00:00:00 IGIHE NETWORK KN KINYARWANDA EN ENGLISH FR FRANCAIS

Umwuka uri mu bitabiriye CHOGM ku Rwanda

Yanditswe na Ntabareshya Jean de Dieu
Kuya 22 June 2022 saa 02:58
Yasuwe :

Ku Cyumweru tariki ya 19 Kamena 2021, nibwo abaturutse imihanda yose mu bihugu binyamuryango muri Commonwealth bari banzitse inama y’ihuriro rya mbere ari ryo ry’urubyiruko rugize uyu muryango.

Ku munsi wakurikiyeho hatangijwe ku mugaragaro ihuriro ry’abagore ryanitabiriwe na Madamu Jeannette Kagame ndetse n’Umunyamabanga Mukuru wa Commonwealth, Patricia Scotland n’abandi batandukanye bahagarariye imiryango mpuzamahanga n’ibihugu byabo.

Iki cyumweru cyose kugeza ku wa 26 mu Rwanda, hazaba hari kubera inama mpuzamahanga y’Abakuru b’Ibihugu na za Guverinoma bo mu muryango w’ibihugu bikoresha Icyongereza, Commonwealth, ariko ishamikiyeho andi mahuriro menshi.

Muri aya mahuriro yagiye atangira mu bihe bitandukanye harimo ihuriro ry’urubyiruko ryatangiye ku Cyumweru tariki ya 19 Kamena 2022 riri kubera muri Intare Arena, Ihuriro ry’Abagore ryatangijwe ku wa 20 Kamena 2022 muri Serena Hotel, Ihuriro ry’Ubucuruzi ry’abagize Commonwealth ryatangijwe kuri uyu wa Kabiri tariki 21 Kamena 2022 muri Kigali Conference and Exhibition Village (KCEV) ndetse n’ihuriro rigamije kwiga ku iterambere ry’abaturage riri kubera muri M Hotel.

Urebye imyiteguro y’inama yagenze neza ku ruhande rw’u Rwanda rwayakiriye na cyane ko yari imaze gusubikwa inshuro nyinshi bitewe n’icyorezo cya Covid-19.

Uretse imirimo yo kwitegura ariko abayitabiriye nabo baseruka neza babukereye ndetse bakabifashwamo na serivisi utasanga ahandi iri ku rwego rwo hejuru aho urubyiruko rwateguwe usanga rufasha abitabiriye iyi nama mu buryo bunyuranye.

Uganiriye n’abitabiriye iyi nama icyo bazakubwira ni ibisubizo n’imyanzuro biteze izafatirwa muri iyi nama cyane ko ayo mahuriro yose yabaye agomba gufata imyanzuro itandukanye n’imbogamizi bikazagezwa ku nama nyirizina y’Abakuru b’Ibihugu izatangira kuri uyu wa 25 Kamena 2022 bakanagaruka ku kuntu bakiriwe bageze mu Rwanda.

Mu baganiriye na IGIHE bitabiriye Inama y’Ihuriro riri kwiga ku iterambere ry’abaturage yatangijwe kuri uyu wa Kabiri, bagaragaje ko batunguwe no gusanga u Rwanda ruruta ibihugu byinshi ku Isi mu gusa neza ndetse no kwakirana abantu urugwiro.

Katharine Bryant waturutse mu Bwongereza, yari ageze mu Rwanda ku nshuro ye ya mbere, yavuze ko nubwo bagiye kuhamara igihe gito kubera ko baje mu nama ariko yifuza kuzahagaruka kuko hari ibyiza byinshi.

Ati “Ngeze mu Rwanda nakiriwe neza cyane, uko nasanze bavugaga u Rwanda ko ruhorana umutekano, isuku ni nako narusanze koko. Nubwo nzamara iminsi mike ariko nifuza kuzagaruka ngatembera u Rwanda kugira ngo ndusheho kuryoherwa. Ubu dufite igihe gito kubera inama ariko nabonye u Rwanda rwihariye.”

Katharine Bryant utatinye kugereranya u Rwanda na paradizo yavuze ko urebye uburyo Umujyi wa Kigali wubatse, umutekano uhari n’isuku uruta kure Umujyi wa Londres mu Bwongereza nubwo wubatswemo imiturirwa ihambaye.

Yavuze ko nagera mu Bwongeraza azashishikariza inshuti ze zikazaza gutemberera mu Rwanda kuko ari igihugu gitangaje.

Ku ruhande rwa mugenzi we waturutse muri Malaysia, Elly Williams yagaragaje ko u Rwanda rufite abantu bakirana abashyitsi urugwiro n’urukundo ku buryo byamuhaye ishusho y’uko Abanyarwanda babanye.

Ati “Urebye mu Rwanda nasanze ari heza pe, mufite abaturage bakunze kwakira abantu, bafite urugwiro, mbega nta handi wasanga abantu nk’aba.”

Yagaragaje ko nubwo atari azi byinshi ku Rwanda yifuza gusura urwibutso rwa Jenoside rwa Kigali kugira ngo arusheho gusobanukirwa neza n’amateka yarwo.

Undi wagaragaje ubudasa bw’u Rwanda ni uwavuye muri Cameroun, Kungaba Fongih Leonel.

Yavuze ko atari ubwa mbere yari ageze mu Rwanda ariko ngo uko ahageze asanga hari impinduka zigaragaza iterambere.

Yakomeje agira ati “Ni inshuro ya kane nari mpageze ariko uko ngeze mu Rwanda nsanga hari impinduka zidasanzwe zigaragaza iterambere. U Rwanda ni igihugu cyiza kandi gitekanye, kiri no mu bihugu biri gutera imbere mu buryo bwihuse.”

Uyu mugabo ngo akigera mu Rwanda yatunguwe no gusanga abantu bose bagenda kuri moto baba bafite ingofero zirinda umutwe (casque) yaba abagenzi n’abamotari nyirizina kandi ngo ni ibintu biboneka hake.

Ubwo yatangizaga ku mugaragaro ihuriro ry’abagore, Umunyamabanga Mukuru wa Commonwealth na we yagaragaje ko u Rwanda ari igihugu cyiza ndetse atebya agaragaza ko kiruta u Busuwisi hamwe mu hantu hakunze gutangarirwa n’amahanga.

Ati “Ndashimira uburyo twakiriwe, nakomeje kumva abantu bajujura ngo ni heza, harasukuye, abandi bakavuga ngo ni heza kuruta u Busuwisi”.

Abitaribiriye inama ya CHOGM 2022 bagaragaza ko mu Rwanda ari igihugu kiri ku rwego rwiza mu nzegfo zose bahereye ku birebana n’isuku, umutekano, imiyoborere ndetse no kuba ibintu byose biba biri ku murongo mu buryo budasanzwe.

Iyi nama ya CHOGM 2022 biteganyijwe ko izitabirwa n’abantu basaga 5000 baturutse mu bihugu bitandukanye bigize umuryango wa Commonwealth ndetse ikazanafatirwamo imyanzuro yitezweho kuzamura iterambere ndetse n’impinduka ku basaga miliyari 2.5 bawugize biganjemo urubyiruko.

Buri wese ari guharanira gufata ifoto y'urwibutso
Abanyamahanga bakomeje kwishimira uko u Rwanda rwabakiriye
Umwongereza Katharine Bryant (Ibumoso) yavuze ko yakunze u Rwanda
Umunya-Malaysia Elly Williams yagaragaje ko u Rwanda ari rwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .