UNICEF yashimye imbaraga u Rwanda rwashyize mu kubahiriza uburenganzira bw’abana

Yanditswe na Ishimwe Israel
Kuya 16 Kamena 2020 saa 10:00
Yasuwe :
0 0

Umuyobozi w’Ishami ry’Umuryango w’Abibumbye ryita ku Bana (UNICEF) mu Rwanda, Julianna Lindsey, yanyuzwe n’intambwe u Rwanda rwateye mu guharanira uburenganzira bw’abana kuri serivisi zirimo iz’ubuvuzi n’uburezi.

Ubusanzwe buri tariki ya 16 Kamena hizihizwa Umunsi Mpuzamahanga w’Umwana w’Umunyafurika, hazirikanwa by’umwihariko ishyirwa mu bikorwa n’iyubahirizwa ry’uburenganzira bw’ibanze bw’umwana.

Kimwe n’ahandi ku Isi, mu Rwanda uyu munsi wizihijwe hatangwa ubutumwa bushishikariza abatuye igihugu kwimakaza umuco wo guharanira ko uburenganzira bw’abana bugerwaho.

U Rwanda rwawizihije rwishimira ibyagezweho mu gushyira mu bikorwa ingamba zivuguruye zo kwita ku mwana zashyizweho na Guverinoma mu 2012. Hari intambwe rwateye mu kubahiriza uburenganzira bw’umwana, haba mu burezi, ubuzima no kurererwa mu muryango.

Uyu munsi wizihijwe hatangwa ubutumwa buhamagarira abaturarwanda bose kuzirikana no kwita ku bureganzira bw’abakiri bato mu nsanganyamatsiko igira iti ‘‘Malayika Murinzi, Umuhamagaro kuri buri Munyarwanda.’’

Umuyobozi wa UNICEF mu Rwanda, Julianna Lindsey, yabwiye IGIHE ko uyu mwaka udasanzwe kuko ibirori by’umunsi w’Umwana w’Umunyafurika byasanze Isi ihanganye n’icyorezo cya Coronavirus.

Kuva tariki ya 15 Werurwe 2020, amashuri yose mu Rwanda yarafunzwe nk’imwe mu ngamba zo kwirinda ikwirakwira rya Coronavirus.

Ikigo cy’Igihugu gishizwe Uburezi (REB) cyashyizeho uburyo bufasha abanyeshuri bari mu rugo kwiga amwe mu masomo, hifashishijwe Televiziyo na Radio Rwanda.

Lindsey avuga ko ingamba zafashwe mu kurinda abana indwara no kubafasha kugera ku makuru ari ingenzi cyane.

Ati “Nishimiye ko REB, Unicef n’ibindi bigo byashoboye gushyiraho uburyo bwo kwigisha abana binyuze kuri radio. Kuri ubu abana bagera kuri miliyoni eshatu babasha gukurikira amasomo kuri radio, ababona internet nabo bakurikirana amasomo neza.’’

Yavuze ko nubwo hari imbogamizi mu by’ubukungu n’imibereho myiza, abana bashobora kubona uburezi.

UNICEF iri gukorana na Minisiteri zitandukanye ireba uko yafasha abana bose kugerwaho n’uburezi ndetse na serivisi z’ubuvuzi.

Yagize ati “Tugomba kwizera ko mu gihe turinda abana COVID-19 tugomba no kubarinda imbasa, rubéole.’’

UNICEF kandi yashyize imbaraga mu guharanira ko uburenganzira bw’abana bwubahirizwa bikwiye.

Yakomeje ati “Mu Rwanda dukorana n’Inama y’Igihugu y’Abana, iyo uburenganzira bw’abana bwahonyowe hari nimero bahamagara bagafashwa. Ni intambwe nziza kuri twe kandi abana bakoresha ayo mahirwe. Indi ntambwe yatewe kandi abana bakomeje kunguramo ni ijyanye n’ishyirwaho ry’Ikigo Isange One Stop Center gitangirwamo amakuru ku ihohoterwa rikorerwa abana n’abagore.’’

Isange One Stop Center yatangiye ifite ibigo bibiri ariko ubu bigeze kuri 44 mu gihugu hose.

Lindsey avuga ko “Bitanga ubufasha burimo ubw’ubuvuzi, ubujyanye n’imitekerereze n’ubw’amategeko ndetse n’iperereza rya Polisi rigakorwa. Ibyo bigabanyiriza umwana umutwaro wo gukurikirana icyo kirego kugira ngo bafashwe. Abakora muri ibi bigo kandi bafite ubumenyi bubafasha gukurikirana ibirego byo gufata ku ngufu n’ihohoterwa ryo mu ngo.’’

-  Ibigo mbonezamikurire by’abana bimaze gutanga umusaruro

Urugo mbonezamikurire rw’abana bato [Early Childhood Development: ECD] ni imwe muri gahunda Guverinoma y’u Rwanda yatangije mu 2014 igamije gukumira no guhangana n’ibibazo by’igwingira n’imirire mibi mu bana.

Kuri ubu abana 700 bafashwa binyuze muri ibi bigo byashyizweho bituriye amasoko mu bice bitandukanye by’igihugu.

Lindsey yagaragaje ko nubwo bishobora gufata igihe cyo gutanga umusaruro ufatika, ariko bifite umumaro.

Ati “Abana bari mu bigo baba barinzwe, babona amafunguro afite intungamubiri, kandi ababyeyi baba bazi neza ko bashobora kwidagadura binyuze mu kubyina, gukina n’ibindi bijyanye no gukangura ubwonko bw’abana. Imikurire ihamye y’ubwonko bw’ikiremwamuntu itangira mu myaka ibiri ya mbere.’’

“Dutekereza ko mu gihe abanyeshuri bagiye ku ishuri bazaba biteguye, gutangira amasomo yabo no kwitwara neza.’’

U Rwanda rwateye intambwe idasanzwe mu myaka 20 ishize mu bijyanye n’igabanuka ry’abana bapfa bavuka kuko Raporo ya gatanu y’Ikigo cy’Igihugu cy’Ibarurishamibare cy’u Rwanda (NISR) ku mibereho n’ubuzima by’abaturage igaragaza ko impfu z’abana bapfa batarageza imyaka itanu, mu 2000 mu bana 1000 hapfaga 196 naho mu 2014/2015 mu bana 1000 hapfa 50. Abana bapfa bavuka ubu bageze kuri 20/1000.

Yavuze ko hakiri ibikeneye gukorwa mu Rwanda n’ahandi aho nk’umubare w’abana bapfa wagera kuri zero.

Ati “Nizera ko ushingiye ku byakozwe mu myaka 10 cyangwa 20 ishize, u Rwanda ruzaba ruri ku mwanya mwiza mu bijyanye no kubahiriza uburenganzira bw’umwana.’’

Umwana agomba kugira uburenganzira ku buzima bwiza, gukingirwa, kurindwa ihohoterwa, kurererwa abana mu muryango, guhabwa uburere buboneye, kubona ubutabera no kugira uburenganzira ku bimukorerwa.

Lindsey yagaragaje ko mu gihe hizihizwa Umunsi Mpuzamahanga w’Umwana w’Umunyafurika icy’ingenzi si ukurinda umwana umunsi umwe mu isaga 350 igize umwaka ahubwo ni ukuzirikana uruhare rwa buri wese mu kuzirikana ku ndangangaciro zo kwita ku mwana wese nk’uwawe.

Umunsi Mpuzamahanga w’Umwana w’Umunyafurika wizihizwa buri mwaka kuva mu 1991, ubwo wemezwaga n’Umuryango w’Ubumwe bwa Afurika (OUA). Washyizweho mu kuzirikana urupfu rw’abana b’i Soweto muri Afurika y’Epfo bishwe n’abazungu bazize kwigaragambya baharanira uburenganzira bwawo ku wa 16 Kamena 1976.

Umuyobozi w’Ishami ry’Umuryango w’Abibumbye ryita ku Bana (UNICEF) mu Rwanda, Julianna Lindsey
Buri wa 16 Kamena buri mwaka hizihizwa Umunsi w’Umwana w’Umunyafurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .