Urubyiruko rwigira indakoreka rwibukijwe ko ejo heza hadashoboka rudahindutse

Yanditswe na Twarabanye Venuste
Kuya 22 Ukuboza 2019 saa 04:00
Yasuwe :
0 0

Umuryango Edified Generation Rwanda washinzwe n’abanyeshuri barihiwe na Imbuto Foundation wibukije urubyiruko rukiri ku ntebe y’ishuri kurangwa n’ubupfura no kuzirikana ko iterambere ry’igihugu riri mu biganza byabo.

Byagarutsweho n’ Umuyobozi mukuru w’umurwango Edified Generation Rwanda, Valens Ntirenganya mu ihuriro ngarukamwaka ry’uwo muryango ryabaye kuwa 20 Ukuboza 2019.

Ni ihuriro ryitabiriwe n’urubyiruko rw’abanyeshuri, ibigo bya Leta bifite aho bihuriye n’uburezi, abikorera ndetse n’ikigo cy’igihugu cy’imiyoborere (RGB). Haganirwa ku ntego ya kane y’iterambere rirambye yerekeye uburezi budaheza.

Mu kiganiro nyunguranabitekerezo kuri iyo ngingo, hagaragajwe ko hakiri imbogamizi zinyuranye zituma hari abana batagana ishuri, n’abandi barivamo kubera impamvu zitandukanye.

Ikibazo cy’ubukene, ibiyobyabwenge n’inda ziterwa abangavu byagaragajwe nk’ibikibangamiye urubyibuko kandi birubuza amahirwe.

Umuyobozi mukuru wa Edified Generation Rwanda, Valens Ntirenganya yavuze ko hagikenewe imbaraga n’ubufatanye mu gukumira ibyo bibazo.

Ku rundi ruhande ariko yibukije, urubyiruko ko rufite urufunguzo rw’ahazaza harwo. Ururi mu mashuri arusaba kwiga neza no kurangwa n’ubupfura.

Ati “ Bana mukiri ku ntebe y’ishuri, nubwo dukora ibishoboka byose ngo mwige, uruhare rwanyu iyo mugiye ku ishuri ni ukwiga kandi mukigira gutsinda, mukagira ikinyabupfura kandi mukabana neza n’abandi. Gukora ibihabanye n’ibyo ngibyo ni ukwanduranya”.

Yoneyeho ko hari urubyiruko rwigira intakoreka arusaba
kubicikaho.

Ati “ Ejo bundi mu ihuriro ry’urubyiruko ryabanjirije inama y’igihugu y’Umushyikirano, hari ababyeyi batureze bavuga ko urubyiruko twigize intakoreka, ariko kandi nibyo hari abafite iyo mico yo gusuzugura ababyeyi kuko bumva ko ari bakuru badakeneye kumva inama z’ababyeyi. Ese ibyo nibyo bikwiye kuturanga? umubyeyi nakubwira ikiza uzamwumve ariko nagusaba gukora ikibi, uzamukosore.”

Umunyamabanga Mukuru wa komisiyo y’ishami ry’umuryango w’abibumbye ryita ku burezi mu Rwanda (UNESCO-CNRU) Mutesa Albert, yibukije abo banyeshuri ko kugira uburere n’uburezi bijyana no kugira umuco bityo ko niyo wahabwa amahirwe yo kwiga ariko nta ndangagaciro z’umuco w’igihugu cyawe ufite ntacyo byakumarira.

Raporo Minisiteri y’Uburezi yo mu Ukwakira 2019 igaragaza
ko mu mwaka w’amashuri wa 2017/18, abanyeshuri baretse kwiga mu mashuri abanza bageze kuri 6.7% bavuye kuri 5.6% mu 2016/17 mu gihe mu 2015/16 bari kuri 5.7%.

Icyo kibazo cy’abana bata ishuri nacyo cyagarutsweho intuma y’Ikigo gishinzwe uburezi, REB, Ndayisaba Appolinnaire avuga ko Minisiteri y’uburezi n’ibigo biyishamikiyemo batakwishoboza ibikenewe mu burezi byose ahubwo hakenewe ubufatanye bw’indi miryango n’ibigo by’abikorera mu gutuma abanyarwanda benshi bagana ishuri.

Muri iri huriro rya gatanu ry’Umuryango Edified Generation Rwanda hanatanzwe ibikoresho by’ishuri ku bana basaga 40 bazifashisha mu mwaka w’amashuri wa 2020.

Urubyiruko rrwasabwe kwirinda ibirurangaza bishobora kurwicira ejo heza
Abitabiriye ihuriro ngarukamwaka rya Edified generation Rwanda
Umuyobozi mukuru wa Edified Generation Rwanda, Valens Ntirenganya avuga ko hagikenewe imbaraga mu gukumira ibibazo bikibangamiye urubyiruko
Urubyiruko rufashwa n’umuryango Edified generation Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .