00:00:00 IGIHE NETWORK KN KINYARWANDA EN ENGLISH FR FRANCAIS

Urujijo ku mpamvu zituma Gatsibo idahirwa n’abakozi bacunga ifaranga

Yanditswe na

Remesha Jr

Kuya 31 Ukwakira 2014 saa 06:54
Yasuwe :

Ruboneza Ambroise afite ikibazo kimukomereye cyo kudahirwa n’abakora mu ishami ry’icungamari mu karere, bahindagurika buri mwaka bigatuma ahora ku nkeke zo gusabwa ibisobanuro byo gukoresha nabi umutungo wa leta.
Ubwo yitabaga komisiyo y’Inteko Ishinga Amategeko ishinzwe gukurikirana imikoreshereze y’umutungo wa rubanda (PAC), Ruboneza yitakanye abakozi be bashinzwe imari, avuga ko bafite ‘agatsiko’ gakora nabi bikamushyira mu ngorane.
Raporo y’Umugenzuzi Mukuru w’imari ya leta ya 2012/2013 (...)

Ruboneza Ambroise afite ikibazo kimukomereye cyo kudahirwa n’abakora mu ishami ry’icungamari mu karere, bahindagurika buri mwaka bigatuma ahora ku nkeke zo gusabwa ibisobanuro byo gukoresha nabi umutungo wa leta.

Ubwo yitabaga komisiyo y’Inteko Ishinga Amategeko ishinzwe gukurikirana imikoreshereze y’umutungo wa rubanda (PAC), Ruboneza yitakanye abakozi be bashinzwe imari, avuga ko bafite ‘agatsiko’ gakora nabi bikamushyira mu ngorane.

Raporo y’Umugenzuzi Mukuru w’imari ya leta ya 2012/2013 yamushinje amakosa 13 akomeye; we yavuze ko yose ashingiye ku mikorere y’ishami ry’imari cyane cyane umuyobozi ushinzwe abakozi n’imari ndetse na kontabure.

“Twagize DAF [….]aho kugira ngo akore akajya atunaniza gusa nta kindi, akarema udutsiko mu bakozi tudakora, ugasanga kontabure [..] mbese bisa nk’aho akora nk’umucancuro.”

Ambroise Ruboneza, Meya wa Gatsibo mu bibazo aterwa n'abacungamutungo babi

Meya Ruboneza yahishuriye PAC ko yanyuzwe n’uko bamwe mu bakozi bari izingiro ryo gukoresha nabi ibya rubanda mu karere ayobora birukanwe, ndetse na kontabure wari warazengereje akarere hashize igihe gito yeguye.

Ati “Twagize Imana n’uwitwa kontabure nawe ejo bundi aragenda yari amaze kwica ibintu byinshi cyane.”

Abadepite bagaragaje ko batanyuzwe n’impamvu uyu muyobozi yatanze ituma Gatsibo ihora mu turere dukoresha nabi umutungo wa leta, na cyane ko umukozi washyizwe mu majwi cyane yahakoze umwaka umwe rukumbi.

Depite Kankera Marie Josee yaramubajije ati “Nonese ko ubushize mwari hano, n’uyu mwaka mwagarutse, uwo mukozi n’ubundi mwari mumufite mu ishami ry’imari cyangwa abo muzana bose baba bafite ikibazo kimwe?.”

Umuyobozi w’Akarere ka Gatsibo yabwiye inteko ko mu myaka itatu ishize bamaze guhindura ba kontabure inshuro eshatu, ikibazo cyateye impungenge abadepite bibaza igituma abakozi bahunga akazi abandi bakakirukanwaho.

Depite Nkusi Juvenal uyobora PAC yakemanze aka karere kuba gafata nabi abakozi, bikaba byaba intandaro yo kubananiza bakigendera.

Yabajije ati “bahahungira iki? Erega nacyo ni ikibazo?”

Umuyobozi w’akarere yavuze ko abenshi mu bakozi babacika bajya gushaka akazi mu turere babonamo inyungu nyinshi, na cyane ko ngo ibyo umukozi abona bishingira ku mikoro y’akarere bakorera.

Depite Niyonsenga Theodomir we yagaragaje ko aka karere gashobora kuba gafite ikibazo gikomeye cyane mu buyobozi, cyane mu ishami rijyanye n’amafaranga aho abakozi baza basangamo ibibazo bikabananiza bagahitamo kureka akazi bakigendera.

Meya yatinye imanza, arebera umukozi uhombya leta…..

Ubwo Meya Ruboneza Ambroise yabwiraga abadepite ko yishimiye ko kontabure yeguye baratangaye, bibaza impamvu ituma ataramwirukanaga kandi abona yica akazi nkana.

Ruboneza yasobanuye neza ko hari amategeko akurikizwa ngo umukozi yirukanwe mu kazi, avuga ko kutirukana abica akazi biterwa no kwanga kwica amategeko.

Depite Nkusi yagize ati “Mwagize Imana aragenda? [yabyicaga] ubireba? Ntiwahitamo kuregwa aho kugira ngo ibintu bipfe…wareka ibintu bigapfa aho kugira ngo utinye kujya mu rukiko!”

Depite Nkusi yongeyeho ko nta rukiko rwo mu Rwanda rwahanira umuyobozi ko yirukanye umukozi wangiza ibya leta ku buryo bugaragara.

Akarere ka Gatsibo ni kamwe mu dukunze kuvugwamo ibibazo hagati y’abayobozi, kakaba karaherutse utundi mu kwesa imihigo basinyiye imbere y’umukuru w’igihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .