00:00:00 IGIHE NETWORK KN KINYARWANDA EN ENGLISH FR FRANCAIS

Umwanzi ukomeye w’u Rwanda

Yanditswe na Prudence Kwizera
Kuya 17 June 2022 saa 07:46
Yasuwe :

U Rwanda nk’igihugu gifite amateka yihariye harimo n’ashaririye ya Jenoside yakorewe Abatutsi mu 1994, kigomba kugira uburyo bw’imiyoborere n’imibereho yihariye bitandukanye n’ibindi bihugu.

Jenoside yakorewe Abatutsi mu 1994 kugira ngo ibe byatewe n’ubutegetsi bubi bwabibye urwango n’amacakubiri mu Banyarwanda bituma bamwe bumva ko batandukanye n’abandi.

Nyamara amateka y’u Rwanda agaragaza ko Abanyarwanda bose bafite umuco umwe, ururimi rumwe ndetse ari abavandimwe ku buryo kubabwira ko batandukanye ari ikinyoma cyambaye ubusa.

Ubuhamya bwa bamwe mu Banyarwanda b’inararibonye bugaragaza ko muri Repubulika ya mbere n’iya kabiri habagaho ivangura rikomeye kuko no mu ndangamuntu habagamo ubwoko, Hutu, Tutsi na Twa. Ntabwo byagarukiye aho gusa kuko iryo vangura ryageraga no mu mashuri.

Prof Dusingizemungu Jean Pierre ubwo yatangaga ikiganiro ku banyeshuri bo muri Kaminuza y’u Rwanda, Ishami rya Huye muri mata 2018, yagaragaje ko kugira ngo Jenoside yakorewe Abatutsi igerweho habanje icyiciro cyo kubiba amacakubiri mu Banyarwanda.

Yavuze ko bimwe mu bibigaragaza ni uburyo mu ndangamuntu hashyizwemo amoko (Hutu, Tutsi, Twa), kwigisha urwango n’amacakubiri byaranze bamwe mu bategetsi b’icyo gihe, gutoza interahamwe, inyigisho zivuga ko umwanzi w’u Rwanda ari umututsi n’ibindi.

Yatanze urugero aho muri Mata 1975 u Rwanda rwasinye amasezerano mpuzamahanga yo gukumira no guhana icyaha cya Jenoside ariko rwifata ku ngingo ya cyenda yateganyaga ko niba igihugu runaka kitubahirije ibikubiye muri ayo masezerano gishobora gushyikirizwa Urukiko Mpuzamahanga rwa Loni.

U Rwanda rukimara kubohorwa muri Nyakanga 1994, kimwe mu bintu bikomeye Leta y’Ubumwe bw’Abanyarwanda yakoze ni ugukuraho amoko no kutongera kuyashyira mu ndangamuntu, yigisha Abanyarwanda bose ko ari umwe kandi bikwiye kuba bityo kugira ngo biyubakire igihugu aho kumva ko batandukanye.

Amacakubiri

Amateka y’u Rwanda yerekana ko abanzi b’u Rwanda bagiye bifashisha uburyo bwo kucamo Abanyarwanda ibice bagamije kubasenyera igihugu.

Uwo muvuno abanga u Rwanda bakunze guca, Leta y’Ubumwe bw’Abanyarwanda yawumenye kera iwukumira hakiri kare nk’uko Abanyarwanda bakunze kubivuga ngo ‘Ibuye ryagaragaye ntiriba ricyishe isuka’.

Ubwo yatangaga ikiganiro mu Itorero ry’abarimu bo mu mashuri yisumbuye bigisha amateka tariki ya 9 Mutarama 2020, Umujyanama wa Perezida wa Repubulika mu by’Umutekano, Gen Kabarebe James, yagaragaje ko umwanzi w’u Rwanda ukomeye ari “amacakubiri”, bityo bakwiye kuyakumira no kuyirinda.

Yagarutse ku mateka y’u Rwanda avuga uburyo amacakubiri yabibwe mu Banyarwanda ahungabanya igihugu bigeza kuri Jenoside yakorewe Abatutsi na n’ubu abantu bakaba bagihangana n’ingaruka zayo.

Yagize ati “Ikintu cyahungabanyije u Rwanda, umwanzi warwo wa mbere n’ubu ngubu ushobora kuzaruhungabanya abantu batamwibanzeho, umwanzi w’u Rwanda ni amacakubiri nta kindi. Ni cyo cyashobora u Rwanda nta kindi cyadushobora.”

Amateka y’u Rwanda agaragaza ko mbere y’ubukoloni, Abanyarwanda bari babanye neza mu gihugu cyabo baza kwangana no kwicana nyuma yo kubibwamo urwango.

Abakolonije u Rwanda hari byinshi bibi bakoze nk’aho bafataga Abanyarwanda bakabajyana mu bucakara, bagashyira n’ingufu mu kubacamo ibice bababwira ko batandukanye.

Ayo mateka yose yagiye agira ingaruka mbi ku Rwanda bigeza aho Abatutsi birukanwa mu gihugu abandi baricwa mu 1959.

Usibye kugira ingaruka ku mibanire, amacakubiri yatumye n’ubukungu bw’u Rwanda n’Abanyarwanda bundindira kuko batari bashyize hamwe.

Igitabo cyashyizwe ahagaragara n’iyari Komisiyo y’Igihugu y’Ubumwe n’Ubwiyunge (NURC) mu 2017 gikubiyemo ibyavuye mu bushakashatsi bwakozwe n’abahanga ku mateka y’u Rwanda, kigaragaza ko umwanzi w’u Rwanda ukomeye ari amacakubiri.

Gikubiyemo amateka y’u Rwanda kuva mu mbere y’ubukoloni, mu gihe cy’ubukoloni, muri Repubulika ya mbere n’iya kabiri, mu gihe cy’urugamba rwo kubohora u Rwanda kugera muri 1994, no kuva mu 1994 kugera muri 2003 ubwo igihugu cyavaga mu nzibacyuho hagatorwa Umukuru w’Igihugu.

NURC imurika icyo gitabo yavuze ko kirimo ingingo zikuraho urujijo rwashyizwe mu mateka y’u Rwanda kandi hari icyizere ko abasomyi bazasobanukirwa ukuri ku Rwanda rwo hambere n’ibyagiye birubamo.

Yasobanuye ko hari ibitabo byari byaragiye byandikwa ku mateka y’u Rwanda ariko bikandikwa biyagoreka, abanditsi babyo bagamije kubiba amacakubiri n’urwango mu Banyarwanda.

Icyo gitabo cy’amapaji 726 kiboneka mu Ngoro zose z’u Rwanda cyerekana ko umwanzi ukomeye w’u Rwanda n’Abanyarwanda ari amacakubiri, bityo bakwiye kuyirinda bakima amatwi umuntu wese washaka kuyababibamo.

Ibi rero byerekana ko buri Munyarwanda wese akwiye gutanga umusanzu we mu kubaka no gushyigikira ubumwe bw’Abanyarwanda, arinda ko hari uwakongera kubazanamo urwango n’amacakubiri.

Abanyarwanda barasabwa kunga ubumwe birinda amacakubiri afatwa nk'umwanzi ukomeye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .