Uru rubyiruko rwamuritse imishinga yabo binyuze mu marushanwa yateguwe n’Urwego rw’Igihugu rushinzwe Ibijyanye n’Isanzure ku bufatanye na Minisiteri y’Ikoranabuhanga mu Itumanaho na Inovasiyo (MINICT) hamwe n’Ikigo cya TRL Space Rwanda gikora ibyogajuru bito bizwi nka ‘CubeSat’.

Aya marushanwa yitabiriwe n’abanyeshuri bo muri Rwanda Coding Academy, Hope Haven School, Ecole des Sciences Byimana, Saint André na Groupe Scolaire Apacope.

Aba bakoze imishinga y’ikoranabuhanga ryifashishwa mu by’isanzure mu gukemura ibibazo by’ihindangurika ry’ikirere ndetse n’uburyo bwo kongera umusaruro w’ubuhinzi n’ubworozi hifashishijwe iri koranabuhanga.

Intego y’aya marushanwa yari ukwereka abanyeshuri uburyo ikoranabuhanga rishingiye ku Isanzure rishobora gukoreshwa muri izo nzego ndetse n’izindi zitandukanye mu gihugu.

Umuyobozi Mukuru wa RSA, Twagirayezu Gaspard, yavuze ko bateguye aya marushanwa ku mpamvu ebyiri zirimo kwereka abanyeshuri ibibazo byugarije u Rwanda ndetse n’uburyo bwo kwifashisha ikoranabuhanga rishingiye ku isanzure mu kubikemura.

Ati “Impamvu twabikoze byari ukugira ngo turebe ubushobozi aba banyeshuri bafite mu bushobozi bwo kumva ibibazo bihari ndetse no kureba uburyo ikoranabuhanga rihari ryakwifashishwa mu gukemura ibyo bibazo.”

Yakomeje avuga ko indi mpamvu bateguye aya marushanwa ari ukubera ko byahuriranye na Politiki y’Igihugu ijyanye n’ibyisanzure iheruka kwemezwa n’Inama y’Abaminisitiri, igaragaza ko RSA ikwiriye gushyira imbaraga mu bijyanye gushishikariza urubyiruko kwitabira ibijyanye n’ikoranabuhanga rijyanye n’iby’isanzure.

Umunyamabanga uhoraho muri Minisiteri y’Ikoranabuhanga na Inovasiyo, Iradukunda Yves yashimiye urubyiruko rwerekanye imishinga ndetse arusaba gukomeza kwihugura ku bijyanye n’ikoranabuhanga kubera ko risigaye ryivugurura uko ibihe bikomeza kugenda byiyongera.

Ati “Isi turimo uyu munsi isaba gukora cyane ariko kandi ugutekereza mu buryo bwagutse, ugatekereza ku buryo wahanga udushya twagira akamaro mu Rwanda, Afurika ndetse no ku Isi muri rusange.”

Yabasabye ko imishinga berekanye ko badakwiriye kuyiryamisha ahubwo ko bakwiriye gukomeza kuyikoraho ubushakashatsi kugira ngo bazayishyire ku rundi rwego.

Yeretse uru rubyiruko ko u Rwanda rumaze kugera kuri byinshi mu bijyanye n’ikoranabuhanga ndetse abibutsa ko bakwiriye kubyubakiraho kugira ngo rukomeze gutera imbere n’abo biteze imbere.

Abanyeshuri biga muri Rwanda Coding Academy nibo babaye aba mbere, bakaba bamuritse umushinga w’Ikoranabuhanga ryifashisha amakuru avuye kuri Satellite mu kuburira abaturage ibiyanye n’ibiza bishobora kuza mu gace batuyemo.

Ganza Muganamfura Chaste wiga muri Rwanda Coding Academy yavuze ko bahisemo uyu mushinga kubera uburyo mu Rwanda abantu bakunze kubura ubuzima bitewe n’ibiza biza mu buryo butunguranye bikarangira bihitanye abantu benshi ndetse binangije ibintu byinshi.

Ati “Uyu mushinga Gaza waje gufasha abaturage batuye mu bice by’iburengerazuba no mu Majyaruguru bakunze guhura n’ibibazo by’ibiza batabimenye.”

Ishuri rya Hope Haven Christian School ni ryo ryaje ku mwanya wa Kabiri aho ryo ryamuritse umushinga wo kwifashisha ikoranabuhanga ry’Isanzure mu guhuza abahinzi n’abaguzi.

Ni ukuvuga ngo binyuze muri uyu mushinga hazajya hifashishwa amashusho ya ‘Satellite’ noneho agereranye umusaruro umuhinzi azagira, ayo makuru yabonye iyohereze umuguzi uzawukenera.

Nyuma iryo koranabuhanga rizajya rikora ubusesenguzi bw’igihe uwo musaruro uzabonekera kugira ngo wa muhinzi amenye igihe cyo gushaka abaguzi ndetse nabo ubwabo bamenye igihe bazabonera uwo musaruro.

Gwiza Franco wiga muri iri shuri yavuze ko binyuze muri uyu mushinga bizagabanya igihombo cyaturukaga kwiyangirika ry’umusaruro kubera ko abahinzi n’aborozi bazajya babona amakuru hakiri kare.

Ati “Bizagabanya igihombo abahinzi bahuraga na bo cy’iyangirika ry’umusaruro kuko uzajya kuboneka yamaze kubona umuguzi.”

Yagaragaje ko Impamvu batekereje uyu mushinga ari ukubera ko umwuga w’ubuhinzi mu Rwanda utunze abantu benshi kandi ukaninjiriza igihugu amafaranga menshi biturutse mu musaruro woherezwa hanze.

Abanyeshuri biga mu Ishuri rya Ecole des Sciences Byimana, bakoze ikoranabuhanga ryo kwifashisha amakuru ya ‘Satellite’ mu guteganya ko hari ibiza bishobora kwibasira ahantu runaka, noneho binyuze muri iri koranabuhanga bakazajya bohereza ubutumwa bw’abatuye aho hantu ahantu hizewe ho kujya kugira ngo bitabagiraho ingaruka.

Ibindi bigo byahatanye muri iri rushanwa ni College Saint Andre yabaye iya Kane na yo yakoze umushinga wo kwifashisha amakuru y’ikoranabuhanga mu by’isanzure mu kuburira abantu ibijyanye n’ibiza ndetse na Groupe Scolaire APACOPE yabaye iya Gatanu yakoze ujyanye no kwifashisha aya makuru mu gufasha abahinzi n’aborozi kongera umusaruro.

Abanyeshuri bo mu Ishuri rya Rwanda Coding Academy bahembwe kubera umushinga bakoze w'ikoranabuhanga ryifashisha amakuru ya Satellite mu kuburira abantu ibijyanye n'ibiza

Umuyobozi Mukuru wa RSA, Twagirayezu Gaspard, yavuze ko bateguye aya marushanwa ku mpamvu ebyiri zirimo kwereka abanyeshuri ibibazo byugarije u Rwanda ndetse n’uburyo bwo kwifashisha ikoranabuhanga

Umunyamabanga uhoraho muri MINICT, Iradukunda Yves yashimiye urubyiruko rwerekanye imishinga ndetse arusaba gukomeza kwihugura ku bijyanye n’ikoranabuhanga kubera ko risigaye ryivugurura uko ibihe bikomeza kugenda