00:00:00 IGIHE NETWORK KN KINYARWANDA EN ENGLISH FR FRANCAIS

Urubanza ruregwamo abayobozi bakuru ba IPRC Kigali rwasubitswe

Yanditswe na Ntabareshya Jean de Dieu
Kuya 9 Mutarama 2023 saa 01:47
Yasuwe :

Urubanza ruregwamo abantu 19 barimo n’uwari Umuyobozi Mukuru wa IPRC Kigali, Eng Murindahabi Diogène, rwagombaga gutangira kuburanishwa mu mizi rwasubitswe.

Ni urubanza rwari ruteganyijwe kuba kuri uyu wa Mbere tariki ya 9 Mutarama 2023 rukabera mu Rukiko Rwisumbuye rwa Nyarugenge aho abaregwa bagombaga gutangira kuburana mu mizi.

Ruregwamo abantu 19 barimo Eng Murindahabi wari Umuyobozi Mukuru wa IPRC Kigali, uwari Umuyobozi ushinzwe imari, Munyampundu Thomas Vander, uwari ushinzwe kubika ibikoresho, Nabo Jean Claude, umukozi ushinzwe iby’amazi, Hakizimana Venuste, bamwe mu barimu, abashinzwe umutekano n’abandi.

Bakurikiranyweho ibyaha birimo ubujura, kunyereza umutungo wa leta, inyandiko mpimbano n’icyaha cyo guhishira ibikomoka ku cyaha.

Abaregwa muri iyi dosiye harimo 12 bakurikiranywe bari hanze mu gihe abandi batandatu bakurikiranwa bafunzwe nk’uko byategetswe n’Urukiko rw’ibanze rwa Kicukiro.

Mu bakurikiranwa badafunzwe harimo Eng Mulindahabi warekuwe ku wa 22 Ugushyingo 2022 n’abandi 11 baregwaga hamwe muri dosiye y’ubujura, gukoresha inyandiko mpimbano no kunyereza umutungo wa leta.

Uko bari bafunganywe ari 19 batawe muri yombi n’Urwego rw’Igihugu rw’Ubugenzacyaha (RIB) ku wa 23 Ukwakira kugira ngo hakorwe iperereza ku byaha bakekwaho.

Kuri uyu wa Mbere tariki ya 9 Mutarama 2023 nibwo uru rubanza rwagombaga kuburanishwa ariko ruza gusubikwa ku mpamvu zo kuba umucamanza yagiye gutabara rwimurirwa ku wa 11 Mutarama 2023 saa tatu za mu gitondo.

Aba bakozi bashinjwa ubujura bwakozwe ku bikoresho by’ubwubatsi, ibikoreshwa n’abakora amazi, ibyuma byifashishwa mu gukora za muvero n’ibindi.

Mu iburanisha ku ifungwa n’ifungurwa ry’agateganyo, Ubushinjacyaha bwavuze ko ibikoresho bashinjwa kwiba bifite agaciro k’asaga miliyoni 113Frw.

Eng Mulindahabi wari Umuyobozi wa IPRC Kigali, yavuzweho kunyereza umutungo ndetse ngo hari imashini ikurura amazi basanze iwe mu rugo ndetse n’indi mashini na yo ikora mu bijyanye no gutunganya amazi.

Itegeko riteganya ko kunyereza umutungo bihanishwa igifungo kitari munsi y’imyaka irindwi ariko kitarenze imyaka 10 n’ihazabu yikubye inshuro kuva kuri eshatu kugeza kuri eshanu z’umutungo wanyerejwe.

Ni mu gihe guhimba inyandiko cyangwa gukoresha inyandiko mpimbano, iyo byakozwe n’umukozi wa Leta, igihano kiva ku myaka irindwi kikagera ku myaka 10 y’igifungo n’ihazabu iri hagati ya miliyoni ebyiri n’eshatu z’amafaranga y’u Rwanda cyangwa kimwe muri ibyo bihano.

Icyaha cyo kwiba gihanishwa igifungo cy’umwaka umwe ariko itarenze ibiri n’ihazabu ya miliyoni hagati 2 Frw.

Urubanza ruregwamo abantu 19 barimo n’uwari Umuyobozi Mukuru wa IPRC Kigali, Eng Murindahabi Diogène, rwagombaga gutangira kuburanishwa mu mizi rwasubitswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .