Umuyobozi utababazwa n’uko ibyo ashinzwe byapfuye ntaho aba agana-Guverineri Gatabazi

Yanditswe na N.Kubwimana Janvière
Kuya 14 Ukuboza 2019 saa 12:50
Yasuwe :
0 0

Guverineri w’Intara y’Amajyaruguru Gatabazi Jean Marie Vianney, yatunze agatoki abayobozi batababazwa n’uko inshingano bashinzwe zitashyizwe mu bikorwa, avuga ko ntaho bagana.

Ni mu kiganiro yagiranye n’abayobozi bo mu nzego z’ibanze batandukanye mu Ntara y’Amajyaruguru, barimo abashinzwe ubuzima, uburezi, abayobozi b’ibitaro n’abandi.

Bareberaga hamwe ibibazo bikigaragara mu mirire mibi n’igwingira mu bana bato, uburyo amata atangwa mu bana n’imitangire ya serivise mu marerero (ECD).

Guverineri Gatabazi yagarutse ku kibazo cy’abayobozi batita kuri izi gahunda, abibutsa ko mu gihe cyose badakurikirana ishyirwa mu bikorwa ry’ibyo bashinzwe ari ntaho bagana.

Ati “Ibintu bimwe na bimwe bivugwa mu magambo bikarangirira aho, umuyobozi utababazwa n’uko ibyo ashinzwe byapfuye ntaho aba agana, ugasanga amata yagenewe abana aragurishwa, Shisha Kibondo umwana akayisangira n’umuryango wose, ibintu nk’ibi ntibikurikiranwe ugasanga abana bakomeje kuguma mu mirire mibi”.

Akomeza agira ati “Dufite ubutaka bwiza kandi bwera, dufashe abana bakiri mu mutuku n’umuhondo bajye mu cyatsi, abagore batwite hakurikiranwe uburyo bubahiriza gahunda zo kwipimisha, kuko niyo umwana yagwingira ari umwe ni igihombo gikomeye”.

Guverineri Gatabazi kandi yahaye umukoro aba bayobozi w’uko buri wese agomba kwiyandikishaho umudugudu umwe akajya awukurikirana, agakemura ibibazo byose bikiri mu bana bato, bagafatanya n’abakuru b’amasibo, abajyanama b’ubuzima n’abandi, bagafatanya mu kurandura burundu ibibazo by’imirire mibi n’igwingira mu bana bato.

Umuhuzabikorwa wa Porogaramu y’Igihugu mbonezamikurire y’abana bato Dr. Anitha Asiimwe, avuga ko gukurikirana ibibazo by’abana bato bisaba kuva mu biro bakabasanga mu miryango.

Ati “Gukurikirana ibibazo bijyanye n’imirire mibi n’igwingira mu bana bato, bisaba ingufu, tukava mu biro tukabasanga mu miryango iwabo tugafatanya n’ababyeyi babo mu kubitaho, tukabikora duhereye ku mudugudu kuzamura kandi twarabitangiye”.

Aba bayobozi nabo bahigiye imbere ya Guverineri Gatabazi ko bagiye kwikubita agashyi bakongera imbaraga mu mikorere yabo, ndetse ko bazita cyane ku bibazo bikibangamiye imibereho myiza y’abana bato bahereye ku midugudu bazaba biyemeje gukurikirana.

Mu turere dutanu tugize Intara y’Amajyaruguru Akarere ka Gakenke na Burera nitwo tugifite imibare ikiri hejuru y’abana bagwingiye, aho ibarura ryakozwe ryagaragaje ko mu 2018 Gakenke yari ifite 46% naho Akarere ka Burera kakaba gafite 42%.

Guverineri Gatabazi yakebuye abayobozi batababazwa n'uko ibyo bashinzwe byapfuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza