guverineri Bosenibamwe.

Icyo gihe Nsengiyumva yemereye ubushinjacyaha ko ari umusirikare w’umutwe urwanya Leta y’u Rwanda wa FDLR. Uyu yabwiye urukiko ko yaje mu Rwanda mu bikorwa by’ubutasi no gushaka abasore bakiri bato bo kwinjiza muri uwo mutwe ariko ngo aza kugwa mu mutego wo gukoreshwa na bamwe mu bayobozi bo mu Rwanda mu nyungu zabo bwite.

Abisabwe n’ubushinjacya kugaragaza abo bayobozi,mu buryo bweruye Nsengiyumva Jotham yashimangiye ko yakoreshejwe na Bosenibamwe Aimé na Nsengimana Alfred wari Umunyamabanga Nshingwabikorwa w’Umurenge wa Cyuve ho mu Karere ka Musanze.

Urukiko rwatesheje agaciro ibyavuzwe na Nsengiyumva

Ubwo bariya bantu 14 bakatirwaga mu ruhame muri sitade ubworoherane kuwa kane tariki ya 12 Werurwe 2015, urukiko rukuru urugereko rwa Musanze ruyobowe na Kayisire Jean Pierre, rwashimangiye ko rutesheje agaciro byinshi mu byavuzwe na Nsengiyumva Jotham harimo n’uruhare rw’abayobozi yatunze urutoki mu maburanisha yari yarabanje.

Impamvu nyamukuru yateye iryo teshwagaciro ngo ni uko Nsengiyumva yananiwe guhuza ibyo yavugiye mu rukiko n’ibyo yabanje kubwira ubugenzacyaha.

Nk’uko byumvikanye mu myanzuro yasomwaga n’abacamanza, ngo Nsengiyumva agifatwa yabwiye ubugenzacyaha ko yavuye mashyamba ya Kongo aje mu Rwanda mu bikorwa by’ubutasi bwa FDLR no gushakisha abayoboke bashya b’uwo mutwe bakiri abasore kubera ko ngo uwo mutwe witeguraga gutera u Rwanda.

Mu isomwa ry’imyanzuro y’urubanza, umushinjacyaha yagize ati "Urukiko rurasanga iyi myiregurire ye [Nsengiyumva] inyuranye n’ibyo yavugiye imbere y’ubugenzacyaha n’ubushinjacyaha, kuko hari aho yivugiye ko yari yahawe mission na FDLR yo gushakisha abasore bakiri bato bafite imbaraga kuko ngo yariho [FDLR] yitegura gutera u Rwanda”

Iki ngo "Yavuze ko yatumwe gutera geranade mu Rwanda mu rwego rwo guhungabanya umutekano no gushaka kwangisha abaturage ubuyobozi, yanavuze ko yarashe IP Clement Mucyurabuhoro atabigambire ko yari ahubwo agambiriye kwica Antoinette Umuraza (uyu nawe ni umuplisi). Yavuze ko yarashe kwa meya kuko ngo ari misiyo yo kwica abayobozi yari yarahawe na Col Ruhunda [umusirikare wa FDLR wari waramutumye]”

Urukiko rudendeye kuri izo ngingo rwanzuye ko nta bimenyetso bihari bifatika bigaragaza koko uruhare rw’abayobozi bavuzwe na Nsengiyumva mu byaha byakozwe maze rumukatira igihano gisumba ibindi mu Rwanda cyo gufungwa burundu.

Icyo polisi ivuga

Polisi y’igihugu hari hashize iminsi itangaje ko yatangije iperereza ryimbitse kubyashinjwe Guverineri Bosenibamwe aho ngo yayitabye akagira ibyo asobanura.

Mu kiganiro CSP Twahirwa Celestin, umuvugizi wa polisi y’igihugu, yagiranye n’iki kinyamakuru ku wa 14 Werurwe 2015, yavuze ko nyuma y’iperereza ryakozwe na polisi ku bufatanye n’urukiko ibyo rwatangaje aribyo bigomba guhabwa agaciro.

Ati "Ibintu byose bikorwa hakoreshejwe inkiko nizo zifata umwanzuro wa nyuma, nibwira ko uruhande rukomeye ari urwo rw’urukiko, urukiko ruba rufite ibyo rwashingiyeho kandi ntahandi bituruka ni mu iperereza, icyo wafata ni uruhande rw’urukiko…”

CSP akomeza avuga ko "Mbere y’uko urukiko rufata icyemezo ruba rwarabanje kubona ibyo byose byakozwe n’abagenzacyaha bakabona kubishyikiza abashinjacyaha nta kuntu rero bari kujya kubitesha agaciro batarabona ibyavuye mu iperereza, icyiza cyafatwa ni umwanzuro w’urukiko”

Guverineri Bosenibamwe Aimé kuva yashyirwa mu majwi ashinjwa gukorana bya hafi na FDLR, ntiyahwemwe kubyamaganira kure agaragaza ko abeshyerwa.

Mu kiganiro yahaye iki kinyamakuru ubwo inkuru yari imaze kuba kimomo ko yateye inkunga ibikorwa bya FDLR, yashimangiye ko "Biriya babyita gukoreshwa mu migambi mibi (negative manipulation), bariya bantu barakoreshwa kandi ntabwo bizambuza gukomeza guteza imbere Intara y’Amajyaruguru ndetse no gushaka umutekano”

Izuba Rirahse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza