00:00:00 IGIHE NETWORK KN KINYARWANDA EN ENGLISH FR FRANCAIS

Unity Club Intwararumuri yasoje amarushanwa kuri Ndi Umunyarwanda isaba abiga muri UTAB kuyisigasira

Yanditswe na Evence Ngirabatware
Kuya 9 September 2022 saa 01:53
Yasuwe :

Umuryango Unity Club Intwararumuri wasoje amarushanwa kuri gahunda ya Ndi Umunyarwanda, yaberaga muri Kaminuza y’Ikoranabuhanga n’Ubugeni ya Byumba (UTAB), ushima umusanzu w’ibitekerezo by’abanyeshuri bayigamo mu guhindura imyumvire y’abatekereza gusenya ubumwe bw’abanyarwanda.

Umuryango Unity Club Intwararumuri, washinzwe na Madamu Jeannette Kagame, ugamije gutanga umusanzu mu kubaka ubumwe bw’Abanyarwanda, ukaba ugizwe n’abagize Guverinoma, abigeze kuyibamo n’abo bashakanye.

Kuri uyu wa Kane tariki 8 Nzeri 2022, ku cyicaro cya UTAB, uyu muryango wasoje icyiciro cya kabiri cy’amarushanwa ku mivugo isobanura kuba umunyarwanda icyo ari cyo ndetse n’indirimo ziteguwe neza kandi zifite ireme ku buryo buri umwe yayumva akayishima biturutse ku bisobanuro birimo kuri gahunda ya Ndi Umunyarwanda.

Mu bihangano byagaragajwe n’abanyeshuri harimo umuvugo wa Mbarushimana Alexis yise ‘Duhuje isano, isano nziza y’Ikinyarwanda’, wibanze ku mateka y’abanyarwanda ubibutsa ko bahuje isano.

Hari kandi umuvugo wa Nyirakanyana Yvonne yise ‘Murage mwiza Gahore uganje’, aho asaba abanyarwanda gukomera ku muco wabo bakirinda abawutobera.

Abitabiriye aya marushanwa bavuga ko byabafashe umwanya kwiga byimbitse no kumenya amateka nyakuri y’abanyarwanda, bituma batanga umusanzu wabo n’ibitekerezo byubaka igihugu bashingiye ku byo babonye.

Mushinzimana Odile wanatsinze amarushanwa ya Ndi umunyarwanda yagize ati “Ibi biganiro ni byiza cyane, byadufashije kwiga amateka no gusangira ibitekerezo ku gihugu, nubwo waba wiga ibitari amateka, bituma ugira ishusho y’icyatumye abanyarwanda bari baracitsemo ibice, nawe ugashyiramo ibitekerezo by’uko bitakagombye gusubira ukundi”.

Mushinzimana yakomeje avuga ko bizatuma batanga umusanzu wabo mu kwigisha abanyarwanda ubumwe, kandi ko ku banyeshuri bizabongerera ishyaka ryo kumanuka bakajya kubyigisha mu baturage, mu rwego rwo gutanga umusanzu wo kumvisha no gusangiza abandi amateka y’igihugu.

Mugenzi we Nyirakanyana Yvonne watsindiye ibihembo mu cyiciro cy’imivugo n’indirimbo, yashimangiye ko aya marushanwa abafasha kwagura umurongo mugari wo kwimakaza no gusigasira umurage wa Ndi Umunyarwanda.

Ati “Twiteguye kugira ishyaka ryo gukunda igihugu no kwimakaza umurage wa Ndi Umunyarwanda, kandi tukabisangiza abandi”.

Uwiringiyimana Celestin wiga mu ishami rya UTAB Kiramuruzi, yahawe igihembo cy’indirimbo nziza kuri Ndi Umunyarwanda. Indirimbo ye yitwa ‘Murage Wacu’, ikaba yibanda ku nsanganyamatsiko bagendeyeho ari yo; ‘Ndi umunyarwanda, umurgae tugomba guharanira, gusigasira no kwimakaza’.

Uwiringiyimana yabwiye IGIHE ko iyi gahunda y’abanyeshuri ba kaminuza ku bushakashatsi kuri Ndi Umunyarwanda, yatumye basobanukirwa ko [Ndi Umunyarwanda] ari umurage w’abakurambere, bagira uruhare mu kugaragaza icyo umaze no kuwusigasira.

Ati “Ni ukwigisha no guharanira ko Ndi Umunyarwanda yakwimakazwa ahantu hose bose bakayimenya, bagakomera ku muco wabo bakawugiraho uruhare kugira urusheho kubumbatirwa”.

Umuyobozi Kaminuza ya UTAB, Dr Padiri Munana Gilbert, yatangaje ko ubuyobozi bw’ishuri biteguye gutanga umusanzu ku banyeshuri bafite, aho bazacyenera gushaka amakuru yimbitse agamije kumenya amateka y’u Rwanda bazabafasha kongera ibitekerezo byubaka igihugu.

Ati “Aya marushanwa yateguwe na Unit Club Intwararumuri ni ngombwa, UTAB yaje ku isonga mu kwitabira kandi dufite n’ imboni za Club Intwararumuri mu ishuri. Hanatangijwe kandi Club y’Ubumwe n’Ubudaheranwa, ije kunganira Club y’ubumwe n’ubwiyunge, natwe twiteguye gufasha abanyeshuri kuri buri kimwe bazacyenera”.

Abahagarariye Unity Club Intwararumuri bashimye uko amarushanwa yagenze kuko yateguwe neza mu mashuri yisumbuye na za Kaminuza kandi abanyeshuri bagaragaje inyota yo gukora ubushakashatsi n’ishyaka ryo kumenya icyo kwitwa umunyarwanda ari cyo.

Francine Tumushime wari uhagarariye Unity Club Intwararumuri, yavuze ko ibitekerezo abanyeshuri bagaragaje ari byinshi kandi ko bigomba guhindura imyumvire y’abatekeraga gusenya amateka y’abanyarwanda.

Yasabye abanyeshuri biga muri UTAB kwiyumbamo ubunyarwanda no gukomeza guharanira kubaka u Rwanda ruzira amacakubiri.

Yagize ati “Kuva twatangira ibiganiro kuri Ndi umunyarwanda byatanze umusaruro ushimishije. Urubyiruko rwagaragaje ko hagomba guhinduka amateka mabi ndetse no kurwanya abashaka kuyagoreka bayavuga uko atari”.

Yakomeje agira ati “Ndi Umunyarwanda itubere ubuzima, ndi umunyarwanda ni umurage tugomba gusigasira no kwimakaza”.

Uyu muyobozi niwe watangije ihuriro ry’ubumwe n’Ubudaheranwa muri UTAB ndetse anabashyikiriza inkunga y’ibihumbi 500Frw yo kuyifasha mu ntangiriro z’ibikorwa byayo.

Umuyobozi w’Akarere ka Gicumbi wungirije ushinzwe imibereho myiza y’abaturage, Mbonyintwari Jean Marie Vianney, yashimye umusanzu wa UTAB mu mibereho myiza y’abaturage ba Gicumbi, avuga ko nta kabuza n’umusanzu izatanga kuri gahunda ya Ndi Umunyarwanda uzaba mwiza cyane.

Kaminuza zigera kuri 13 ni zo zitabiriye amarushanwa kuri Ndi umunyarwanda ategurwa na Unity Club Intwararumuri. UTAB ibaye ishuri rya gatandatu risojwemo aya marushanwa, uyu muryango uteganya ko mu mashuri yose asigaye amarushanwa azasozwa biterenze ukwezi kumwe.

Aya marushanwa yitabiriwe na kaminuza zirimo; UR Campus ya Huye, UTAB Byumba, Cathoric University of Rwanda( CUR), Universty of Lay Adventist of Kigali (UNILAK), UR campus Rukara, UR Campus of Nyagatare, IPRC Karongi na Kibogora Polytechnique.

Ubwo hahembwaga abanyeshuri ba UTAB bahize abandi mu byiciro by'imivugo n'indirimbo
Uwiringiyimana Celestin ahembwa kubera indirimbo nziza ya Ndi Umunyarwanda yakoze
Visi Meya Mbonyintwari ahemba umunyeshuri watsinze amarushanwa ya Ndi Umunyarwanda
Byari ibyishimo ku banyeshuri batsinze amarushanwa ya Ndi Umunyarwanda
Hon. Francine Tumushime ashimira umunyeshuri watsinze amarushanwa kuri gahunda ya Ndi Umunyarwanda
Francine Tumushime wari uhagarariye Unity Club Intwararumuri yasabye abanyeshuri gusigasira Ndi Umunyarwanda
UTAB ibaye ishuri rya gatandatu risojwemo aya mahugurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .