00:00:00 IGIHE NETWORK KN KINYARWANDA EN ENGLISH FR FRANCAIS

Urubyiruko rwibutse bagenzi babo bishwe muri Jenoside rwibutswa ko rutagomba kwirara

Yanditswe na Akimana Erneste, Mukwaya Olivier
Kuya 21 May 2022 saa 03:56
Yasuwe :

Mu muhango wo kwibuka ku nshuro ya 28, urubyiruko rwazize Jenoside yakorewe Abatutsi mu 1994, Minisiteri w’Urubyiruko n’Umuco, Mbabazi Rosemary, yikukije abawitabiriye ko bafite inshingano zo kubaka igihugu bafatiye urugero ku Nkotanyi zakiyobohoye.

Ni igikorwa cyabaye ku wa Gatanu tariki 20 Gicurasi 2022 ariko ku rwego rw’igihugu cyabereye mu Karere ka Rusizi.

Minisitiri w’Urubyiruko n’Umuco, Rosemary Mbabazi yasabye urubyiruko kudafata kwibuka nk’umuhango ahubwo ko ari igihango bafitanye n’igihugu bakaba bagomba kucyubaka kugira ngo ahazaza hacyo hazabe ari heza.

Yagize ati “Uru rubyiruko rufitanye igihango n’igihugu cyo gushyira hamwe no gukora batizigamye. Kwibuka ntabwo ari umuhango ahubwo ni igihango kandi bakamenya ko imbere ari heza ariko haraharanirwa.”

Muri iki gikorwa urubyiruko rwakoze urugendo rwo kwibuka, banasura urwibutso rwa Kamembe rushyinguyemo imibiri 1005. Aha banasobanuriwe amateka yaranze jenoside yakorewe Abatutsi bo muri iki gice aho benshi biciwe muri Stade ya Rusizi abandi bicirwa ahazwi nko mu Gatandara hafi y’umupaka uhuza u Rwanda na RDC bagerageza guhunga.

Muhawenimana Aline umwe mu rubyiruko rwitabiriye iki gikorwa yavuze ko nk’urubyiruko bagomba guhitamo icyiza bagafata iya mbere mu kubaka igihugu.

Yagize ati “Twize ko urubyiruko tugomba kwigira tukubaka igihugu kandi vuba. Urubyiruko rwasenye igihugu aho rwabwirijwe gukora ikibi. Uyu munsi tugomba guhitamo ibyiza byubaka igihugu.”

Igikorwa cyo kwibuka urubyiruko rwazize Jenoside yakorewe Abatutsi cyabereye mu gihugu hose.

Mu Karere ka Rubavu hari hahuriye abaturutse mu turere twa Rutsiro, Karongi na Rubavu.

Umutoni Sandra waturutse mu Murenge wa Gisenyi agendeye ku biganiro bitandukanye bagenda bahabwa, ytanze icyizere ko cy’ahazaza hatarangwa n’amacakubiri ashingiye ku moko.

Ati “Hari icyizere cy’ejo hazaza heza kuko aho tugeze hatandukanye n’aho twavuye kandi kurwanya ingengabitekerezo ni ibintu duhora tuganiraho bituma tutakiyumvamo iby’amoko y’abahutu n’abatutsi ahubwo ko turi Abanyarwanda kandi tugomba gukorera hamwe’’.

Kwizera Fabrice wo mu Karere ka Rutsiro yavuze ko kwitabira kwibuka bagenzi babo bigaragaza igihango kizatuma bashyira hamwe mu guharannira ko ibyabaye bitazongera ukundi.

Guverineri w’Intara y’Iburengerazuba, Habitegeko François, yavuze ko jenoside ituruka ku macakubiri yigishijwe, ubu Abanyarwanda bakaba barateye intambwe ishimishije mu bumwe ariko ko nta kwirara kubera ko hari abagifite imyumvire ya kera.

Ati “Abakoze Jenoside barigishijwe nyuma yo kuyihagarika hatangiye urugamba rwo kwigisha ahari amacakubiri tukahashyira ubumwe, ubu turimo kubona ibikorwa byiza by’urubyiruko bituruka ku mbuto irimo kubibwa ariko nta kwirara kuko hari abagifite ingengabitekezo, ni uguhozaho.”

Mu turere twa Ngoma, Rwamagana na Kirehe rwahuriye ku rwibutso rwa Ngoma.

Seraphine Mukantabana wavuze mu izina rya Unity Club muri iki gikorwa, yasabye urubyiruko kurangwa n’ubumwe no gushyira imbere Ndi umunyarwanda kuko ari yo sano muzi ihuza Abanyarwanda.

Yakomeje agira ati “Urubyiruko ni mwebwe turangamiye ejo hazaza, mwumve ko ari inshingano mufite, ni igihango mufitanye n’igihugu bityo buri wese ahore aharanira kugira uruhare mu gukomeza kwihutisha iterambere no kubaka u Rwanda twifuza.”

Guverineri w’Intara y’Iburasirazuba, Emmanuel Gasana we yihanganishije urubyiruko kuri uyu munsi wo kwibuka bagenzi babo bazize Jenoside yakorewe Abatutsi mu 1994, avuga ko abishwe bari amaboko n’imbaraga imiryango n’Igihugu byatakaje.

Yavuze ko benshi mu bari bagize ingabo za RPA bahagaritse Jenoside bari urubyiruko rwaranzwe n’indangagaciro z’ubutwari, gukunda igihugu, ubwitange, umurava, ukuri, biyemeza gufata iya mbere barwanya leta yari ifite politiki mbi.

Yasabye urubyiruko kwimakaza amahitamo meza, indangagaciro nyarwanda, kurwanya no kwirinda uwo ari we wese wabiba amacakubiri n’ingengabitekerezo ya jenoside no gukoresha ikoranabuhanga mu kurwanya abasebya u Rwanda.

Urubyiruko rwitabiriye igikorwa cyo kwibuka bagenzi babo bishwe muri Jenoside
Minisitiri w'Urubyiruko n'Umuco, Rosemary Mbabazi yavuze ko kwibuka bidakwiye gufatwa nk'umuhango
Urubyiruko rwitabiriye iki gikorwa mu karere ka Rusizi rukurikiye ubutamwa bwahatangiwe
Mu Karere ka Rubavu naho igikorwa nk'iki cyahabereye
Guverineri w'Intara y'Iburengerazuba, Habitegeko François, ybwiye urubyiruko rudakwiye kwirara
Tetero Solange, Umuyobozi mukuru muri Minisiteri y'urubyiruko n'umuco ushinzwe guhanga imirimo yari yitabiriye iki gikorwa
Abayobozi mu nzego zitandukanye bari bitabiriye iki gikorwa
Umuyobozi w'Akarere ka Rutsiro, Murekatete Triphose yari yitabiriye iki gikorwa
Guverineri w’Intara y’Iburasirazuba, Emmanuel Gasana we yihanganishije urubyiruko kuri uyu munsi wo kwibuka bagenzi babo bazize Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .