Urubyiruko rusaga 3500 rugiye kongererwa ubushobozi mu kazi

Yanditswe na Evariste Nsengimana
Kuya 8 Gashyantare 2020 saa 01:30
Yasuwe :
0 0

Ikigo cy’Igihugu cy’Imyuga n’Ubumenyingiro (WDA) kigiye kongerera ubumenyi n’ubushobozi abakozi basanzwe bafite akazi basaga 3515 biganjemo urubyiruko, mu rwego rwo kubafasha kuzuza ibisabwa ku isoko ry’umurimo no gufasha ibigo bibakoresha kongera umusaruro.

Amasezerano ajyanye n’uburyo aba bakozi bazahugurwa yashyizweho umukono kuri uyu wa 7 Gashyantare 2020 hagati y’Ubuyobozi bwa WDA n’ibigo 117 bifite abakozi byatoranyijwe bazahugurwa.

Ni icyiciro cya gatatu cy’umushinga ugamije kongerera ubushobozi urubyiruko rusanzwe mu kazi kizatwara asaga miliyari 2Frw, rukazajya ruhugurwa hagati y’amezi atatu n’atandatu.

Umuyobozi mukuru wa WDA, Eng. Gatabazi Pascal yagize ati “Ni ukuvuga ngo hari umuntu uje ukeneye abakozi benshi icyarimwe ariko ubumenyi dukeneye ntabwo aba bana babufite ako kanya, noneho uyu mushinga ugafasha mu kubahugurira ku kazi.”

Ni umushinga wongerera urubyiruko ubumenyi rukirangiza kwiga, ubumenyi rutabashije kubona igihe rwigaga kandi bukenewe ku isoko ry’umurimo no kongerera imikorere ibigo bibakoresha.

Ati “U Rwanda ruba rwashyizeho politiki zo kureshya abashoramari. Umushoramari rero iyo aje kugira ngo ibikorwa bye bigende neza aba akeneye abakozi bafite ubushobozi, bazi ibijyanye n’ibyo agiye gukoramo. Uyu mushinga rero udufasha gutanga amahugurwa vuba vuba, ariko abera muri ka kazi.”

Uretse gufasha ibigo bibakoresha kubona abakozi bashoboye no gusigira ubumenyi abahabwa aya mahugurwa ni n’inyungu ku gihugu mu bijyanye no guhanga imirimo mushya nk’uko biri mu ntege guverinoma yihaye yo guhanga isaga ibihumbi 200 buri mwaka.

Eng. Gatabazi avuga ko hari ubwo usanga nk’ikigo cy’abashomari kije gukorera mu Rwanda kikumvikana na Guverinoma umubare runaka w’abanyarwanda kigomba kuba cyahaye akazi. Uyu mushinga ukaba ari igisubizo ku gufasha ibigo nk’ibyo kubona abakozi bashoboye batiriwe bata umwanya wo kwiga.

Ibigo bishaka ko abakozi babyo bakongererwa ubu bumenyi nibyo bisaba WDA, nayo ikabisura ndetse ikanakora amajonjora no kugena umubare w’abo buri kigo gishobora guhugurirwa bitewe n’ingano y’ibyo gikora.

Ni igikorwa abashoramari bavuze ko gifite akamaro cyane ko kibafasha kongera ubumenyi bw’abakozi nk’uko Habyarimana Jean Paul ufite ikigo gikorera ububaji n’ubukorikori mu Gakiriro ka Gisozi yabisobanuye.

Ati “Icya mbere gishimishije ni uko tugiye gufasha abana b’abanyarwanda bagatera intambwe nk’iyo twateye kuko twe twize ibijyanye n’ubukorikori. Ikiriho ni abana b’abanyarwanda nibamenya umwuga baziteza imbere kandi natwe ikigo cyacu kibyungukiremo.”

WDA igaragaza ko kuva iyi gahunda itangijwe mu byiciro bibiri bishize hamaze guhugurwa urubyiruko ruri mu kazi rusaga 7000.

Ubwo aya masezerano yashyirwagaho umukono

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza