Unity Club igiye gushimira abarinzi b’Igihango bane barimo Rugamba Cyprien na Musenyeri wa Gikongoro

Yanditswe na Rabbi Malo Umucunguzi
Kuya 25 Ukwakira 2018 saa 07:30
Yasuwe :
0 0

Abarinzi b’igihango bane barimo Rugamba Cyprien na Musenyeri Hakizimana Célestin wa Diyosezi ya Gikongoro, bazashimirwa kuri uyu wa Gatanu n’Umuryango Unity Club, ku bwo guharanira ubumwe.

Ni igikorwa giteganyijwe ubwo Unity Club Intwararumuri izaba igira Ihuriro rya 11 ngarukamwaka, rizabera muri Intare Conference Arena.

Rizagaruka ku rugendo rwa Ndi Umunyarwanda no kwiga uko rwanozwa ngo rushinge imizi mu muryango no mu rubyiruko.

Iri huriro ryateguwe n’umuryango Unity Club ku bufatanye na Komisiyo y’Igihugu y’Ubumwe n’Ubwiyunge (NURC). Insanganyamatsiko y’uyu mwaka igira iti ‘Ndi umunyarwanda: Inkingi yo kubaka amahoro mu muryango’

Itangazo ryashyizwe ahagaragara rivuga ko “mu gice cya kabiri cy’iri huriro, umuryango Unity Club uzashimira Abarinzi b’Igihango bane (4), ku bwo guharanira ubumwe.”

Musenyeri Hakizimana Célestin

Ubu ni umushumba wa Diyosezi Gatorika ya Gikongoro. Mu gihe cya Jenoside yakorewe Abatutsi mu 1994, Hakizimana Célestin yari Padiri mu kigo cyitiriwe St Paul mu Mujyi wa Kigali.

Ashimirwa ko ku wa 13 Mata 1994 haje imodoka yo guhungisha ababikira n’abapadiri ngo bajye i Kabgayi, ariko we ntiyasiga abamuhungiyeho.

Yarengeye abamuhungiyeho barenga 2000 kandi nta yindi ntwaro yifashishije uretse umutima w’ubumuntu, ubwitange no gutanga amafaranga ku nterahamwe, n’ikanzu y’umupadiri.

Itangazo rya Unity Club rigira riti “Yakomeje gushakira abamuhungiyeho amazi, ibiribwa n’imiti kugeza Inkotanyi zije kubarokora mu ijoro ryo ku wa 16 Kamena 1994. Umuvandimwe we yaje kumubikira ko bapfushije umubyeyi wabo, ntiyajya gushyingura kuko atashakaga gusiga Abatutsi bamuhungiyeho.”

Na nyuma y’icyo gihe, yakomeje guteza imbere ibikorwa by’isanamitima no kunga Abanyarwanda muri Diyoseze Gatolika ya Gikongoro.

Yahawe Impeta y’Ishimwe ‘UMURINZI’ yo kurwanya Jenoside ku wa 4 Nyakanga 2006.

Mukandanga Dorothée

Mu gihe cya Jenoside, Mukandanga wari umuyobozi wa “Ecole des Sciences infirmirèes de Kabgayi”.

Yaranzwe no gukunda umurimo unoze; nta macakubiri, akaba umuntu ufite ubumuntu, akarangwa n’impuhwe, igishyika n’urukundo. Ari no mu bashinze umuryango “PAX CHRISTI” wari ugamije amahoro n’ubwumvikane mu Banyarwanda.

Itangazo rigira riti «Yarwanye ku banyeshuri bagera kuri 50 mu bo yayoboraga bari basigaye ku ishuri. Yagiriye inama abanyeshuri ko igihe bagiye kuva mu kigo bagiye ku bitaro (aho bakoraga imenyerezamwuga), bagomba kuba bambaye kimwe, kugendera hamwe, bajya no gutaha bagatahira rimwe ku buryo nta kwivangura kwabarangaga.»

Indangamuntu ngo yari yarazibambuye arazibabikira kugira ngo hatagira uwayerekana.

Rikomeza rigira riti «Yahanganye n’interahamwe zashakaga kwica abo bana no kubafata ku ngufu azibuza kwinjira aho bararaga. Ku wa 12 Gicurasi 1994, ahurujwe n’umuzamu, yatabaye abanyeshuri mu ijoro, bari batewe n’abasirikare n’interahamwe. »

"N’ubwo yashoboraga kwitandukanya n’abo yarengeraga, yemeye gushyira ubuzima bwe mu kaga atabara agamije kubarwanaho atesha abari bagiye kwica abanyeshuri. Abicanyi babonye ko yitambika ntibagere ku migambi mibisha yabo, bamujyanye mu biro bye barahamutsinda."

Urukundo n’ubumwe yatoje abanyeshuri yari ashinzwe biracyabaranga mu mibanire yabo muri iki gihe kandi bakomeje kumuhamiriza ubutwari n’ineza byamuranze.

Rugamba Cyprien

Abicishije mu bihangano bye, Rugamba yakanguriye Abanyarwanda indangagaciro z’umuco nyarwanda apfundika ipfundo ry’ubupfura bukuza ubumuntu mu bantu.

Yanakeburaga abategetsi abatoza kurangwa n’imiyoborere izira ruswa, amacakubiri no kwigwizaho ibyarubanda. Ibyo yabikoze abinyujije muri zimwe mu ndirimbo ze nka Umuntu ni nk’undi, Umurage w’intore, Inda nini muyime amayira; Ntumpeho; Umuti w’ubutindi…

Ikindi ntiyatinye gusaba ko amoko yakurwa mu ndangamuntu kuko ashyira imbere imyemerere irimo agaciro k’umuntu niwe ubwe, si ubwoko bwe, si n’aho akomoka.

Unity Club igira iti « Yanasabye ko ibitangazamakuru bibiba urwango nka RTLM byahagarikwa. Afatanje n’umugore we Mukansanga Daphrosa Rugamba yashinze “communauté de l’Emmanuel” agamije guteza imbere ubumwe n’amahoro mu miryango. Iki gikorwa yatangije cyarakomeje kugeza n’ubu. »

Ku wa 7 Mata 1994 abasirikare barindaga Umukuru w’Igihugu bamwicanye n’umugore we n’abana batandatu.

Umuryango AERG usabirwa Ishimwe ry’Ubumwe

AERG ni umuryango watangijwe n’abanyeshuri bacitse ku icumu rya Jenoside yakorewe Abatutsi mu 1994 bagamije kugarura icyizere mu bana bacitse ku icumu bari mu mashuri yisumbuye na Kaminuza.

Umuryango wavukiye muri Kaminuza y’u Rwanda i Butare ku wa 20 Ukwakira 1996. Wihaye intego zirimo kwibuka; kwirinda; guharanira kubaho kandi neza; kwigisha/Kurerana.

Unity Club yagize iti “Kugeza ubu AERG ikorera muri za Kaminuza n’amashuri makuru 43 mu Gihugu no mu mashuri y’isumbuye arenga 500. AERG ifite abanyamuryango bagera ku 41,159.”

Hari n’ibibazo bishingiye kuri zimwe mu ngaruka za Jenoside yakorewe Abatutsi mu 1994 byari bibangamiye abanyeshuri, AERG yashakiye ibisubizo.

Birimo kubura aho bataha mu biruhuko; kubura umuryango utanga urukundo, inama n’imbaraga zo kubaho no kubana neza n’abandi; kuba nyamwigendaho, nyakamwe, kwiheza no guheza abandi.

Ntibaheje n’abandi kuko uretse abacitse ku icumu rya Jenoside yakorewe Abatutsi mu 1994, umuryango AERG wakira n’abandi banyeshuri babishaka bamaze gusuzuma ubusabe bwabo nta vangura.

Umuryango Unity Club Intwararumuri, watangijwe na Madamu Jeannette KAGAME, akaba ayibereye n’Umuyobozi Mukuru w’Ikirenga.

Ugamije gutanga umusanzu mu kubaka ubumwe bw’Abanyarwanda, ukaba ugizwe n’abayobozi bari muri Guverinoma n’abayihozemo ndetse n’abo bashakanye.

Uyu muryango washinzwe muri Gashyantare 1996, wiha intego yo “Kwimakaza umuco w’ubumwe n’amahoro, byo nkingi z’iterambere rirambye.”

Mu myaka 22 ishize umuryango Unity Club uharanira gushyira mu bikorwa intego wiyemeje mu rugamba rwo kubera Abanyarwanda “Intwararumuri”, hamaze kubakwa inyubako eshanu (Impinganzima Hostel) mu Ntara zitandukanye, zigenewe ababyeyi b’Intwaza - bagizwe incike na Jenoside yakorewe abatutsi muri Mata 1994.

Unity Club kandi yubatse inzu 20 mu karere ka Rubavu zigenerwa abana b’imfubyi bakuwe muri Orphelinat Noel de Nyundo, muri gahunda ya ‘tubarerere mu muryango’.

Unity Club kandi iritegura gutuza abandi babyeyi 50 b’Intwaza mu Ukuboza 2018 mu Impinganzima hostel yo mu Karere ka Rusizi.

Musenyeri Hakizimana Celestin wa Diyosezi ya Gikongoro ushimirwa ko yatabaye Abatutsi muri St Paul
Rugamba Cyprien ugiye gushimirwa nk'umurinzi w'Igihango, aha yari kumwe n'umugore we Daphrose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza