Uruhare rwa Croix-Rouge y’u Rwanda mu guhangana n’ingaruka za COVID-19

Yanditswe na Ndahayo Emmanuel
Kuya 27 Kanama 2020 saa 04:57
Yasuwe :
0 0

Kuva icyorezo cya COVID-19 cyagera mu Rwanda, Leta n’abafatanyabikorwa bayo bahagurukiye gufasha abaturage bagizweho ingaruka n’ingamba zari zigamije kurinda ikwirakwira ryacyo, zirimo gahunda ya guma mu rugo yahagaritse ibikorwa bya benshi.

Nyuma y’uko u Rwanda rufashe icyemezo gikomeye cyo guhagarika ibikorwa hafi ya byose mu rwego rwo guhangana na COVID-19, igice kinini cy’abaturage cyagizweho ingaruka kuko abenshi babuze imirimo yabo, mu gihe na benshi mu bakomeje gukora bitari ku rwego rwiza nka mbere.

Umuryango utabara imbabare, Croix-Rouge y’u Rwanda, ufatanyije n’izindi nzego nka Minisiteri y’Ubuzima, wafashe iya mbere mu rwego rwo gukomeza kurengera ubuzima bw’abanyarwanda bwari bugeramiwe.

Croix-Rouge y’u Rwanda yakoze ibikorwa bitandukanye, birimo gutanga ubufasha bw’amafaranga ku bahungabanyijwe na COVID-19, ubukangurambaga bugamije kwigisha abaturage ndetse no gutanga ubufasha nkenerwa bwihutirwa, nk’uko bisanzwe biri mu nshingano nyamukuru zayo.

Ubukangurambaga

Ubukangurambaga bwa Croix-Rouge bwatanzwe n’abakozi n’abakorerabushake bayo, mu turere 30 tw’igihugu, bwibanda ku butumwa bwo kwirinda COVID-19 hashingiwe ku bimenyetso byayo, ibikorwa biyikwirakwiza n’uburyo yakwirindwa.

Hirya no hino, Croix-Rouge y’u Rwanda yashyize ibyapa mu masoko, itambutsa ubutumwa kuri radio ndetse hanatambutswa ubutumwa bunyuze mu ndirimbo, mu rwego rwo kubugeza ku byiciro byose by’abaturarwanda.

Itangwa ry’ibiribwa n’ibindi bikoresho nkenerwa

Ubwo ingamba za guma mu rugo zatangiraga, imiryango myinshi yabuze amikoro ayibashisha kugura amafunguro ku buryo hari impungenge ko inzara izica abantu.

Usibye amafunguro, ibindi nkenerwa nk’ibikoresho by’isuku n’amazi meza na byo by’ingenzi cyane mu kurwanya COVID-19, byarushijeho kuba bicye, kuko umutungo abaturage bakoresha babihaha wagabanutse cyane.

Croix-rouge y'u Rwanda yatanze ibiribwa byafashije abakeneshejwe na Coronavirus

Ni muri urwo rwego Croix-rouge Rwanda, ku bufatanye n’indi miryango nk’Umuryango Mpuzamahanga wa Croix-Rouge, ICRC, urugaga rw’Imiryango ya Croix-Rouge ku isi (IFRC), n’Imiryango ya Croix-Rouge y’ibihugu nk’u Buyapani, u Bubiligi, Espagne na Autrachie, yafashe iya mbere mu kugeza ubufasha ku miryango yagizweho ingaruka zikakaye na COVID-19.

Imiryango 13 000 yo mu turere twa Rusizi, Rubavu, Karongi, Nyabihu, Ngororero, Nyarugenge, Bugesera, Nyamasheke, Kirehe, Gasabo, Rutsiro, Kamonyi, Muhanga, Nyagatare, Huye na Rwamagana yahawe ubufasha na Croix-Rouge y’u Rwanda, muri gahunda yo gufasha imiryango yagizweho ingaruka na COVID-19.

Ibi bikorwa byo gufasha iyi miryango byatwaye miliyoni 375 Frw, yahawe aba baturage hifashishijwe ikoranabuhanga rya ‘Cash Transfer Program (CTP)’.

Usibye ubufasha bw’ibiribwa, iyi miryango yanahawe ubufasha bw’amafaranga ndetse n’ibindi byangombwa nkenerwa.

Ubu bufasha bwagobotse imiryango yagizweho ingaruka na COVID-19 mu turere nka Rusizi, aho uburobyi n’ubucuruzi bwambukiranya imipaka bwahagaze, bigatuma amagana y’abaturage babura amikoro.

Ubufasha bw’amafaranga

Icyorezo cya COVID-19 nticyahagaritse ibindi biza byari bisanzweho, ku buryo kubyirinda byose hamwe bisaba imbaraga nyinshi.

Byongeye kandi, icyorezo cya COVID-19 cyagize ingaruka ku buryo bwari busanzwe bwo kwitegura ibindi biza, ku buryo mu gihe byatera, bishobora kugira ingaruka zifite ubukana burushijeho.

Croix-Rouge y’u Rwanda yafashishije abahuye n’ibiza bababaye kurusha abandi, barimo abageze mu za bukuru, imiryango iyobowe n’abagore, imiryango y’abarwaye indwara zikomeye ndetse n’imiryango igizwe n’abantu benshi. Aba bose kandi bagombaga kuba batarigeze bahabwa ubundi bufasha.

Muri rusange, imiryango 2645 yahawe ubufasha na Croix-Rouge y’u Rwanda bwa miliyoni 210 Frw. Imiryango yafashijwe iherereye mu turere twa Gisagara, Ngororero, Rusizi, Nyagatare, Ngoma, Ruhango na Rulindo.

Aya mafaranga yose yatanzwe hifashishijwe ikoranabuhanga ryo kohererezanya amafaranga kuri telefoni, muri gahunda ya Croix-rouge Rwanda yo gufasha abababaye bahabwa amafaranga bakihitiramo ibyo bakeneye ndetse no kwirinda ikwirakwira ry’icyorezo cya Coronavirus.

Inkunga y'ibiribwa yatanzwe na Croix-rouge y'u Rwanda yageze mu gihugu hose
Mu bikorwa byo gufasha abaturage, hubahirizwaga amabwiriza yo kwirinda Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .