Urubyiruko rwatunzwe agatoki ko rwishora mu ngeso mbi nk’uburaya kubera kudashaka kuvunika

Yanditswe na Habimana James
Kuya 25 Kamena 2020 saa 08:47
Yasuwe :
0 0

Ikigo cy’Igihugu gishinzwe Igororamuco (NRS) kivuga ko zimwe mu mpamvu zikomeje gutera ibibazo bibangamira umuryango Nyarwanda harimo uburaya n’ibiyobyabwenge mu rubyiruko usanga akenshi biterwa na bamwe bumva ko batakora ahubwo ko bazabona ibyo batavunikiye.

NRS ivuga ko nubwo abenshi bavuga ko bajya mu ngeso mbi kubera kubura akazi, bihabanye n’ukuri kuko abakene bose batazigaragaramo.

Kuva mu mpera za 2020, NRS n’abafatanyabikorwa bayo batangiye gukora ubushakashatsi mu gihugu bugamije kumenya impamvu nyamukuru zitera ibibazo by’ubuzererezi n’ingamba zafatwa mu guhangana nabyo.

Kuri uyu wa Kane, NRS yagiranye inama n’inzego zitandukanye zirimo Minisiteri y’Uburinganire n’Iterambere ry’Umuryango, Polisi y’u Rwanda, Urwego rw’Igihugu rw’Ubugenzacyaha na Minisiteri y’Urubyiruko n’Umuco, harebwa aho ubu bushakashatsi bugeze mbere y’uko bushyirwa ahagaragara.

Umuyozi Mukuru w’Agateganyo wa NRS, ACP Gumira Rwampungu Gilbert, yavuze ko mbere y’uko ubushakashatsi bwakozwe bushyirwa ahagaragara babanje kubonana n’abafatanyabikorwa ngo barebe niba koko ahantu hose bwarahageze.

Yagize ati “Mu byo dushaka ko bazana muri ubu bushakashatsi ni ukumenya kuri iyi myitwarire yose ibangamiye abaturage harimo abanywa ibiyobyabwenge, abasinzi, abigurisha, abana bo mu muhanda, abacuruza mu buryo butemewe, abasabiriza n’ibindi. Tumenye ngo iki kibazo kirangana gute mu gihugu? Bifite izihe ngaruka mbi ku muryango ndetse tumenye n’ikibitera.”

Avuga ko iyo ubajije abagaragara muri ibi byaha, hari ibibazo bagenda bavuga bituma bajya mu ngeso mbi, ariko wakurikirana ugasanga ari urwitwazo.

Ati “Igikomeye cyagaragaye gitera iyi myitwarire mibi harimo ko ababyeyi bamwe badohotse ku nshingano z’uburere, usanga basa nk’aho basiganya leta ku buryo bumva ko bo babyara leta ikazarera.”

“Ikindi kigaragara mu rubyiruko rw’Abanyarwanda ni uko harimo benshi bakoresha ibiyobyabwenge ariko hari n’ikindi kibazo gikomeye cy’ubusinzi, hari abavuga ngo babiterwa n’ubukene no kubura akazi. Nibyo koko birahari ariko ntabwo tubibona nk’impamvu ikomeye kuko umukene wese ntabwo ajya kwigurisha ku muhanda cyangwa ngo yibe.”

ACP Gumira yavuze ko hari ingamba zafashwe zo gufasha Abanyarwanda bari munsi y’umurongo w’ubukene ariko usanga abakiri bato batazikozwa.

Yakomeje ati “Hari abazihunga bakaza kwishakira ibyoroshye no kudashaka kuvunika ku buryo umuntu yatungwa n’ibivuye mu ngufu ze, birasaba ko urubyiruko rwegerwa rukabwirwa ko rwabihindura.”

NRS yahagurukiye kuvana abana bo mu mihanda ndetse mu gihe cy’ukwezi kumwe abarenga 1100 bo mu Mujyi wa Kigali basubijwe mu miryango yabo.

Ikibazo gikomeye cyagaragajwe ni uko mu miryango usanga ababyeyi barataye inshingano kuko mu bana bo ku muhanda usanga 98% bafite ababyeyi bombi.

Mu gukemura iki kibazo, ababyeyi barigishwa, ubuyobozi bw’inzego zibanze bukabyitaho ndetse n’ababyeyi bagaragaza kudohoka bagasinyishwa ko abana batazongera gusubira mu mihanda.

Mu mpera za 2019 nibwo ubushakashatsi ku bitera ubuzererezi mu byiciro bitandukanye by’Abanyarwanda bwatangiye gukorwa, biteganyijwe ko buzarangira mu mpera z’uyu mwaka w’ingengo y’imari.

Polisi y'u Rwanda, RIB n'izindi nzego ni zimwe mu zikomeje gushaka umuti w'ikibazo cy'ubuzererezi mu gihugu
Ikigo cy’Igihugu gishinzwe Igororamuco cyagiranye inama n’inzego zitandukanye zirimo Minisiteri y’Uburinganire n’Iterambere ry’Umuryango, Polisi y’u Rwanda, Urwego rw’Igihugu rw’Ubugenzacyaha na Minisiteri y’Urubyiruko n’Umuco, cyamurikiyemo imbanzirizamushinga y'ubushakashatsi bugamije kumenya impamvu nyamukuru zitera ibibazo by’ubuzererezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .