Umwaka wa Coronavirus mu Rwanda : Uko icyari icyorezo Abanyarwanda bumvira kure kibageze ku buce

Yanditswe na Iradukunda Serge
Kuya 17 Ukuboza 2020 saa 05:55
Yasuwe :
0 0

Mu mezi 10 nta Munyarwanda n’umwe wakekaga ko azaba abayeho uko abayeho uyu munsi, afite isaha ntarengwa yo gutaha yayirengaho akarara muri stade, asabwa kwirirwa yambaye agapfukamunwa ndetse no gukaraba intoki bya burikanya, gusa mu kanya gato icyorezo cya Covid-19 cyarabihinduye, abenshi inzozi bari bafitiye 2020 ziyoyoka nk’umuyonga.

Uyu munsi mu Rwanda abamaze kwandura icyorezo cya Covid-19 barakabakaba ibihumbi birindwi, mu gihe abo kimaze guhitana ari 57. Ni umubare uri hejuru ku buryo iyo umuntu arebye uko byatangiye atiyumvisha ko byashoboraga kugera aha.

Byatangiye mu mpera za 2019 benshi bumva mu bitangazamakuru binyuranye ko hari icyorezo gishya kiri guca ibintu mu Bushinwa. Ku Munyarwanda wari wibereye i Kigali cyangwa mu bindi bice bigize igihugu, iby’iki cyorezo ntibyari bimuraje inshinga kuko yumvaga aho kiri ntaho ahuriye naho cyane.

Nti byatinze nyuma y’ibyumweru bike abanduye iki cyorezo batangiye kugaragara ku yindi migabane by’umwihariko uw’u Burayi na Amerika. Muri Gashyantare inkuru ikwira hose ko umuntu wa mbere ufite iki cyorezo yagaragaye muri Afurika mu Misiri.

Ku Munyarwanda wakurikiraniraga hafi amakuru y’iki cyorezo birumvikana ko yagizemo ikikango, bitewe n’uko icyo yibwiraga ko kimurI kure cyari gitangiye kumurya isataburenge mu buryo bugaragara.

Mu gitondo cyo ku wa 13 Werurwe, Minisitiri w’Ubuzima muri Kenya, Mutahi Kagwe yabwiye itangazamakuru ko muri iki gihugu habonetse umuntu wa mbere wanduye Covid-19, ubwoba butangira kuba bwinshi i Kigali, bamwe bati “imbeba irya umuhini yototera isuka.”

Ni icyorezo cyatangiye kugira ingaruka mu Rwanda kitaranahagera, kuko uwari Minisitiri w’Ubuzima yirukanywe kubera gutanga amakuru apfuye ajyanye n’uburyo bwakoreshwa mu kukirinda.

Kugira ngo iki cyorezo kigere mu Rwanda ntibyatinze kuko nyuma y’umunsi umwe Kenya itangaje ko yabonye umuntu wa mbere wacyanduye, ku wa 14 Werurwe Minisiteri y’Ubuzima nayo yahise itangaza ko mu gihugu hagaragaye umuntu ufite Covid-19.

Ibintu byahise bihinduka kuri uwo wa gatandatu, bimwe mu bikoresho by’isuku nk’uturindantoki dutangira kugurwa ku bwinshi.

Nyuma y’uyu murwayi u Rwanda rwahise rufata ingamba zitandukanye zigamije kugira ngo gihashywe kitarakwirakwira. Ministeri y’Uburezi yahise ishyira hanze itangazo rivuga ko amashuri agomba gufunga guhera kuwa Mbere tariki 16 Werurwe, abakozi basabwa gutangira gukorera mu rugo aho bishoboka.

Hahise hafatwa umwanzuro w’uko insengero zifungwa, abantu bagatangira gusengera mu rugo.

Uku kwezi kwa Werurwe ni ko Leta yafashemo ibyemezo byinshi bigamije gukumira iki cyorezo birimo no guhagarika ingendo z’indege z’abagenzi ziva cyangwa ziza mu gihugu, ni icyemezo cyafashwe ku wa 20 Werurwe 2020.

Bitandukanye n’ibindi bihugu kugeza mu kwezi kwa Gicurasi iki cyorezo nubwo cyari kimaze kwandura benshi cyari kitarahitana umuntu n’umwe.

Ku wa 30 Gicurasi 2020 nibwo Minisiteri y’Ubuzima yatangaje ko umurwayi wa mbere yishwe na Coronavirus ku butaka bw’u Rwanda. Nyakwigendera yari umushoferi w’imyaka 65 wari utuye mu gihugu cy’abaturanyi, wageze mu Rwanda arembye.

Nyuma y’uyu ku wa 2 Kamena iki cyorezo cyarongeye cyica undi muntu, gusa kugeza iki gihe abari bamaze kucyandura bari bakibarirwa muri 384.

Nyuma y’urupfu rw’uyu mugabo bamwe mu banyarwanda batangiye kumva ko indwara bakerensaga ishobora kuba ifite ubukana burenze ubwo bakeka.

Guma mu rugo yagoye benshi

Mu rwego rwo guhashya iki cyerezo zimwe mu ngamba leta y’u Rwanda yashyizeho ni Guma mu rugo, aho abantu bose bari babujijwe kuva mu ngo zabo. Uwasigaye akora ni uwari uwatangaga serivisi z’ibanze zikenerwa.

Niba hari ikintu Abanyarwanda benshi badashobora kwibagirwa ni ibihe bya Guma mu rugo kuko byabaye intandaro y’ibibazo bitandukanye batari biteze mu buzima bwabo by’umwihariko mu 2020, umwaka igihugu ndetse nabo ku giti cyabo bari barihayemo kuzesa imihigo itandukanye.

Guma mu rugo yabereye benshi intandaro yo kwirukanwa ku kazi abandi bashyirwa mu mubare w’abakozi bagomba kugabanywa mu gihe ndetse n’imishahara ya bamwe yakaswemo kabiri.

Iki cyemezo kandi cyagoye abantu mu buryo bw’amikoro, cyane cyane ko bari baratarizigamye nubwo Leta yashyizeho gahunda zitandukanye zigamije kugoboka abari batangiye kubura ibiribwa.

Hari na raporo nyinshi zakozwe zigaragaza ko Guma mu rugo yarushijeho gutiza umurindi ihohoterwa rikorerwa mu ngo, kuko wa mugabo wari usanzwe ahohotera umugore, cyangwa umugore wahohoteraga umugabo noneho yari amufite amasaha 24/24.

Ibi bihe kandi byatonze abagabo n’abana batari bamenyereye kwirirwa mu rugo amasaha yose.

Leta yaje gufata icyemezo cyo gukuraho guma mu rugo ndetse nyuma y’aho ikomeza kugenda yoroshya zimwe mu ngamba zari zarashyizweho mu kwirinda icyorezo cya Covid-19.

Mu ngamba zagiye zoroshya harimo nko kwigiza inyuma amasaha ntarengwa yo gutaha, kongera umubare w’abemerewe kugenda mu modoka rusange.

Aha Guma mu rugo yari irangiye ariko abatubahiriza amasaha yo gutaha, nabo ntibazibagirwa ibihe n’amajoro bagiriye muri Stade zitandukanye z’igihugu. N’ubu kuri bamwe biracyakomeje.

Muri Guma mu rugo nta n'inyoni yatambaga

Irarushaho gufata indi ntera ariko hari icyizere

Nyuma y’igihe icyorezo cya COVID-19 gisa n’icyagabanyije umurego mu Rwanda, muri aya mezi abiri (Ugushyingo na Ukuboza) imibare isa n’iyongeye kuzamuka. Urugero rworoshye ni uko mu minsi itanu gusa hamaze kuboneka abarwayi 526.

Minisitiri w’Ubuzima, Dr Ngamije Daniel, yavuze ko hamaze kugaragara ko abantu batangiye kubona ko iki cyorezo kigiye kuneshwa, bakadohoka ku mabwiriza yo kwirinda nko kwambara udupfukamunwa no guhana intera.

Yakomeje ati “Badohoka ku mabwiriza, nko muri restaurants ugasanga zahindutse utubari, no muri hoteli ugasanga bicaye badahanye intera, kandi bakahamara amasaha menshi.”

Uretse umubare w’abandura iki cyorezo ku munsi wongeye kuzamuka n’uw’abo gihitana nawo wariyongereye, ndetse inzego z’ubuzima zikemeza ko kuva iki cyorezo cyagera mu Rwanda ubu aribwo zifite umubare munini w’abarwayi bari ku mashini zibafasha guhumeka.

Ibi byatumye Leta yongera gukaza ingamba zo kwirinda, yongera kugabanya umubare w’abagenda mu modoka rusange, abitabira imihango itandukanye ndetse n’inama zirahagarikwa.

Nubwo bimeze gutya ariko Leta y’u Rwanda kimwe n’ibindi bihugu ifite icyizere ko izabasha guhashya iki cyorezo, ibishingiye ku kuba ubu hari inkingo zitanga icyizere ku buryo mu bihugu bimwe na bimwe zatangiye guhabwa abaturage.

Kugeza ubu u Rwanda ruri mu bihugu 96 biri muri gahunda yo kubona urukingo binyuze mu Ishami ry’Umuryango w’Abibumbye ryita ku Buzima n’ishami rishinzwe gukwirakwiza inkingo ibihugu bisanzwe byifashisha.

Minisitiri w’Ubuzima, Dr Daniel Ngamije, kuri iki Cyumweru yatangaje ko u Rwanda rwiyandikishije ndetse rwamaze no gutanga ubusabe bw’inkingo, ku buryo nirumara kuhagera ku ikubitiro abanyarwanda bagera kuri 20% by’abaturage bose bazahita bakingirwa.

Muri Guma mu rugo naho abantu batuye ntibasohokaga
Ahategerwa imodoka mu Mujyi wa Kigali ni uku habaga hameze muri Guma mu rugo
Kigali yo mu ijoro ni uku yabaga imeze
Kubera ko nta modoka zagendaga uyu mubyeyi we yahisemo gukoresha igare agiye guhaha
Mu bihe bya Guma mu Rugo, Leta n'abikorera bafashije abatishoboye kubona ibyo kurya
Byagobotse benshi
Kugeza nubu utubari two turacyafunze kubera Covid 19
Nyuma ya Guma mu rugo bimwe mu bikorwa byongeye gufungura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .