Urukiko rwategetse ko Rwamuganza n’abo bareganwa guhombya leta miliyari 2 Frw bakomeza gufungwa

Yanditswe na IGIHE
Kuya 9 Ukwakira 2020 saa 03:25
Yasuwe :
0 0

Urukiko Rwisumbuye rwa Gasabo rwanze kurekura by’agateganyo abantu batandatu barimo Caleb Rwamuganza wahoze ari Umunyamabanga Uhoraho muri Minisiteri y’Imari n’Igenamigambi, Christian Rwakunda wari Umunyamabanga Uhoraho muri Minisiteri y’Ibikorwa Remezo na Serubibi Eric wahoze ayoboye Ikigo cy’Igihugu gishinzwe Imyubakire (RHA), baregwa guhombya leta asaga miliyari 2 Frw.

Bareganwa kandi na Kabera Godfrey wari ushinzwe igenamigambi muri Minisiteri y’Imari n’Igenamigambi na Rusizana Aloys, Umushoramari wagurishije inzu na Leta ari nayo ntandaro y’ibyaha bashinjwa, hamwe na Munyabugingo Bonaventure wari umugenagaciro.

Ubushinjacyaha bubarega guhombya leta ubwo hagurwaga inzu yishyuwe 9 850 000 000 Frw nyamara umugenagaciro yari yagaragaje ko ikwiriye kugurwa atarenze 7 600 000 000 Frw.

Mu iburanisha ryo kuri uyu wa Gatanu, urukiko rwatangaje umwanzuro ku nzitizi abaregwa bashingiyeho bajurira basaba kuburana bari hanze, hagenda hasuzumwa impamvu buri umwe yatanze ziherekezwa n’ingwate.

Umucamanza yahereye ku munyemari Rusizana wagurishije Leta inzu yateje ibibazo, abunganizi be babwiye urukiko ko arwaye ko kandi akeneye Umuganga umwitaho, ariko ngo kuva yagera muri gereza atarabonana n’umuganga.

Umucamanza yatesheje agaciro impamvu yatanze, avuga ko batigeze bagaragaza ko yasabye kujya kwivuza akabyangirwa, bityo iyo mpamvu ntiyemerwa. Ku bijyanye n’ingwate yatanze, umucamanza yavuze ko itahabwa agaciro bijyanye n’uburemere bw’icyaha aregwa.

Umucamanza kandi yatesheje agaciro impamvu zatanzwe na Rwakunda, Serubibi, Kabera, Rwamuganza na Munyabugingo, ategeka ko bakomeza gufungwa, bagategereza iburanisha ry’urubanza mu mizi.

Umucamanza yanzuye ko bagomba kuburana bafunzwe, urubanza mu mizi rukazatangira ku wa 13 Ugushyingo 2020.

Urubanza rumaze iminsi ruba mu buryo bw'ikoranabuhanga. Inteko Iburanisha iba iri i Rusororo ku cyicaro cy'urukiko mu gihe abaregwa baburana bari muri gereza ya Nyarugenge i Mageragere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .