Urubanza rw’ubujurire rwa Ingabire Victoire mu Rukiko rw’Ikirenga, rurasomwa kuri uyu wa Gatanu tariki ya 13 Ukuboza 2013.

Uru rubanza rusomwa kuri uyu wa Gatanu mu gihe isomwa ryarwo ryari rasubitswe mu gihe gishize, ni urwo mu bujurire rwajuririwe n’ababuranyi bombi mu Rukiko rw’Ikirenga kuko yaba Ingabire ndetse n’Ubushinjacyaha bari batarishimiye imyanzuro y’urubanza rwabanje rwari rwasomwe kuwa 30 Ukwakira 2012 ubwo Ingabire yakatirwaga gufungwa imyaka umunani urukiko rumaze kumuhamya ibyaha bibiri aribyo ubugambanyi no gushaka kugirira nabi ubutegetsi buriho, no gupfobya Jenoside yakorewe Abatutsi.

Muri uru rubanza mu Rukiko rw’Ikirenga, Ingabire aracyari kumwe n’abasirikare bane baregwa hamwe nawe ndetse ubwo Ingabire yasomerwaga imyanzuro y’urubanza muri 2012 ku byaha yaregwaga, aba basirikare bahoze mu mutwe wa FDLR nabo bakatiwe ibihano byo gufungwa imyaka itandukanye, bitewe no guhamwa n’ibyaha by’ubufatanya cyaha.

Cap. Karuta Jean Marie yari katiwe imyaka ibiri n’amezi arindwi, Lt. Col Habiyaremye Noel na Lt Col Nditurende Tharcisse bo bari bahanishijwe igifungo cy’imyaka 3 n’amezi atandatu, mu gihe Maj. Uwumuremyi Vital mu byaha byari byamuhamye harimo kugirira nabi ubutegetsi buriho, ubugambanyi n’iterabwoba, gusa kuko yari yemeye ibyo aregwa akanabisabira imbabazi ubucamanza bwari bwamukatiye gufungwa imyaka ine n’amezi atandatu.

Maj. Uwumuremyi Vital imyaka itatu n’amezi atandatu urukiko rwari rwemeje ko agomba kuzayifungwa nyuma akarekurwa akajya hanze akazongera kuza kurangiza umwaka umwe usigaye nyuma y’imyaka ibiri ari hanze.

Ingabire wakatiwe gufungwa imyaka umunani kuwa 30 Ukwakira 2012, afunze kuva mu 2010 ni umuyobozi w’ishyaka rya FDU Inkingi rivuga ko rutavuga rumwe n’ubutegetsi bw’u Rwanda, ariko ritaremererwa gukorera mu Rwanda byemewe n’amategeko.