Umuyobozi Mukuru w’Ishami rishinzwe SIDA mu Muryango w’Abibumbye (UNAIDS), Sidibe Michel ari kumwe na Madamu Jeannette Kagame basuye ibitaro bya Polisi y’u Rwanda ku Kacyiru, bishimira uburyo bifasha abaturage babigana.

Sidibe Michel ari mu ruzinduko rw’akazi mu Rwanda mu gihe cy’iminsi ibiri, kuri uyu wa mbere yasuye ibitaro bya Polisi y’u Rwanda asobanurira serivise zifasha ababana n’abanduye ubwandu bwa SIDA; anerekwa ibikorwa by’abafashwa na Imbuto Foundation Jeannette Kagame abereye umuyobozi.

Umuyobozi w’ibitaro bya Polisi bya Kacyiru, CP Dr Daniel Nyamwasa asobanura urugendo rw’abashyiktsi yakiriye yagize ati “Madamu Jeannette Kagame ni we wafunguye ibi bitaro ku mugaragaro mu mwaka wa 2010. Yari aje kwereka umuyobozi wa ONU-SIDA, imirimo ikorerwa mu bitaro ifasha abantu banduye n’ababana n’ubwandu bwa SIDA no kumwereka aho tugeze mu Rwanda mu gukingira ababyeyi ngo abana bavuke batanduye. Aboneraho kumwereka abantu bahohoterwa bishingiye ku gitsina n’uburyo ibi bitaro bibafasha.”

Abashyitsi beretswe ikigo Isange Stop Center cyakikira kikanafasha abahohotewe, basura ikigo gitanga inama ku babyeyi banduye virusi ya SIDA n’uburyo bagomba kwitwara ngo batabyara abana banduye (Prevention of Mother to Child Transmission of HIV), ndetse banasura ihuriro rya ry’ababyeyi babana n’ubwandu bwa SIDA bafite imirimo bakora ibateza imbere (Family Package) kugera aho bohereza hanze y’igihugu bimwe mu bikorwa byabo.

Mu buhamya bwatanzwe n’umuryango ubana n’ubwandu bwa SIDA ukaba warafashinzwe na Family Package, washimiye Jeanette Kagame ku nkunga bahawe na Imbuto Foundation ndetse unamubwira ko imaze kubageza kuri byinshi.

Umugore w’imyaka 38 y’amavuko yagize ati “Naje muri iki kigo kwipimisha ntwite, basanga naranduye SIDA, baradufashije mbere na mbere mu buryo bwo kwiyakira, baduha imiti ya buri munsi ndetse ndanashima ko umwana wacu yavutse atanduye”

Uwo mugore yakomeje avuga ko ahereye ku gishoro ishyirahamwe ryabo ryahawe na Imbuto Foundation umuryango we ubayeho neza. Ishyirahamwe abamo baboha imyenda bakanaboha uduseke bakatwohereza hanze y’igihugu. Ubu we n’umugabo we babasha kwishyura ubwisungane mu kwivuza, kandi babashije no kwiyubakira inzu.

Abayobozi bombi, Madame Jeannette Kagame na Sidibe Michel banejejwe n’uburyo ibitaro bya Polisi bya Kacyiru bifasha abaturage, ndetse banashimishwa n’uburyo umuturage ashobora kwiteza imbere n’iyo yaba abana n’ubwandu bwa SIDA.

Biteganijwe ko umuyobozi mukuru wa UNAIDS akaba n’umuyobozi wungirije w’umunyamabanga mukuru wa Loni, Sidibe Michel azahura n’abayobozi bakuru b’igihugu, nyuma y’urugendo rwe rw’iminsi ibiri mu Rwanda akazerekeza mu gihugu cya Uganda.

Madamu Jeannette Kagame n'Umuyobozi w'Ishami rya Loni rishinzwe Sida Michel Sidibe nyuma y'ibiganiro bagiranye

Madamu Jeannette Kagame na Michel Sidibe batambagira ibitaro bya Polisi basobanurirwa ibikorerwa mu bice bitandukanye byabyo

Madamu Jeannette Kagame ba Michel Sidibe bari kumwe n'umwana wari kumwe n'umubyeyi we mu bitaro bya Polisi

Sidibe Michel Umuyobozi Mukuru wa UNAIDS yishimira imibereho y’abana n’ubwo ababyeyi babo babana n’ubwandu bwa SIDA

Ababyeyi bagize family Package Association baterwa inkunga na Imbuto Foundation bereka Madamu Jeannette Kagame na Michel Sidibe bimwe mu bikorwa byabo