00:00:00 IGIHE NETWORK KN KINYARWANDA EN ENGLISH FR FRANCAIS

Uruganda rwa Kinazi rwasabye urubyiruko kwigira ku mateka rugendera kure amacakubiri

Yanditswe na Akimana Jean de Dieu
Kuya 13 April 2022 saa 11:44
Yasuwe :

Umuyobozi w’Uruganda rutunganya ifu ikomoka ku myumbati rwa Kinazi (Kinazi Cassava Plant),Bizimana Jérôme yibukije abakiri bato ko bakwiye kwigira ku mateka, bagendera kure ababashora mu bibi.

Byatangajwe kuri uyu wa Kabiri, ubwo ubuyobozi n’abakozi b’uru ruganda bunamiraga Abazize Jenoside yakorewe Abatutsi barimo abaruhukiye mu rwibutso rwa Kinazi biciwe mu cyahoze ari Komini Ntongwe muri Perefegitura Gitarama.

Bizimana Jérôme yavuze ko bateguye igikorwa cyo gusura urwibutso rwa Jenoside rwa Kinazi, mu rwego rwo guha agaciro abambuwe ubuzima.

Yagize ati “Twahisemo gusura urwibutso mu rwego rwo kwifatanya n’abarokotse Jenoside yakorewe abatutsi kuko abayikoze bayikoranye ubugome bica abavandimwe, bica abo bavukanye ndetse bamwe muri bo baracyafite ingengabitekerezo yo guhakana ibyo bakoze.”

Umuyobozi Mukuru w’uru ruganda, Bizimana Jérôme yavuze ko bidakwiriye ko umuntu yica mugenzi we kandi abizi ko na we ibyo atakwifuza ko abikorerwa.

Ati “Mu mateka yacu Jenoside yakorewe abatutsi yakoranywe ubunyamaswa, niyo mpamvu twateguye uru rugendo tugamije kwigisha abakiri bato ngo bamenye aya mateka mabi igihugu cyacu cyanyuzemo bityo bagire imbaraga zo kwanga ikibi kuko twayigiyemo byinshi".

Umuyobozi w’Umuryango uharanira inyungu z’abarokotse Jenoside yakorewe abatutsi mu murenge wa Kinazi, Ntakirutimana Marie Josée yashimiye abakozi b’uruganda rwa Kinazi baje kwifatanya nabo kwibuka abazize Jenoside.

Yavuze ko nubwo abarokotse bafite ibikomere byo ku mubiri no ku mutima, ubu bari ku rugamba rwo kwiteza imbere no guteza imbere igihugu.

Abakozi b’uruganda bavutse nyuma ya Jenoside yakorewe abatutsi, bagaragaje ko hari byinshi bungutse nyuma yo gusura urwibutso rwa Kinazi.

Ndagijimana Hirwa Rosine yagize ati “Uru rwibutso runyigishije byinshi kuko inyigisho zishingiye ku rwango ruherekejwe n’amoko nirwo rwatumye Jenoside ishoboka. Iyo bigishwa bakanga ibibi bikomoka mu rwango, nta muturage wagombaga kwica mugenzi we kandi ntacyo bapfa ariko iri ni isomo mbonye kandi nzaryigisha abandi".

Dusabe Jeannette yavuze ko aya mateka akwiye kubera urugero ababyiruka kuko kuyumva bidahagije ariyo mpamvu urubyiruko rukeneye gusura ibimemenyetso by’amateka birimo n’inzibutso.

Yagize ati “Abakiri bato bakwiye kujya bajyanwa ku nzibutso bakareba, bagasobanurirwa uko Jenoside yakorewe abatutsi yakozwe n’uburyo yateguwe kuko abenshi babyumva nka filime. Dukwiriye guhindura intambwe kuko turi abanyarwanda badakwiriye guheranwa n’amoko y’Abahutu n’Abatutsi, bityo dukwiye guharanira icyaduteza imbere ntidusubire inyuma".

Umukozi w’Umurenge wa Kinazi Ushinzwe Imibereho myiza y’Abaturage, Habumugisha Hyacinthe yashimiye uruganda rwa Kinazi uburyo bwatekereje kuba hafi abarokotse Jenoside yakorewe abatutsi no kubafata mu mugongo.

Yavuze ko kwereka abarokotse Jenoside ko bari kumwe ari icyomoro cyo kubafasha gukomeza gutwaza no kwiteza imbere.

Urwibutso rwa Jenoside rwa Kinazi rushyinguyemo imibiri y’abatutsi basaga 6000.

Hakozwe urugendo rwo Kwibuka abazize Jenoside yakorewe Abatutsi.
Abakozi b'uru ruganda basabye urubyiruko kwigira ku mateka rugendera kure amacakubiri
Uruganda rutunganya ifu y'imyumbati rwa Kinazi rwibutse ku nshuro ya 28 Jenoside yakorewe Abatutsi mu 1994.
Umuyobozi Mukuru wa Kinazi Cassava Plant Ltd, Bizimana Jerome, yavuze ko bakoze urugendo rwo kwibuka mu kwigisha abakiri bato kwirinda amacakubiri no kuba hafi abarokotse.
Musabende Epiphania yashyikirijwe amafaranga azamufasha gusana inzu ye.
Uruganda rwa Kinazi ruzafasha Musabende Epiphania gusana iyi nzu ye yamaze kwangirika.

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .